ಕೂಗು...

ನಿನ್ನ ನಗು

2012-03-06T22:18:00.000-08:00

ಊಟ ತೆಗೆದುಕೊ, ನಿನಗಿಷ್ಟವಾದರೆ,

ಗಾಳಿಯೂ ಸಹ, ಆದರೆ ನನ್ನಿಂದ

ನಿನ್ನ ನಗು ಕಸಿದುಕೊಳ್ಳಬೇಡ.

ಗುಲಾಬಿ ತೆಗೆದುಕೊಳ್ಳಬೇಡ

ನೀನು ಕಿತ್ತುಕೊಟ್ಟ ಶೂಲದ ಹೂ

ಥಟ್ಟನೆ ನೀರು ಖುಷಿಗೆ ಸ್ಪೋಟಿಸಿದಾಗ,

ಚಣದಿ ಬೆಳ್ಳಿಯ ಅಲೆ ನಿನ್ನಲ್ಲಿ ಹುಟ್ಟುತ್ತವೆ.

ನನ್ನ ಕಠಿಣ ಹೋರಾಟದಿಂದ ದಣಿದು

ಸೊರಗಿದ ಕಣ್ಣುಗಳೊಂದಿಗೆ ಮರಳಿದಾಗ,

ಒವೊಮ್ಮೆ ಬದಲಾಗದ ಜಗ ಕಂಡಿರುವೆ

ಆದರೆ ನಿನ್ನ ನಗುವಿನ ಆಗಮನವಾದಾಗ,

ಅದು ನನ್ನ ಹುಡುಕುತ್ತಾ ಆಗಸದೆತ್ತರಕ್ಕೆ ಹಾರಿ,

ನನ್ನ ಬದುಕಿಗೆ ಎಲ್ಲಾ ಬಾಗಿಲು ತೆರೆಯುತ್ತದೆ.

ನನ್ನ ಪ್ರಿಯೆ, ಕಠೋರಸ್ಥಿತಿಯಲ್ಲೂ ನಿನ್ನ

ನಗೆ ತೆರೆಯುತ್ತೆ, ಮತ್ತೆ ಕೂಡಲೇ ನೀ ಕಂಡರೆ

ನನ್ನ ರಕ್ತ ರಸ್ತೆ ಕಲ್ಲುಗಳಿಗೆ ರಾಚಿರುವುದನ್ನು,

ನಗು, ನಗುತ್ತಲೇ ಇರು, ಏಕೆಂದರೆ

ನಿನ್ನ ನಗುವೇ ನನ್ನ ಕೈಗಳಿಗೆ

ಆಗ ಸಿಗುವ ಹೊಸ ಖಡ್ಗ.

ಸಾಗರದಂಚಿಗೆ ಶರತ್ಕಾಲಕ್ಕೆ,

ನಿನ್ನ ನಗು ನೊರೆಯುಕ್ಕಿದ ಜಲಪಾತ ಸೃಷ್ಟಿಸಬೇಕು

ಮತ್ತೆ ವಸಂತದಲ್ಲಿ, ಪ್ರಿಯೆ,

ನಿನ್ನ ನಗು ನಾನು ಇಷ್ಟಪಟ್ಟು ಕಾಯುತ್ತಿದ್ದ

ಹೂವಿನ ಹಾಗೆ, ತಿಳಿನೀಲಿ ಹೂ, ನನ್ನ ಮಾರ್ದನಿಸುವ ದೇಶದ ಗುಲಾಬಿ.

ರಾತ್ರಿ ನಗು, ದಿನದಲ್ಲಿ ನಗು,

ಚಂದ್ರನ ನೋಡಿ ನಗು,

ಆ ದ್ವೀಪದ ತಿರುವು ರಸ್ತೆಗಳ ನೋಡಿ ನಗು,

ನಿನ್ನ ಬಹುವಾಗಿ ಪ್ರೀತಿಸುವ,

ಈ ಕೊಳಕು ಹುಡುಗನತ್ತ ನೋಡಿ ನಗು,

ಆದರೆ ನಾನು ಕಣ್ತೆರೆದು ಮುಚ್ಚಿದಾಗ,

ನನ್ನ ಹೆಜ್ಜೆಗಳು ಹೋಗುವಾಗ, ಮರಳಿದಾಗ

ನನಗೆ ಊಟ, ಗಾಳಿ, ಬೆಳಕು, ವಸಂತ ಯಾವುದೂ ಕೊಡಬೇಡ,

ಆದರೆ ನಿನ್ನ ನಗುವಿಂದ ಮಾತ್ರ ದೂರವಿಡಬೇಡ,

ನಿನ್ನ ನಗುವಿಲ್ಲದಿದ್ದರೆ, ನಾನು ಖಂಡಿತ ಬದುಕಿರಲಾರೆ.

ಮೂಲಕವಿ: ಪ್ಯಾಬ್ಲೊ ನೆರುಡ

ದೇಶ: ಚಿಲಿ

1971 ಸಾಲಿನನೋಬೆಲ್ ಪ್ರಶಸ್ತಿ ವಿಜೇತರು

YourLaughter

Take bread away from me, if you wish,
take air away, but
do not take from me your laughter.

Do not take away the rose,
the lance flower that you pluck,
the water that suddenly
bursts forth in joy,
the sudden wave
of silver born in you.

My struggle is harsh and I come back
with eyes tired
at times from having seen
the unchanging earth,
but when your laughter enters
it rises to the sky seeking me
and it opens for me all
the doors of life.

My love, in the darkest
hour your laughter
opens, and if suddenly
you see my blood staining
the stones of the street,
laugh, because your laughter
will be for my hands
like a fresh sword.

Next to the sea in the autumn,
your laughter must raise
its foamy cascade,
and in the spring, love,
I want your laughter like
the flower I was waiting for,
the blue flower, the rose
of my echoing country.

Laugh at the night,
at the day, at the moon,
laugh at the twisted
streets of the island,
laugh at this clumsy
boy who loves you,
but when I open
my eyes and close them,
when my steps go,
when my steps return,
deny me bread, air,
light, spring,
but never your laughter
for I would die.

Pablo Neruda

Chile

ಶತಮಾನಕೆ ಸಾಕ್ಷಿ

2012-02-24T04:14:00.000-08:00

ಶತಮಾನದ ಸಾಕ್ಷಿಯಾಗಿ

ತಾರುಣ್ಯದ ಮೊಹರಿನಂತೆ

ಈ ಹೊಟೇಲಿನ ಕೋಣೆ

ಇಲ್ಲಿ ಬಂದು ಮಿಂದವರು

ಸಹಸ್ರಾರು

ನಾಯಕ, ಸೇವಕ,

ನಟ-ನಟಿಯರು,

ಪುಂಡರು, ಕಳ್ಳಕಾಕರರು,

ಕವಿ, ಕಲಾವಿದ, ಯಾತ್ರಿಕರೆಷ್ಟೋ

ತಂಗಿ, ತಡವರಿಸಿ, ತೂಗಿ, ತೇಲಾಡಿದವರು

ದಿಟ್ಟಿಸಿ, ಎದುಸಿರಿಂದ ನಿಟ್ಟುಸಿರಿಟ್ಟವರು

ನಿತ್ರಾಣಗೊಂಡು ಎದ್ದವರು,

ಬಿದ್ದವರು ಎಲ್ಲಿ, ಏಕೆ ಎಂಬ ಅರಿವಿರದೆ.

ಇದರ ದಿಂಬು, ಹಾಸಿಗೆ, ಮಂಚಗಳು

ಪರದೆ, ಹೊದಿಕೆಗಳು ಮಾಸಿ, ಮುರಿದು

ಬದಲಾದವುಗಲೆಷ್ಟೋ

ಇಲ್ಲೇ, ಇದೇ ಕೊಣೆಯೊಳಗೆ.

ಎಷ್ಟೊ ಕನಸುಗಳು, ಕೂಸುಗಳು ಕಸಿಯಾದವಿಲ್ಲಿ

ಅದರಲ್ಲಿ ಗರ್ಭಪಾತಗಳೆಷ್ಟೋ

ಉಳಿದವರು

ನಾಡಿಗೆ, ಕಾಡಿಗೆ

ಕೇಡು, ಕೊಡುಗೆಗಳಿತ್ತವರು ಎಷ್ಟೋ

ಇಲ್ಲಿ, ಪ್ರಣಯ ಪಕ್ಷಿಗಳ ಪ್ರಯೋಗಗಳು

ಅಂಚು-ಅಂಚಲ್ಲೂ ಮಿಂಚಿನ ಸಂಚಲನಗಳು,

ಸಂಚುಗಳು, ಮಾನಭಂಗಗಳು

ಎಷ್ಟೋ ಲೆಕ್ಕವಿಲ್ಲದಷ್ಟು

ಅಷ್ಟನ್ನೂ ಕಂಡು, ನುಂಗಿ ಅರಗಿಸಿಕೊಂಡ ನೀನು

ಇನ್ನೂ ಅಲ್ಲಾಡದಂತೆ, ನಿರ್ವಿಣ್ಣಗೊಂಡರೂ

ತೋರ್ಗೊಡದೆ, ತೇಜೋಮಯವಾಗಿ,

ರಾರಾಜಿಸುತ್ತಿರುವ ಗೋಡೆಗಳೆ...

ನಿಮ್ಮ ಸಹನೆ, ಸಂಯಮ, ಸಹಾನುಭೂತಿಯ

ಎಳ್ಳಷ್ಟಾದರೂ ಕರುಣಿಸಿ ಕೃತಾರ್ಥರಾಗಿ

ಹೊರಗೆ ಘಟಿಸುವುದನ್ನು

ಸಹಿಸಿಕೊಳ್ಳುವ ಸಲುವಾಗಿ.

ಅಭಿವೃದ್ಧಿ ಮಂತ್ರ ಜಪಿಸಿ

2011-11-17T23:50:00.001-08:00

ಜಾಗತೀಕರಣ, ಉದಾರೀಕರಣ,
ಖಾಸಗೀಕರಣ, ಗ್ರಾಹಗೀಕರಣಗಳೆಂಬ
ವಿಷದ ಶೂಲಗಳೆಸೆದು ಕರಣಗಳ ಕಡಿದು,
ಅಂತಃಕರಣದ ಹರಣಗೈದು,
ಪ್ರಕ್ಷುಬ್ಧ ಆತ್ಮಗಳ ಸೃಷ್ಟಿಸಿಹರು,
ಗೆದ್ದಿಲು ಹಿಡಿದ ಬೇರುಗಳಿಗೆ
ಕೃತಕ ಗೊಬ್ಬರ ಎರಚಿ,
ಮುಂಗಾರಿನತ್ತ ಉಬ್ಬೇರಿಸಿ,
ಸಾಧಕರಂತೆ ಬೀಗುವರು.

ಹಣದುಬ್ಬರಕ್ಕೆ ತತ್ತರಿಸಿದ
ಪೋಷಕರ ಪರದಾಟ,
ಹುಟ್ಟುವ ಮಗುವಿಗೆ ಮುಂಗಡ
ಶಾಲೆ ಪ್ರವೇಶ ಕಾದಿರಿಸಲು.
ಮನ, ಮತಿಗಳ ಗೇಣಿಗಿಟ್ಟು
ನೆಲೆ, ನಲಿವಿಗಾಗಿ ನೊಗವೊತ್ತಿದ್ದಾರೆ.
ಅಮ್ಮನ ಹಿಡಿಶಾಪ,
ಪಾಪ ಕೊಳೆತ ತರಕಾರಿ ಕೊಟ್ಟವನಿಗೆ,
ಕಸದ ಬುಟ್ಟಿಗೆ ಎಸೆಯುವವರೆಗೂ.

ಇನ್ನೂ ಅಲ್ಲಲ್ಲಿ
ಹೂಗಳು ಪರಮಳ ಸೂಸಿ
ದುಂಬಿಗಳ ಸೆಳೆಯುತ್ತಿವೆ,
ಕೇರಿ ಕೆರೆಯೊಳಗೆ ಕಪ್ಪೆಗಳ ಕೂಟ,
ಹಕ್ಕಿಗಳ ಹಿಂಡು ದೂರದಲ್ಲಿ
ಕಲರವವಿಟ್ಟು ಅಣಕಿಸುತ್ತಿವೆ,
ಆಲಿಸಿದವರ ಹಾಡನ್ನು
ಕೇಳುವ ಪುರಸೊತ್ತಿಲ್ಲ.

ಗುಲಾಬಿ

2011-10-17T00:03:00.000-07:00

ಗುಲಾಬಿ,
ಆ ಅಪ್ಪಟ ದ್ವಂದ್ವತೆ,
ಯಾರ ನಿದ್ದೆಗೂ ದಕ್ಕದ ಖುಷಿ,
ಎಷ್ಟೋ ರೆಪ್ಪೆಗಳಡಿಯಲ್ಲಿ.

***

Rose,
oh pure contradiction, joy
of being No-one's sleep, under so
many lids.

ಮೂಲ :ರೈನರ್ ಮಾರೀಯಾ ರಿಲ್ಕ್
ಕನ್ನಡಕ್ಕೆ :ಚಂದಿನ

ಬಿಂಬ: 71 - 75

2011-09-29T04:08:00.000-07:00

ಬಿಂಬ - 71
ಮಾರಕವನ್ನು ಪೂರಕವೆಂದು ಬಿಂಬಿಸುವ ಕಲೆ ರಾಜಕೀಯ.

ಬಿಂಬ – 72
ಬಡವರ ಹಸಿವಿಗೆ ಬಲ್ಲಿದ ಬಲಿಯಾಗುವ ದಿನ ಮುಂದೆ ಬರಬಹುದು.

ಬಿಂಬ - 73
ಪರಿಮಳ ಹೊಮ್ಮಿಸಿ ಸೆಳೆವ ಹೂವೆ, ಹಾದರವೆಂದಾರು ಜೋಕೆ?

ಬಿಂಬ - 74
ಪೊರೆ ಕಳಚಿ ಕೊಳೆ ಕಳೆವ ಹಾವೇ, ವಿಷವ ತೊರೆಯಲು ಸಾಧ್ಯವೆ?

ಬಿಂಬ - 75
ಬೆಲ್ಲಕ್ಕೆ ಮುತ್ತುವ ಇರುವೆ, ಹೆಣಕ್ಕೂ ದಾಂಗುಡಿ ಇಡಲು ಹೇಸುವುದಿಲ್ಲ.

ಬಿಂಬ : 66 - 70

2011-09-28T03:43:00.000-07:00

ಬಿಂಬ - 66
ಆ ಕಾಡ್ಗಿಚ್ಚಿಗೆ ಕರಗಿ ಹೋಗಿದ್ದು ಕೇವಲ ಕಾಡಲ್ಲ..?

ಬಿಂಬ – 67
ಅವಳು ಕಾರ್ಮೋಡ, ಅವನು ಕಗ್ಗಾಡು
ಅವರ ಕಾಳಗಕ್ಕೆ ಗುಡುಗು, ಮಿಂಚು, ಮಳೆ.

ಬಿಂಬ - 68
ಪಕ್ವವಾದ ಹಣ್ಣು ಬಯಸೀತಾದರೂ ಏನನ್ನು..?

ಬಿಂಬ - 69
ಬಾಟಮ್ ಜೀನ್ಸ್ ತುಂಬಿಕೊಂಡ ಪೋರಿ,
ಪಡ್ಡೆ ಹೋರಿಗಳೆಲ್ಲಾ ಚೆಲ್ಲಾಪಿಲ್ಲಿ...

ಬಿಂಬ - 70
ಮೋಹಕ ಕಂಗಳ ಮಾದಕ ನಗೆಯ ಪ್ರವಾಹಕ್ಕೆ
ಸಿಲುಕದ ಮಹನೀಯರು ಇದ್ದರೆ, ಅದು ಖಂಡಿತ ಸುಳ್ಳು.

ಹಾಯ್ಕು - 16

2011-09-27T00:29:00.000-07:00

ಸೂರ್ಯನ ಸೆರೆಯಿಡಿದೆ
ಎಂದು ಬೊಬ್ಬಿಡುವ ಅವಳ ಅಂಗೈಯಲ್ಲಿ ಸೇವಂತಿ ಕಂಡು
ತುಸು ಬೆಚ್ಚಿದ್ದು ಸುಳ್ಳಲ್ಲ...

ಮತ್ತದೇ...

2011-09-26T03:34:00.000-07:00

ಒಲ್ಲದ ವಿಷಯಗಳು?
ಒಂದೇ ಸಮ ದಾಡಿಯಿಟ್ಟಿವೆ,
ಯಾರದೋ ಸಾವು ನೋವಿಗೆ
ಕದಡುವ ಮನಸಿಗೆ ಕೊಟ್ಟವರಾರು ಅಪ್ಪಣೆ?
ರಾಡಿಯೆಬ್ಬಿಸಿ, ಉಬ್ಬೇರಿಸುವವರಿಗೆ
ನೀಡಬೇಕೆ ಉತ್ತರ!

ಛೆ,
ದಿನ ಬೆಳಗಾದರೆ ಇದೇ ಗೋಳು.
ಯಾರಿಗೋ ಆಘಾತ, ಅಪಘಾತ,
ಅಪಹರಣ, ಹರಣ,
ಕೊಲೆ, ಕೇಸು, ಕೋರ್ಟು.
ಇದನ್ನೇ ನೋಡುತ್ತಾ,
ಸಂಖ್ಯೆಗಳ ಕೂಡುತ್ತಾ,
ಕಣ್ಮನ ತುಂಬಿಸಿಕೊಳ್ಳುವ
ಕೆಟ್ಟ ಧಾವಂತ.

ಹಸಿವು,
ತಿಂದಷ್ಟೂ ತೀರದ,
ಅಜೀರ್ಣದಿಂದ ವಾಕರಿಕೆಯಾಗಿ,
ಆರೋಗ್ಯ ಹಾಳಾಗಿ ಸತ್ತರೂ ಸೈ,
ಬೇಕು, ಬೇಕು, ಇನ್ನೂ ಬೇಕು.

ಅಬ್ಬಬ್ಬಾ...
ದೋಚಿದ್ದೋ, ದೋಚಿದ್ದು
ಈಗ ಎಚ್ಚೆತ್ತವರು ಜನರೋ,
ಸರಕಾರವೋ, ಇಲ್ಲಾ ನ್ಯಾಯಾಂಗವೋ,
ಇಲ್ಲಾ ಇವರೆಲ್ಲರ ತಲೆಗೆ ಹುಳಬಿಟ್ಟು
ಮಗುಮ್ಮನೆ ನಗುವ ಮಾಧ್ಯಮವೋ?
ಭ್ರಷ್ಟರಿಗೇಕೋ ಕಾಲ ಕೆಟ್ಟಿದೆ,
ಕಂಬಿ ಎಣಿಸುವ ಭಯ,
ಹಾವು-ಏಣಿ ಆಟದ ನಡುವೆ,
ಸಾಮಾನ್ಯನಿಗೊಂದಿಷ್ಟು ನಿಟ್ಟುಸಿರು.
ದಿನ - ರಾತ್ರಿ ಮತ್ತಿವೇ
ಗೋಜು-ಗೊಂದಲಗಳು...

ಈಗಷ್ಟೇ ಕರೆ ಮಾಡಿದ ಗೆಳತಿಗೆ
ಬೇಕಂತೆ ಪೀಝಾ, ಬರ್ಗರ್.
ಅಮ್ಮ ಮಾಡಿದ ಮುದ್ದೆ ಬಸ್ಸಾರಿಗೆ,
ಮತ್ತೆ ಹಳೆಯ ಹಾಡಿಗೆ,
ನನಗಿಲ್ಲ ಯಾವ ತಕರಾರು.

ಬಿಂಬ 61 - 65

2011-05-20T04:49:00.000-07:00

ಬಿಂಬ - 61
ಅಮೂರ್ತ ಬಿಂದುಗಳ ಬಂಧನ ಬದುಕು

ಬಿಂಬ - 62
ಬಾನ ಕನಸಿಗೆ, ಬಯಲೆ ಬದುಕು

ಬಿಂಬ – 63
ಕಾಂಕ್ರೀಟ್ ಕಾಡಲ್ಲೂ ಜೇನುಗೂಡು,
ಕೋಗಿಲೆ ಹಾಡು...

ಬಿಂಬ - 64
ಮಡಿಕೆಯೊಳಗೂ ಚಿಮ್ಮುವ ಹೊಂಗಿರಣ

ಬಿಂಬ - 65
ನಾನು ಬಯಲು, ಬಾನು ಅವಳು

ಕಾಲ

2011-05-10T04:05:00.000-07:00

ಕಾಲ
ಕಟ್ಟಿ, ಕೂಡಿಡಲು
ಕಪ್ಪು ಹಣವಲ್ಲ

ದೇಶ
ದೋಚಿಕೊಳ್ಳಲು
ಯಾರಪ್ಪನ ಸ್ವತ್ತಲ್ಲ

ಕಿಂಚಿತ್
ಇತಿಹಾಸ ಬಲ್ಲ
ಬಲ್ಲಿದನೂ ಊಹಿಸಬಲ್ಲ
ನಾಳೆಗಳ ನಾದ-ವಿನೋದ

ಸಾಗಲಿ, ಸಾಗಲಿ
ಸಡಗರದ ಗರಡಿ
ಸಾಗರವ ದಾಟಿ, ಶಿಖರಗಳ ಮೆಟ್ಟಿ
ಕೊರೆದು, ಜಿಗಿದು, ತೇಲಿ, ಹಾರಿ
ಎಗ್ಗಿಲ್ಲದೆ ಮಬ್ಬುಗತ್ತಲಿನಲ್ಲೂ
ಅಲ್ಲಲ್ಲಿ ಇರುವೆಗಳ ಹಿಂಡು, ಹೆಗ್ಗಣಗಳ ದಂಡು

ಖಂಡಿತ
ಮತ್ತೆ ಬರುವುದು ವಸಂತ
ಮೂಡಣದ ರವಿಯೂ
ಮುಗುಚಿ, ಮುಗ್ಗರಿಸುವಂತೆ...

ಬಿಂಬ : 56 – 60

2011-04-15T06:04:00.000-07:00

ಬಿಂಬ - 56
ಸಾಗರ ದಿಕ್ಕರಿಸಿ
ನಿತ್ಯ ಹರಿವ ನದಿ
ನಾಗರೀಕತೆ

ಬಿಂಬ - 57
ಬಿಡಿಸಲಾಗದ ಕಗ್ಗಂಟು
ಬಿಚ್ಚಿಟ್ಟ ನಂತರ ಬಾಳೆ ಸಿಪ್ಪೆ

ಬಿಂಬ - 58
ಕಣ್ ರೆಪ್ಪೆಗಳಲ್ಲಿ ಕಳೆದುಕೊಂಡದ್ದು
ಮೊಗೆದಷ್ಟೂ ಎಟುಕದ ವಿವರಗಳು

ಬಿಂಬ - 59
ಸುಡುಸುಡು ಬಿಸಿಲಿಗೆ ದಾಹ
ಬತ್ತಿದ ಬಾವಿಗೆ ಬೀಗ

ಬಿಂಬ - 60
ಕಾವ ಕರಗಿಸಿದ ಕಡಲು
ಸುನಾಮಿ ಅದರ ಸಿಡಿಲು

ಆ ದಿನ

2011-03-25T00:51:00.000-07:00

ಬೆತ್ತಲೆ ಮರಕ್ಕೆ
ಮೈದುಂಬಿಸಿಕೊಳ್ಳುವ
ಧಾವಂತ.

ಅಡಿಯಲ್ಲಿ
ರೆಕ್ಕೆ ಮುರಿದ ಹಕ್ಕಿಗೆ
ಕುಂಟ ಬೆಕ್ಕಿನ ಸಾಂತ್ವನ.

ನಲುಗಿದ
ಜಿರಲೆಗೆ ಮುತ್ತಿದ
ಇರುವೆಗಳ ಹಿಂಡು.

ಕಸದ ತೊಟ್ಟಿಗೆ ಎಸೆದ
ಮೂಳೆ, ಮಾಂಸಕ್ಕೆ
ಬೀದಿ ನಾಯಿಗಳ ಕಚ್ಚಾಟ.

ಪಕ್ಕದಲ್ಲಿ
ಕುಡಿದು ಕುಸಿದ
ಆಸಾಮಿಯ ನಿಲ್ಲಿಸಲು
ನೆಂಟರ ಅರೆಸಾಹಸ.

ಕಾವ್ಯ

2011-02-05T15:33:00.000-08:00

ಸುಂದರ ಸಾಲಿನ ಶೇಖರಣೆ;
ಕದ್ದ ಮಾಲಿಗೆ ಒಗ್ಗರಣೆ.
ಪ್ರಭಾವಕ್ಕೆ ಉಕ್ಕಿದ,
ಪ್ರೇರಣೆಯಿಂದ ಹಿಗ್ಗಿದ,
ಭಾರಕ್ಕೆ ಬಾಗಿದ
ಬಾಳೆಗೊನೆ.

ಇಲ್ಲಾ,
ಭಾವದ ಬೆಸುಗೆ,
ಅರೆ ಬೆಂದ ಅನ್ನ,
ಋತು, ಮದ್ಯ, ಮಹಿಳೆ
ಕಾಡು, ಕಡಲು, ಕಿನಾರೆ
ಎಲ್ಲವೂ ಕ್ಲೀಷೆ.

ಅಥವಾ,
ಆತ್ಮವಿಲ್ಲದ
ರಾಮ, ಯೇಸು, ಅಲ್ಲ
ಅಲ್ಲವೇ ಅಲ್ಲ.

ಅದೊಂದು,
ಕಾಲ, ದೇಶವ ದಾಟಿ
ಕದಡಿ, ಕಾಡುವ
ಅಸಹಜ ಸಾವು, ಅಥವಾ...

ಹೀಗೇಕೆ?

2010-06-28T05:35:00.000-07:00

ಮುಸ್ಸಂಜೆ
ಬಾಡಿದ ಮೊಗಗಳ ಸಂತೆಯಲಿ
ಉಮ್ಮಸ್ಸಿನ ಕಿಚ್ಚೊತ್ತವರು
ಕುಡುಕರು ಮತ್ತೆ ...

ನಡುರಾತ್ರಿಯಲ್ಲೂ
ಸೆಳೆಯುವ ಸವತಿಯರು
ಬೆಳಕೊಮ್ಮಿಸಿ ಬಾಯ್ತೆರೆದ ಬಾರುಗಳು...

ಕತ್ತಲೊಳಗೆ ಕಿಂದರಜೋಗಿಯ
ಹಾಡು ಕೇಳುವ ಧಾವಂತ
ಏಕಾಂಗಿ,
ಆದರೂ ಅಂಗಾಂಗ ಪುಳಕ...

ಸೋತರು ಸರಿಯೆ
ಹೋಗುವ ಮೊದಲೊಮ್ಮೆ
ಎಲ್ಲಬದಿಗಳೂ ತಡಕುವ ತವಕ...

ಕೊಲೆ!

2010-04-05T23:33:00.000-07:00

ಇಂದು...

ಕನಸುಗಳ ಕೊಲೆ,

ಅಂತಃಕರಣದ ಕೊಲೆ

ಆತ್ಮಸಾಕ್ಷಿ, ಆಸ್ಮಿತೆಯ ಕೊಲೆ

ಅಭಿಮಾನ, ಸ್ವಾಭಿಮಾನದ ಕೊಲೆ

ಸ್ನೇಹ, ಸಂಬಂಧಗಳ ಕೊಲೆ

ಪ್ರೀತಿ, ವಿಶ್ವಾಸಗಳ ಕಗ್ಗೊಲೆ

ನಂಬಿಕೆ, ನಿರೀಕ್ಷೆಗಳ ಕೊಲೆ

ನೀತಿ, ನಿಯಮಗಳ ಕೊಲೆ

ಮೌಲ್ಯಗಳ, ಮಾನವತ್ವದ ಕೊಲೆ

ಪ್ರಕೃತಿ, ಪರಿಸರದ ಕೊಲೆ

ನಾಳೆ...

ಮನುಕುಲದ ಕೊಲೆ

ಕೊಲೆ, ಕೊಲೆ, ಕೊಲೆ!

ಹಾಯ್ಕು – 15

2010-03-27T03:18:00.000-07:00

ಮಾಗಿಯ ಎಲೆಗಳು
ಅಜ್ಜನ ಬಾಲ್ಯದ ಕಥೆಗಳನ್ನು
ಬಹಳ ಆಸ್ಥೆಯಿಂದ ಕೇಳಿಸಿಕೊಳ್ಳುತ್ತವೆ...

ಹಾಯ್ಕು - 14

2010-03-16T22:09:00.000-07:00

ಅಂಗೈತುಂಬ ಮಲ್ಲಿಗೆ ಹಿಡಿದು
ಪೂರ್ಣಚಂದ್ರನು ಇವನೆ ಎನ್ನುವ
ಅವಳ ಪ್ರಖರ ಮುಗ್ಧತೆಗೆ ಬೆರಗಾದೆ...

ಹತಾಶೆಯ ಕಣ್ಣು...

2010-03-08T21:50:00.001-08:00

ರೆಕ್ಕೆ ಮುರಿದ ಹಕ್ಕಿಗೆ
ಹಾರುವ ಹಂಬಲ
ನಿಲ್ಲದ ಯತ್ನ
ಅತೀವ ಹತಾಶೆ

ಬದಿಯಲ್ಲೊಂದು
ಕುಂಟ ಬೆಕ್ಕಿನ
ಸೋತ ಕಣ್ಣುಗಳಿಂದ
ಸಾಂತ್ವನ

ಕಾಫಿ ಕಪ್ಪಿನ
ಸುಳಿಗೆ ಸಿಲುಕಿ
ತಳ ತಾಕಿದ
ದುರ್ದೈವದ ಇರುವೆ

ಪಾಪದ ಸೊಳ್ಳೆ
ಬ್ಯಾಟರಿ ಬ್ಯಾಟಿಗೆ
ಸಿಕ್ಕಿ ಚಿನಕುರಳಿ ಸದ್ದು
ಅದರ ಸತ್ತ ಸಂದೇಶ

ಮನೆಯೊಡತಿಗೆ
ಗ್ಯಾಸು
ಮುಗಿದೇ ಹೋಯಿತೆನ್ನುವ
ಎಂದಿನ ಆತಂಕ

ಇವರಿಗೆ ಮಾವಿನೆಲೆಯ
ರೆಂಬೆ ಕಡಿದು
ಮನೆಗೆ ತೋರಣ
ಕಟ್ಟುವ ಧಾವಂತ

ಹಾಯ್ಕು - 13

2010-03-07T22:40:00.000-08:00

ಹೆಜ್ಜೆಯ ಗುರುತುಗಳೆಲ್ಲಾ
ಅಲೆಗಳು ಅಳಿಸಿ ಹಾಕಿದರೂ ಸಹ
ತಪ್ಪುಗಳಿನ್ನೂ ತೀವ್ರವಾಗಿ ಕಾಡುತ್ತಿವೆ ...

ಇಂದು ಮತ್ತೆ ನಾಳೆ...

2010-03-01T00:01:00.000-08:00

ಇಂದು, ಈ ಜಗತ್ತು ಅಧಿಕಾರಿಶಾಹಿ ಶ್ರೀಮಂತರ ಪಾಲಾಗಿದೆ
ಯೋಚಿಸಬೇಡಿ ಪ್ರಿಯ ಬಂಧುಗಳೆ,
ಬನ್ನಿ ನಾವೆಲ್ಲ ಒಂದಾಗಿ ಹಾರೈಸೋಣ
ಅವರಿಗೆ “ಶುಭವಾಗಲಿ” ಎಂದು!

ನಿಮಗೆ ಇನ್ನೊಂದು ಬಹಳ ಕುತೂಹಲಕಾರಿ ಮತ್ತು ಅಚ್ಚರಿಯ ಸಂಗತಿ ಏನೆಂದು ಗೊತ್ತೆ?
ಮತ್ತೊಂದು ದಿಸೆಯಲ್ಲಿ;
ನಮ್ಮ ಅಂದರೆ ಅಸಹಾಯಕ ನಿರ್ಗತಿಕರ ಸಂಖ್ಯೆ
ನಿರಂತರವಾಗಿ ಹೆಚ್ಚಾಗುತ್ತಿರುವುದು ತುಂಬಾ ಒಳ್ಳೆಯದಲ್ಲವೆ?
ಏಕೆಂದರೆ, ಇಂತಹ ಸನ್ನಿವೇಶದಲ್ಲಿ
ನಾವು ದ್ರುತಿಗೆಡದೆ, ಸಹನೆ, ಸಂಯಮದಿಂದ ಮಾನವತ್ವ ಮೆರೆಯೋಣ
ನಾಳೆ ಎಂಬುದು ನಿಸ್ಸಂಶಯವಾಗಿ ನಮ್ಮದಾಗಲಿದೆ!

ಬಿಂಬ : 51 - 55

2010-02-12T23:49:00.000-08:00

ಬಿಂಬ - 51
ಜಗವೆಲ್ಲಾ ಮಾಯೆ
ನನ್ನವಳು ಅದರ ಛಾಯೆ...

ಬಿಂಬ - 52
ಅವಳ ತವಕ ತಲ್ಲಣಗಳೂ
ಸಹ ಪ್ರೀತಿಯ ಬಾಣಗಳು...

ಬಿಂಬ - 53
ಮದಿರೆಯೆ ದಾಹ
ನಿಯಂತ್ರಿಸುವುದು, ಅವಳ ಕಾಡುವ ಮೋಹ...

ಬಿಂಬ – 54
ಅವಳ ಮೌನ ರಾಗಗಳಗೆ,
ಹಾರುವ ಹಕ್ಕಿ ಉತ್ತರ ನೀಡಿದೆ...

ಬಿಂಬ – 55
ಅವಳ ನಗುವಲ್ಲೂ ನೋವನ್ನು
ಬಿಂಬಿಸುವ ಪರಿ, ಕಳವಳ ಮೂಡಿಸುತ್ತದೆ...

ಹಾಯ್ಕು - 12

2010-02-10T02:52:00.000-08:00

ನಲ್ಲಿಯಿಂದ ನೀರು ತೊಟ್ಟಿಕ್ಕುತ್ತಿದೆ
ಗಡಿಯಾರದ ಪೆಂಡುಲಮ್ ಲಯದೊಂದಿಗೆ,
ಜಾಗತಿಕ ತಾಪಮಾನದ ಮುನ್ಸೂಚನೆ ನೀಡುತ್ತಾ...

ಹಾಯ್ಕು - 11

2010-01-24T21:41:00.000-08:00

ಮಂಜು ಮುಸುಕಿದ ನಸುಕಿನಲ್ಲಿ
ನುಗ್ಗುವ ಬೆಚ್ಚಗಿನ ರವಿಕಿರಣ
ಅವಳ ಕಿರುನಗು ...

ಶ್ರೇಷ್ಠತೆಯ ಹುಡುಕಾಟದಲ್ಲಿ...

2010-01-21T23:04:00.001-08:00

ಓ ನನ್ನ ಗೆಳೆಯನೆ!
ಆ ಅತ್ಯದ್ಭುತ ಕಾವ್ಯವೇ
ನನ್ನ ಏಕೈಕ ಸ್ವರ್ಗ
ಮತ್ತೆ ಆ ಮಾದಕ ಸೌಂದರ್ಯ
ಅದೇ ಈ ಜಗದ ಚಿರಂತನ ಸತ್ಯ...
ಅಲ್ಲಿರುವುದು ನನ್ನ ಶ್ರೇಷ್ಠತೆಯ ಹುಡುಕಾಟದ
ಐಕ್ಯ ಮಂಟಪ.

ಓ ನನ್ನ ಆಪ್ತನೆ!
ಇಲ್ಲಿ ನೋಡು ಮನಮೋಹಕ ಸಂಗೀತ
ನನಗೆ ದೈವವಿತ್ತ ಅತಿದೊಡ್ಡ ಕೊಡುಗೆ
ಮತ್ತೆ ಆ ನಿಶಬ್ಧ ಮೀಟುವ ಅನನ್ಯ ರಾಗಗಳು
ಮೂಕವಿಸ್ಮಿತನನ್ನಾಗಿಸುತ್ತವೆ
ಅದರಲ್ಲಡಗಿದೆ ನನ್ನ ನೆಚ್ಚಿನ ನೆಲೆ
ಆ ಭಾವಲಹರಿಯ ನರ್ತನದಲ್ಲಿ...

ಓ ನನ್ನ ಸ್ನೇಹಿತನೆ!
ಇನ್ನೂ ಇದೆ, ಅದೇ ಆ ನಿಸರ್ಗದ ಹಸಿರಿನ ಸಿರಿ
ನನ್ನ ಮತ್ತೊಂದು ಸುಂದರ ಸಂಗಾತಿ
ಮತ್ತಲ್ಲಿ ಕೇಳುವ ದುಂಬಿಗಳ ನಿನಾದ,
ಹಕ್ಕಿಗಳಿಂಚರ ವಾಹ್...ಏನದ್ಭುತ!
ಆ ಪ್ರಕ್ರಿಯೆಯಲ್ಲಿದೆ ನನ್ನ ಉತ್ಸಾಹದ ಚಿಲುಮೆ
ಆತ್ಮರತಿ ಸಿದ್ಧಿಸುವ ಕ್ಷಣದ ಸನಿಹದಲ್ಲಿ...

ಇಂದು ವಿವೇಚನೆ ಮಸುಕಾಗಿದೆ...

2010-01-14T23:51:00.000-08:00

ಕಾಮ,
ಐಷಾರಾಮಿತನ,
ಜನಪ್ರಿಯತೆಯ ಬೆನ್ನತ್ತಿ
ತಮ್ಮ ಸಭ್ಯತೆಯನ್ನು ತೊರೆದಿದ್ದೇವೆ.

ಅಧಿಕಾರ,
ಅಭಿವೃದ್ಧಿ,
ಐಶ್ವರ್ಯದ ಹುಚ್ಚಿಂದ
ತಮ್ಮ ಅತಃಕರಣವನ್ನು ಕಡಿದಿದ್ದೇವೆ.

ಗಡಿ,
ಧರ್ಮ,
ಭಾಷೆಯ ಹೆಸರಲ್ಲಿ
ತಮ್ಮ ವ್ಯಕ್ತಿತ್ವಗಳನ್ನು ಹೂತಿದ್ದೇವೆ.

ಜಾತಿ,
ಬಣ್ಣ,
ಧಾರ್ಮಿಕ ನಂಬಿಕೆಗಳ ಹೆಸರಲ್ಲಿ
ನಾವು ಮನುಷ್ಯತ್ವವನ್ನೇ ಕೊಂದಿದ್ದೇವೆ.

ಹಾಯ್ಕು - 10

2010-01-08T00:02:00.001-08:00

ಮುಸ್ಸಂಜೆಯ ನಂತರ
ಹೊಳೆವ ತಾರೆಗಳು,
ಅವಳ ಕಣ್ಣುಗಳು...

ಹಾಯ್ಕು – 9

2010-01-06T21:56:00.000-08:00

ತುಂತುರು ಮಳೆಯಲ್ಲಿ
ನಶೆಯೇರಿಸುವ ಮಣ್ಣಿನ ಸುಗಂಧ,
ಅವಳ ಬೆವರು.

ಹಾಯ್ಕು – 8

2010-01-06T02:35:00.000-08:00

ನಲ್ಲೆ, ನನ್ನ ಯೌವನ
ಮುಳುಗಿ ಹೋಯಿತು ನಿನ್ನಲ್ಲಿ
ಮುಗಿಲೆತ್ತರದ ಕಡಲಲ್ಲಿ ಮುರಿದ ದೋಣಿಯಂತೆ...

ಹಿತವರು...

2009-12-14T21:06:00.000-08:00

ನನ್ನ ನೆರಳಿಗೆ ಮುಪ್ಪಿಲ್ಲ,
ನೆನಪುಗಳಂತೆ
ಇವರು ನನ್ನ ಎಂದೂ ತೊರೆಯಲೊಲ್ಲದ,
ತಕರಾರಿಲ್ಲದ ಜೊತೆಗಾರರು.
ಇವರೊಂದಿಗೆ ನಿತ್ಯ ಬಂದು ಹೋಗುವ
ಆತ್ಮೀಯ ಅತಿಥಿ
ಕನಸು.
ಹಗಲಿಗೆ ನೆರಳು, ನೆನಪು
ಇರುಳಿಗೊಂದು ಕನಸು.
ಇವರೆ,
ನನ್ನೊಂದಿಗೆ ಹುಟ್ಟಿಸಾಯುವ
ಅಸಹಾಯಕರೊ, ಅದೃಷ್ಟವಂತರೊ
ಇಲ್ಲಾ ಯಾವದೋ ಅನಿವಾರ್ಯತೆಯ ಸೃಷ್ಟಿ
ಅವರಂತೆ ನಾನು...

ಬಿಂಬ : 46 – 50

2009-12-11T01:31:00.000-08:00

ಬಿಂಬ – 46
ಕಲ್ಲು ಬೀಸಿದ್ದು ಕಾಯಿಗೆ
ಬಿದ್ದದ್ದು ಹಣ್ಣು
ನಂತರ ಪಾಪ ಪಶ್ಚಾತ್ತಾಪ...

ಬಿಂಬ – 47
ಎಲ್ಲರನ್ನೂ ನಿರಂತರ
ಕಾಡುವುದು ಯಾವುದಾದರೂ
ಒಂದು ಹಸಿವು...

ಬಿಂಬ – 48
ನಲ್ಲೆ
ಚಳಿಗಾಲದಲ್ಲಿ
ಎಲ್ಲದಕ್ಕೂ ಮಿಗಿಲು
ನಿನ್ನ ಆಲಿಂಗನ

ಬಿಂಬ – 49
ಒಮ್ಮೆಗೆ,
ಸ್ವರ್ಗವನ್ನೂ ಸಹ ಮರೆಯಬಹುದು,
ಕಾವ್ಯ, ಮದ್ಯ, ಇಲ್ಲಾ ಮಹಿಳೆ
ಸದಾ ಇವರ ನಶೆಯಲ್ಲಿರುವವರು.
ಮತ್ತೆ ಇವರನ್ನು ಕಂಡಾಗ
ಬಹಳ ಸಭ್ಯರೂ ಕೂಡ ತೀವ್ರ ಅಸೂಯೆಯಿಂದ,
ತಮ್ಮ ಅಸಹಾಯಕತೆಗೆ ಮರುಗುತ್ತಾರೆ.

ಬಿಂಬ – 50
ಕ್ಷಮಿಸಿ...
ಕಾಫಿ, ಸಿಗರೇಟ್, ಗರ್ಭನಿರೋಧಕಗಳು
ಮತ್ತೆ ಎಲ್ಲಕ್ಕಿಂತಲೂ ಮುಖ್ಯವಾಗಿ ಮದ್ಯಸಾರ!
ಪ್ರತಿ ಚಳಿಗಾಲದಲ್ಲಿ ತಮ್ಮ ನಿರಂಕುಶ ಅಧಿಕಾರ ಚಲಾಯಿಸುತ್ತವೆ.

ಮತ್ತೆ ಬರುವನು ಚಂದಿರ - 39

2009-11-24T01:09:00.000-08:00

ವಿಲಕ್ಷಣ ಬಂಧಗಳ ಧಾವಂತ
ಹಂತಹಂತವಾಗಿ ಹತನಾಗುತ
ಮೂಡಣ ಪಡುವಣಗಳ ವಸಂತ
ಜೊತೆಗೆ ಬರುವುದೆ ಚಂದಿರ

ಸತತ ಕಾಡುವ ಪ್ರೇಮಭಂಗ
ಕಿತ್ತು ತಿನ್ನುವ ಸ್ವಾರ್ಥರಸಂಗ
ಅನುದಿನವು ಅದೇ ರಣರಂಗ
ನಿಟ್ಟುಸಿರಿಡುವಾಸೆ ಚಂದಿರ

ನಿತ್ಯ ಜೂಜಿನ ಸೆಳೆತದಿಂದ
ಸಂಜೆ ಮದ್ಯದ ಸ್ನೇಹಬಂಧ
ಸತತ ಸೋಲಿನ ಚಡಿಯೇಟು
ಚಿತ್ತ ಚಿಗುರುವುದೆ ಚಂದಿರ

ಸೂಕ್ಷ್ಮ ಸಂವೇದಿಗಳ ಗ್ರಹಿಸದೆ
ಆತ್ಮರತಿಯನು ಅನುಭವಿಸದೆ
ವಿವೇಚನೆಗೆ ಅವಕಾಶ ನೀಡದೆ
ನೋಡು ಬೆಪ್ಪನಾಗಿಹೆ ಚಂದಿರ

ಸಂಕಟ, ಅಪಮಾನಗಳ ಸಾಲು
ನಿರಾಶೆ, ಹತಾಶೆಯ ವಿಷವರ್ತುಲ
ಕದಡಿದ ಚಿತ್ತ ಹಾರಿದೆ ಎತ್ತೆತ್ತಲೊ
ಹುಡುಕಿ ಕೊಡುವೆಯಾ ಚಂದಿರ

ಬದುಕಿನ ಸರಳ ವಿವರಗಳೆಲ್ಲ
ಮರೆಯಾದವೊ ಬಿರುಗಾಳಿಗೆ
ಪಾನಮತ್ತನ ಚಿತ್ತ ಚದುರಿದೆ
ಇನ್ನು ಸಹಿಸಿಲಾಗದೆ ಚಂದಿರ

ಹೆಣ್ಣು, ಹೊನ್ನು, ಮಣ್ಣುಗಳ
ನಿರಂತರ ಸೆಳೆತಕೆ ಸಿಲುಕಿ
ಮತಿಹೀನನಾದವನಿಗೆ ಮುಕ್ತಿ
ಸಿಗದೆ ತತ್ತರಿಸುವ ಚಂದಿರ

ಖಿನ್ನತೆಯಿಂದ ಪಾರಾಗಲು
ಮದ್ಯಸಾರವೆ ನಿತ್ಯ ನೈವೇದ್ಯ
ಬೆನ್ನಟ್ಟಿ ಬರುವ ಭೂತಗಳಿಂದ
ಪಾರಾಗ ಬಲ್ಲನೆ ಚಂದಿರ

ವಿಪರೀತ ನಿರೀಕ್ಷೆಯ ಪ್ರತಿಫಲ
ತಾರಾಫಲದ ದಿಗ್ದರ್ಶನದ ಬಲ
ಸಾಕ್ಷಿಪ್ರಜ್ಞೆ ತೊರೆದ ಅಂತರಾತ್ಮ
ಸ್ವಯಂಕೃತ ಅಪರಾಧ ಚಂದಿರ

ಜೀವನಪ್ರೀತಿಯನ್ನು ತೊರೆದು
ಮಾನವಪ್ರೀತಿಯನ್ನು ಮರೆತು
ತೆರೆದಿಡುವ ತುಡಿತಕೆ ಹಿಂಜರಿದು
ಪಲಾಯನ ಮಾಡಿದೆ ಚಂದಿರ

ಮತ್ತೆ ಮತ್ತೆ ಕಾಡುವ ಬಾಪೂ, ಥೆರೆಸಾ...

2009-11-17T22:25:00.000-08:00

ನಿಮ್ಮ ಸರಳತೆ, ನಿಸ್ವಾರ್ಥ ಸೇವೆ, ಆ ಮುಕ್ತ ಪ್ರೀತಿ, ತತ್ವ-ಸಿದ್ಧಾಂತ
ಮತ್ತು ಆದರ್ಶಗಳ ಕಿಂಚಿತ್ ಪರಿಚಯವೂ ಸಹ
ನಮಗೆ ನಿಜವಾಗಲೂ ಇರಬಾರದಿತ್ತು.

ಇದರೊಂದಿಗೆ ಖಂಡಿತವಾಗಿ,
ಇತಿಹಾಸವೇ ಇಲ್ಲದ ನೆಲೆಯಲ್ಲಿ ಮಾತ್ರ
ನಾವು ಹುಟ್ಟಬೇಕಾಗಿತ್ತು, ಹಾ...ಇತಿಹಾಸವಿಲ್ಲದ ನೆಲದಲ್ಲಿ...

ಏಕೆಂದರೆ,
ಆಗ ಮಾತ್ರ...ನಿಜವಾಗಲೂ ಆಗ ಮಾತ್ರ
ನಮಗೆ ನಿಸ್ಸಂಕೋಚವಾಗಿ ಅನುಭವಿಸಲು,
ಎಳ್ಳಷ್ಟೂ ಸಂದೇಹವಿಲ್ಲದೆ ಒಪ್ಪಿಕೊಳ್ಳಲು ಸಾಧ್ಯವಿತ್ತು
ಈ ಪ್ರಸಕ್ತ ಕಾಲಮಾನದಲ್ಲಿ ಘಟಿಸುವ ಎಲ್ಲ ದುಷ್ಕೃತ್ಯಗಳನ್ನೂ
ಸಹಜವೇ ಎಂಬಂತೆ, ತೀರಾ ಸ್ವಾಭಾವಿಕವೆನ್ನುವಂತೆ
ಯಾವ ಅಡಚನೆಯೂ ಇಲ್ಲದೆ, ನಿಬಂಧನೆಗಳೂ ಇಲ್ಲದೆ ಸ್ವೀಕರಿಸಬಹುದಿತ್ತು.

ನಮಸ್ತೆ,
ಬಾಪೂ, ಥೆರೆಸಾ!
ಖಂಡಿತ ನಾನು ಬಲ್ಲೆ
ನಿಮಗಿನ್ನೂ ಕೇಳಿಸಿಕೊಳ್ಳುವ ಸಂಯಮವಿದೆಯೆಂದು?
ಆದ್ದರಿಂದಲೇ ನಾನು ಸಾಧ್ಯವಾದಷ್ಟು ಗಟ್ಟಿಯಾಗಿಯೇ ಹೇಳಬಯಸುವೆ
ನೀವಿಬ್ಬರೂ ಅತೀ ದೊಡ್ಡ ತಪ್ಪುಮಾಡಿದ್ದೀರಿ,
ದುರದೃಷ್ಟವಶಾತ್ ನೀವು ಇದೇ ಈ ನೆಲದಲ್ಲೇ ಹುಟ್ಟಿ,
ಅಗಾಧವಾದ ಅಸಾಧ್ಯತೆಗಳೆಲ್ಲವನ್ನೂ ಸರಳವೆನ್ನುವಷ್ಟು ಸಲೀಸಾಗಿ ಸಾಧಿಸಿ, ಸಾಧ್ಯವಾಗಿಸಿ
ಹಾಗೇ ನೆಮ್ಮದಿಯಾಗಿ ಯಾರೂ ಅರಿಯದ ಯಾವುದೋ ಶ್ರೇಷ್ಠ ಗೂಡಿಗೆ ಹಾರಿ ಬಿಟ್ಟಿದ್ದೀರಿ,
ಹೀಗೆ ನಮ್ಮನ್ನು ನಿರಂತರವಾಗಿ ಎಂದೂ ಕಂಡರಿಯದಂತೆ ಎಡಬಿಡದೆ ಕಾಡುತ್ತಾ ಅಜರಾಮರರಾಗಿ...

ಈಗ,
ಕೇಳಿಸಿಕೊಳ್ಳಿ...ನೀವು ಕೇಳಿಸಿಕೊಳ್ಳಲೇ ಬೇಕು
ಜನಸಾಮಾನ್ಯರನ್ನಾಳುವ ಆಪ್ತ ಅರಸರೇ
ಸಾಮಾನ್ಯರಿಗೆ...ಶ್ರೀಸಾಮಾನ್ಯರಿಗೆ...ಗತಿಯಿಲ್ಲದವರಿಗೆಲ್ಲಾ
ಜನನಾಯಕರೆಂದೆನಿಸಿಕೊಂಡಿರುವ ಅಗ್ರಗಣ್ಯರೇ
ನಿಮ್ಮಿಂದ ಕೂಡಲೇ ಒಂದು ಮುಖ್ಯ, ಬಹಳ ಮುಖ್ಯ ಕಾರ್ಯ ಆಗಬೇಕಾಗಿದೆ
ಇದರಲ್ಲಿ ಖಂಡಿತ ಆಯ್ಕೆಯ ಅವಕಾಶವೂ ಸಹ ನಿಮಗಿರುತ್ತದೆ...ಅದೇನೆಂದರೆ
ಒಂದೋ, ನೀವು ಬಾಪೂ, ಥೆರೆಸಾ ಇವರಿಬ್ಬರ ನೆನಪಿಲ್ಲದಂತೆ, ಜೊತೆಗೆ ಸಮಗ್ರ ಇತಿಹಾಸದ
ಲವಲೇಶವೂ ಉಳಿಸದಂತೆ ಕೂಡಲೇ ದ್ವಂಸಮಾಡಿ.

ಇಲ್ಲಾ,
ಆ ದೇವರ ಕೃಪೆಯಿಂದ ದಯಮಾಡಿ
ಈ ಅಸಹಾಯಕರೆಲ್ಲರ ಜೊತೆಗೆ ಅಮಾಯಕರನ್ನೂ ಸೇರಿಸಿ,
ಇವರೆಲ್ಲರ ಇರುವನ್ನು ಇನ್ನಿಲ್ಲದಂತೆ ನಾಶಮಾಡಿ,
ಮತ್ತೆಂದೂ ಹುಟ್ಟಿಬರಲು ಸಾಧ್ಯವೇ ಇಲ್ಲದಂತೆ
ಒಮ್ಮೆಗೇ ಕೊಚ್ಚಿಹಾಕಿ...

ಬಿಂಬ : 41 - 45

2009-11-01T20:26:00.000-08:00

ಬಿಂಬ - 41
ಕಾವ್ಯವನ್ನರಿಯುವ ಸಂಯಮ ಸಿದ್ಧಿಸಿಕೊಂಡರೆ,
ಬದುಕು ಸವಿಯುವ ಸಾಮರ್ಥ್ಯ ಸಾಧಿಸಿದಂತೆ.

ಬಿಂಬ – 42
ತೀವ್ರ ನಿರಾಸೆಗಳಿಂದ ಪಾರಾಗಬೇಕಾದರೆ,
ಮೊದಲು ನಿರೀಕ್ಷೆಗಳನ್ನು ನಿಯಂತ್ರಿಸಬೇಕು.

ಬಿಂಬ - 43
ನಾವೇ ಹೆಣೆದ ಜೇಡರ ಬಲೆಯಲ್ಲಿ ಸೆರೆಯಾಗಿ
ಹೊರಬರಲಾಗದೆ ಒದ್ದಾಡುವುದು ವಿಪರ್ಯಾಸ.

ಬಿಂಬ – 44
ಜಗತ್ತಿನ ಅತಿ ಶ್ರೇಷ್ಠ ಶ್ರೀಮಂತ,
ನಿತ್ಯ ಸಾಹಿತ್ಯ ಸವಿಯುವ ಸಂತ.

ಬಿಂಬ – 45
ಯಶಸ್ಸನ್ನು ಸವಿಯುವ ಹುಮ್ಮಸ್ಸಿನಂತೆ,
ಸೋಲು ಸ್ವೀಕರಿಸುವ ಸಾಮರ್ಥ್ಯ ಅಗತ್ಯ.

ಹನಿಗಳು - 7

2009-10-28T22:00:00.000-07:00

-1-
ಮುಂಗಾರಿನ
ನಡೆ ಏಕೋ
ಮುಖ್ಯಮಂತ್ರಿಗಳ
ನುಡಿಯಂತೆ
ತೋರುತ್ತಿದೆ
ಅಲ್ಲವೆ?

-2-
ರೈತರ
ಉಚಿತ ವಿದ್ಯುತ್
ಕಡಿತ
ಇಂಧನ ಸಚಿವರ
ಶಾಕ್ ಟ್ರೀಟ್ಮೆಂಟ್
ಖಚಿತ

-3-
ಆರೋಗ್ಯ ಸಚಿವರಿಗೆ
ಸತತ ಅನಾರೋಗ್ಯ
ಪ್ರಚಾರ ಕಾರ್ಯಕ್ಕೆ
ಮಾತ್ರ ತಪ್ಪದವರ
ಆಗಮನದ ಭಾಗ್ಯ

-4-
ಸಚಿವೆಯ ಮನೆಯಲ್ಲಿ
ಕುಡಿತ, ಕುಣಿತ,
ಪಟಾಕಿ ಸಿಡಿತ
ಆಡಳಿತ ಪಕ್ಷದಲ್ಲಿ
ತೀವ್ರ ಭಿನ್ನಮತ

-5-
ಗೃಹಲಕ್ಷ್ಮಿ,
ಭಾಗ್ಯಲಕ್ಷ್ಮಿ,
ಆರೋಗ್ಯಲಕ್ಷ್ಮಿ
ಸದ್ಯ
ಸಂತಾನಲಕ್ಷ್ಮಿ
ವರ ನೀಡಲಿಲ್ಲ
ಮಾನ್ಯ
ಮುಖ್ಯ ಮಂತ್ರಿಗಳು

-6-
ಮಠಮಾನ್ಯರಿಗೆ
ಯಥೇಚ್ಛ
ಅನುದಾನ
ನೆರೆಪೀಡಿತರಿಗೆ
ಕೇವಲ
ಸಾಂತ್ವನ

-7-
ಚುನಾವಣಾ ಸಮರ
ಜಾತಿ, ಮತದ ಲೆಕ್ಕಾಚಾರ
ಹಣದ ಅಹಃಕಾರ
ಮದ, ಮತ್ಸರ,
ಮದ್ಯಸಾರದ
ವಿಕೃತ ಸಾಗರ

-8-
ಗೃಹ ಸಚಿವರಿಗೆ
ಭಾರೀ ಗಂಢಾಂತರ
ಆದರೂ ಅಂತಾರೆ
ಮಧ್ಯೆ ನಿಮ್ಮದೇನ್ರಿ
ಅವಾಂತರ

-9-
ಬಂತು ಬಂತು
ಕರೆಂಟು ಬಂತು
ಕೇವಲ
ಇಂಧನ ಸಚಿವರ
ಕನಸಲ್ಲಿ...

-10-
ರಾಜ್ಯದ ಬೊಕ್ಕಸ
ಖಾಲಿ ಖಾಲಿ
ದಿವಾಳಿ...
ಸಚಿವ ಸಂಪುಟಕ್ಕೆ
ಜಾಲಿ ಜಾಲಿ
ದೀಪಾವಳಿ.

ಮತ್ತೆ ಬರುವನು ಚಂದಿರ - 38

2009-10-25T22:01:00.000-07:00

ಕೀರ್ತಿ, ಪ್ರತಿಷ್ಠೆಗಳ ಹಂಬಲಕೆ
ವಾದಿ-ಸಂವಾದಿಯ ಸಂಹಾರ
ಅಡ್ಡದಾರಿಗೆ ಅನುಮೋದಿಸುತ
ಅಡ್ಡಗತ್ತರಿಗೆ ಸಿಕ್ಕಿದ ಚಂದಿರ

ಸರಳ ಜೀವನದೃಷ್ಟಿಯ ಮರೆತು
ಸ್ವಾರ್ಥ ಆದ್ಯತೆಗಳ ಸೆರೆಯಿಂದ
ಸನಾತನ ಮೌಲ್ಯಗಳ ಪಸರಿಸುತ
ಪ್ರತಿಭೆಯ ಮೆರೆಯುವ ಚಂದಿರ

ನಡಾವಳಿಗಳ ಪರಿಶೀಲನೆ
ನಂಬುಗೆಗಳ ಪರಾಮಾರ್ಶೆ
ವಿದ್ಯಮಾನಗಳ ಅರಿವಿಂದ
ದೀವಟಿಗೆಯಾಗೊ ಚಂದಿರ

ಪಾಶ್ಚಾತ್ಯ ರಾಷ್ಟ್ರಗಳ ವಿಕೃತಿಗಳು
ಜಾಗತೀಕರಣದ ಹಪಹಪಿಕೆಗಳು
ಮೂಲಭೂತವಾದಿಗಳ ಹುನ್ನಾರ
ಹೆಡೆ ಬಿಚ್ಚಿರಲು ಎಚ್ಚರ ಚಂದಿರ

ಅಂತರಂಗದ ಅಳಲುಗಳ
ಚಿಂತನ ಮಂಥನಗಳಿಂದ
ಆತ್ಮಾನುಸಂಧಾನ ಹರಸುತ
ಆತ್ಮೋದ್ಧಾರವಾಗಲಿ ಚಂದಿರ

ವೇದ, ಉಪನಿಷತ್ತುಗಳಾಗಲಿ,
ಇಲ್ಲಾ ಬ್ರಹ್ಮಸೂತ್ರಗಳಾಗಲಿ
ಧಾರ್ಮಿಕ ಶಾಸ್ತ್ರಗಳಿದ್ದರೂ ಸರಿ
ದಾರ್ಶನಿಕನಾಗಿರೊ ಚಂದಿರ

ಬಡವರ ಬಾಳಿಗೆ ಕೊಳ್ಳಿಯನಿಟ್ಟು
ತೋರಿಕೆಯ ಆಚರಣೆಗಳು ಬೇಕೆ
ಆಡಂಬರದ ಪ್ರದರ್ಶನಗಳೆಂಬ
ವಿಕೃತಪೀಡೆ ತೊಲಗಿಸೊ ಚಂದಿರ

ಸಮಕಾಲೀನ ಪ್ರಜ್ಞೆಯೊಂದಿಗೆ
ಇತಿಹಾಸಗಳ ತಿರುವುಗಳಿಂದ
ತಾತ್ಕಾಲಿಕ ತಂತ್ರಗಳ ತೊರೆದು
ಪರಿಸರಪ್ರೇಮಿಯಾಗು ಚಂದಿರ

ಶತಮಾನಗಳ ನಿರ್ಲಕ್ಷದಿಂದಲೆ
ವಿಕೋಪಗಳು ತಾಂಡವವಾಡಿವೆ
ವಿಷಮಸ್ಥತಿಗೆ ತತ್ತರಿಸುವೆ ಬಹಳ
ತುರ್ತುಸುಧಾರಣೆ ಬೇಕು ಚಂದಿರ

ಅಧಿಕಾರದಾಸೆಗೆ ಮರುಳಾಗಿ
ಸಂಪತ್ತಿನ ಸಂಗ್ರಹ ಅನವರತ
ದ್ವೇಷ, ಸೇಡುಗಳು ಹಪಹಪಿಕೆ
ಇವ ದುಷ್ಟನಾಗಿಹನೊ ಚಂದಿರ

ಹನಿಗಳು - 6

2009-10-21T21:48:00.000-07:00

-1-
ಗೆಳತಿ,
ಬಂದೇ ಬರುವೆ
ಎಂದು ಭರವಸೆ ನೀಡಿ.
ಹೀಗೆ ಭಾವಿ ಪತಿಯೊಂದಿಗೆ
ಬರುವುದು ನ್ಯಾಯವೆ?

-2-
ನನ್ನ
ಬಂಗಾರಿ
ಮುಂಗಾರಿನಂಥಾಗಲು
ಕಾರಣವೇನು
ಗುರುವೆ?

-3-
ಗೆಳತಿ
ಅಚ್ಚ ಕನ್ನಡದಾಕಿ
ಫೋರಮ್ ಮಾಲಿಗೆ
ಕಾಲಿಟ್ಟೊಡನೆ ಇವಳಿಗೇಕೊ
ಇಂಗ್ಲೀಷ್ ಶೋಕಿ?

-4-
ಗೆಳತಿ,
ನೀನೇ ನನ್ನ ಸರ್ವಸ್ವ
ಎಂದದ್ದು ನನಗೊ,
ಇಲ್ಲ ನನ್ನ ಸರ್ವಸ್ವಕ್ಕೊ...

-5-
ನಿನ್ನ
ಮಾದಕ ಕಣ್ಣು
ವರ್ಣಿಸಳಸದಳ
ಕ್ಷಮಿಸು ಪರಿಮಳ

-6-
ಮೊದಲ ವಾರ
ಹೊಮ್ಮಿಸುವೆ
ಸುಗಂಧ ಪರಿಮಳ!
ಕೊನೆಯ ವಾರ
ನಿಲ್ಲುವುದೇ ಇಲ್ಲ
ನಿನ್ನ ಜಗಳ

-7-
ನಲ್ಲೆ
ಈಗ ಸಲ್ಲದು
ಬಿಂಕ, ಬಿಗುಮಾನ
ಮತ್ತೆ ಬೇಡಿದರೂ ಸಿಗದು
ಈ ಸುಂದರ ಹವಾಮಾನ

-8-
ಚೆಲುವೆ,
ದೂರದ ಬೆಟ್ಟ ನುಣ್ಣಗೆ
ಎಂದು ಖಚಿತವಾಗಿದ್ದು
ನೀನು ಹತ್ತಿರ ಬಂದಾಗಲೆ...

-9-
ನಲ್ಲ,
ನೀನಿಲ್ಲದೆ
ನಾನಿರಲಾರೆ
ಎಂದು ಹೇಳಿದ್ದು
ಛೆ...ಸಿನಿಮಾ ಹೆಸರೆ?

-10-
ವಸಂತದಲ್ಲಿ
ಕಂಗೊಳಿಸುವ
ಹಸಿರು.
ನಿನ್ನ ಬೆಚ್ಚಗಿನ
ಉಸಿರು...

ಮನುಜರಾಗ ಬನ್ನಿರಿ

2009-10-18T21:51:00.000-07:00

ಕುಲವ ಕಳಚಿ, ಮತವ ಮರೆತು,
ಮಾನವತ್ವ ಮೆರೆಯಿರಿ, ಮನುಜರಾಗ ಬನ್ನಿರಿ.
ನುಡಿಯೆ ತಾಯಿ, ನೆಲೆಯೆ ತಂದೆ,
ಜಗವೆ ನಮ್ಮದೆನ್ನಿರಿ, ಮನುಜರಾಗ ಬನ್ನಿರಿ

ಹಸಿರು ವನ, ಹರಿವ ನದಿ,
ಹಾರೊ ಹಕ್ಕಿ, ನಲಿವ ನವಿಲ ಜೊತೆಗೆ
ಗೆಳೆಯರಾಗಿ ಬನ್ನಿರಿ, ಮನುಜರಾಗ ಬನ್ನಿರಿ.

ಕಾಮ, ಕ್ರೋಧ, ಲೋಭ, ಮೋಹ
ರಾಗ, ದ್ವೇಷ, ಮದ, ಮತ್ಸರದ
ಎಲ್ಲೆಮೀರಿ ಬನ್ನಿರಿ, ಮನುಜರಾಗ ಬನ್ನಿರಿ.

ಕುಲವ ಕಳಚಿ, ಮತವ ಮರೆತು,
ಮಾನವತ್ವ ಮೆರೆಯಿರಿ, ಮನುಜರಾಗ ಬನ್ನಿರಿ.
ನುಡಿಯೆ ತಾಯಿ, ನೆಲೆಯೆ ತಂದೆ
ಜಗವೆ ನಮ್ಮದೆನ್ನಿರಿ, ಮನುಜರಾಗ ಬನ್ನಿರಿ

ಹಿಂಸೆ ನರಕ, ಅಹಿಂಸೆ ಸ್ವರ್ಗ,
ಒಲವೆ ಬದುಕು, ಅರಿವು ಬೆಳಕು
ಶಾಂತಿಧೂತರಾಗಿರಿ, ಮನುಜರಾಗ ಬನ್ನಿರಿ.

ಮೃಗ-ಖಗಗಳ, ಪಶು-ಪಕ್ಷಿಯ,
ಜಲಚರ, ಸಕಲ ಜೀವರಾಶಿಯ ಜೊತೆ
ಒಂದಾಗಿ ಬನ್ನಿರಿ, ಮನುಜರಾಗ ಬನ್ನಿರಿ.

ಕುಲವ ಕಳಚಿ, ಮತವ ಮರೆತು,
ಮಾನವತ್ವ ಮೆರೆಯಿರಿ, ಮನುಜರಾಗ ಬನ್ನಿರಿ.
ನುಡಿಯೆ ತಾಯಿ, ನೆಲೆಯೆ ತಂದೆ
ಜಗವೆ ನಮ್ಮದೆನ್ನಿರಿ, ಮನುಜರಾಗ ಬನ್ನಿರಿ

ಮತ್ತೆ ಬರುವನು ಚಂದಿರ – 37

2009-10-14T22:29:00.000-07:00

ಅನಗತ್ಯ ಹೋಲಿಕೆಯಿಂದ
ಮಿತಿಮೀರಿದ ದುರಾಸೆಗಳು
ಅಸಮಧಾನ, ಅತಂತ್ರತೆ
ದುರಂತ ಬದುಕು ಚಂದಿರ

ರಾಜಕಾರಣದ ನೀಚ ನಡೆ
ಔದ್ಯಮೀಕರದ ದುಷ್ಟಮುಖ
ಭ್ರಷ್ಟಾಚಾರದ ರುದ್ರನರ್ತನ
ಸೊರಗಿದ ಸಮಾನ್ಯ ಚಂದಿರ

ಪವಾಡ ಪುರಾಣಗಳ ವಿವರ
ವಿಶಿಷ್ಟ ಹರಹಿನ ತಿರುವುಗಳ
ತರ್ಕಹೀನ ನಡೆ ನುಡಿಗಳ
ಕತ್ತಳೆಡೆಗೆ ಪಯಣ ಚಂದಿರ

ಸಮಸ್ಯೆಗಳ ಸುಳಿಯೊಳಗೆ
ತತ್ತರಿಸುತ ನರಳುತಿರುವ
ಸಾಧ್ಯತೆಗಳ ಅರಿವಿರದೆ
ಸಾಯುತಿರುವನು ಚಂದಿರ

ಹಗಲುವೇಶ ಹೇರಿಕೊಂಡು
ಹಲವು ಬಣ್ಣ ಲೇಪಿಸುತ್ತಲೇ
ಹಳ್ಳಕ್ಕೆ ತಳ್ಳಿ ಕಾಲ್ಕೀಳುವ
ಪಟಿಂಗನಿವನೊ ಚಂದಿರ

ಆಗಿರುವುದರ ನೆನಪುಗಳಿಲ್ಲ
ಆಗುತ್ತಿರುವುದೂ ಅರಿವಿಲ್ಲ
ಆಗಲಿರುವುದರ ಸುಳಿವಿಲ್ಲ
ಅಗಲುವನೀಗೇ ಚಂದಿರ

ಪ್ರಚಲಿತವಿರುವ ಪರಿಸರ
ವಿಕೋಪವಾದರು ವಿಮುಕ
ತೀರ್ಥಯಾತ್ರೆಗೆ ತಿರುಳಿಲ್ಲ
ತಿಳಿಸಿಕೊಡುವೆಯ ಚಂದಿರ

ಗ್ರಹಿಸುವ ಇಚ್ಛಾಸಕ್ತಿ ತ್ಯಜಿಸುತ
ನಿರೂಪಣೆಯ ಧಾಟಿ ದೂರುತ
ವಿಷಯಾಂತರಕೆ ಮಣೆ ಹಾಕುತ
ವಿಕೋಪಕ್ಕೆ ತುತ್ತಾದ ಚಂದಿರ

ನೀರಸ ಪಯಣಕೆ ಪಡಪಡಿಸಿ
ಪರಿಶ್ರಮದಿಂದಲೆ ಪಲಾಯನ
ಸಂಯಮ ತೊರೆದ ಪರದೇಸಿ
ವಿಲ ವಿಲ ಒದ್ದಾಡುವ ಚಂದಿರ

ಮಿತಿಮೀರಿದ ನಿರೀಕ್ಷೆಗಳಿಂದ
ಸತ್ಯ ಶೋಧನೆಗೆ ಶ್ರಮಪಡದೆ
ನಿರಾಸೆಗಳಿಂದ ವಿಚಲಿತನಾಗಿ
ನಿಶಾಚರನಾದನೊ ಚಂದಿರ

ಕವಿ ಮಹಾಶಯ

2009-10-13T00:46:00.000-07:00

ನಿಜವಾಗಲೂ ಇವ ಅರೆಹುಚ್ಚನಿದ್ದಂತೆ,
ಏನೋ ಹೇಳಲು ಹೋಗಿ, ಏನೋ ಹೇಳುತ್ತಾ,
ಮತ್ತೇನೋ ಸೂಚಿಸುತ್ತಿರುತ್ತಾನೆ...
ಕೆಲವೂಮ್ಮೆ ಅಧಿಕಪ್ರಸಂಗಿಯಾಗುತ್ತಾನೆ.
ಕಿರುಚುತ್ತಾನೆ, ನಗುತ್ತಾನೆ, ಬೈಯುತ್ತಾನೆ,
ಮತ್ತೆ ಒಮ್ಮೆಗೇ ಮೌನವ್ರತ ಆಚರಿಸುತ್ತಾನೆ.
ಏಕಾಂಗಿಯಾಗಿರಲು ಬಯಸುತ್ತಾನೆ,
ಸೂರ್ಯ,ಚಂದ್ರ, ಋತುಗಳಂತೆ ಬದಲಾಗುತ್ತಿರುತ್ತಾನೆ.
ಖಂಡಿತ ಇವನು ಸಾಮಾನ್ಯನಲ್ಲ!
ತನ್ನತ್ತ ಮಕ್ಕಳಂತೆ ಗಮನ ಸೆಳೆಯಲು
ಪಡಪಡಿಸುತ್ತಿರುತ್ತಾನೆ.
ಮತ್ತೆ ಯಾವಾಗಲೂ ನಶೆಯಲ್ಲಿರುತ್ತಾನೆ,
ಕಾವ್ಯದ ನಶೆ, ಮದಿರೆಯ ನಶೆ,
ಮಹಿಳೆ, ಇಲ್ಲಾ ಪ್ರಕೃತಿಯ ನಶೆಯಲ್ಲಿ ಹೀಗೇ...
ಪ್ರೀತಿಯಲ್ಲಿ ಸೋತ ಪ್ರಿಯಕರನಾಗಿದ್ದರೆ
ಅಲ್ಲಿಗೆ ಮುಗಿದಂತೆ ಕತೆ.
ನೆಡೆ-ನುಡಿ, ಯೋಚಾನಾ ಕ್ರಮ
ಎಲ್ಲವೂ ತೀರಾ ಭಿನ್ನ-ವಿಭಿನ್ನ.
ಬಿಡಿ ಎಲ್ಲರಂತಿರಲು ಇವನಿಗೆ ಕಷ್ಟಸಾಧ್ಯ!
ಓ ದೇವರೆ!
ಎಲ್ಲದಕ್ಕೂ ಮೂಗು ತೂರಿಸುತ್ತಾನೆ,
ಆದರೂ, ಇವ ಸೂಕ್ಷಾತಿಸೂಕ್ಷ್ಮ ಪ್ರಾಣಿ.
ಕೆಲವೂಮ್ಮೆ ಯಾವುದಕ್ಕೂ ತಲೆಕೆಡಿಸಿಕೊಳ್ಳದಂತೆ
ಸುಮ್ಮನೆ ಗುಮ್ಮನಂತೆ ಇದ್ದುಬಿಡುತ್ತಾನೆ.
ಪ್ರಖರ ಪಂಡಿತನಂತೆ ಯಾವ ವಿಷಯವಾದರೂ ಸರಿಯೆ
ಭೂಮಿಯ ಮೇಲೆ, ಆಗಸದ ಕೆಳಗೆ, ತಿಳಿಯದ ಭ್ರಹ್ಮಾಂಡವಾದರೂ ಸರಿ
ಏನು ಬೇಕಾದರು ಬರೆಯಬಲ್ಲ ಭೂಪ!
ನೆನಪಿರಲಿ, ಇವ ಪುಂಡ, ಪುಢಾರಿಯೂ ಆಗಬಲ್ಲ ಚಾಣಾಕ್ಷ.
ಇವನು ವಿಪರೀತ ದ್ವೇಷಿಸುವವರೆಂದರೆ,
ಜಡ ಆಡಳಿತ ವರ್ಗದವರು, ಭ್ರಷ್ಟಾಚಾರಿಗಳು, ಅವಕಾಶವಾದಿಗಳು,
ಆಗರ್ಭ ಶ್ರೀಮಂತರು ಮತ್ತು ನೀಚ ರಾಜಕಾರಣಿಗಳು!
ಹಾಗೇ ಬಡತನವೆಂದರೆ ಇವನಿಗೆ ತುಂಬಾ ಆಪ್ಯಾಯಮಾನ
ಅಸಹಾಯಕರನ್ನು ಕಂಡರೆ ಎಲ್ಲಿಲ್ಲದ ಒಲವು.
ಇನ್ನು ಇವನನ್ನು ಸುಧಾರಿಸುವುದಂತೂ ಹಗಲುಗನಸು;
ಈ ಕ್ರಿಮಿಯನ್ನು ವರ್ಣಿಸಳಸದಳ!
ದಪ್ಪ ಅಕ್ಷರಗಳಲ್ಲಿ ಬರೆದಿಡಿ...
ಹೀಗಿರುವುದೆಂದರೆ,
ಇವನಿಗೆ ನಿಸ್ಸಂಶಯವಾಗಿ ತುಂಬಾ...ತುಂಬಾ ಇಷ್ಟ!

ಮತ್ತೆ ಬರುವನು ಚಂದಿರ - 36

2009-10-12T01:28:00.000-07:00

ದಿವ್ಯಮಿಲನಕೆ ಸಕಲ ಸಿದ್ಧತೆಯಿಂದ
ಕಾತುರದಿ ಕಾಯುತ್ತಿರುವಾಗ
ತಡವಾಗುತ್ತೆಂದು ಪೋನಾಯಿಸಿ
ರಸಭಂಗ ಮಾಡಿದ ಚಂದಿರ

ತಡವಾದರೂ ಸರಿಯೆ
ಬಿಡದೆ ಕಾಡುವ ಮಡದಿಗೆ
ತಲೆನೋವಿನ ನೆಪವೂಡ್ಡಿ
ಪ್ರಸಿದ್ಧ ನಟನಾದ ಚಂದಿರ

ಸವಿಸವಿ ಮಾತಿಂದ
ಸೆಳೆಯಲೆತ್ನಿಸಿದಾಗ
ಮನೆ ಸ್ವಚ್ಛವಾಗಿಲ್ಲವೆಂದು
ಅಬ್ಬರಿಸುವನಲ್ಲಾ ಚಂದಿರ

ಸಂತೃಪ್ತಿಯ ಬಯಸುತ್ತ
ಇಷ್ಟದ ಅಡುಗೆ ಬಡಿಸಿದರೆ
ಆನಂದದಿಂದ ಆಸ್ವಾಧಿಸಿ
ಮಗುವಂತೆ ಮಲಗಿದ ಚಂದಿರ

ಸುಂದರವಾಗಿ ಅಲಂಕಾರಗೊಂಡು
ಆಕರ್ಷಿಸಲೆತ್ನಿಸಿದರೆ ಅಪಶಕುನವೆಂದು
ನಯವಾಗಿ ಜರಿದು ಜಾರಿಕೊಂಡ
ಚತುರ ಚೆಲುವಾಂಗ ಚಂದಿರ

ಇಳಿಸಂಜೆ ತಂಗಾಳಿಯಲ್ಲಿ
ಹಾಯಾಗಿ ಸುತ್ತೋಣವೆಂದರೆ
ಏಕೊ ಸುಸ್ತಾಗುತ್ತಿದೆ ಎಂದು
ಸುಮ್ಮನಾದನಲ್ಲಾ ಚಂದಿರ

ಬರುವ ಶನಿವಾರ ಸಿನಿಮಾ
ನೋಡಿ ಬರೋಣ ಎಂದರೆ
ಸಿಡಿಮಿಡಿಗೊಂಡು ಸಿಟ್ಟಾಗಿ
ಚೀರಿಕೊಂಡನೇಕೆ ಚಂದಿರ

ಭಾನುವಾರವಾದರೂ ವಿಶ್ರಾಂತಿ
ಪಡೆಯಿರೆಂದು ವಿನಂತಿಸಿಕೊಂಡರೆ
ಗೆಳೆಯರಿಗೆ ಕರೆಮಾಡಿ ಕೂಡಲೆ
ಕಾಲ್ತೆಗೆಯುತ್ತಾನಲ್ಲಾ ಚಂದಿರ

ನಕಾರಾತ್ಮಕ ಪ್ರತಿಕ್ರಿಯಿಂದ
ಬೇಸತ್ತು ತವರುಮನೆಗೋದರೆ
ತಬ್ಬಲಿಯಂತೆ ಗೋಗರೆದು
ಕೂಡಲೆ ಬರಹೇಳಿದ ಚಂದಿರ

ಕ್ಷಣದಲೆ ಅಪ್ಪಿಕೊಂಡು ಆತುರುದಿ
ಮಿಲನಕೆ ಹಾತೊರೆದು ನಿಂತಾಗ
ತಿಂಗಳಾಯಿತೆಂದರೆ ತಬ್ಬಿಬ್ಬಾಗಿ
ತಣ್ಣಗಾದ ಬಡಪಾಯಿ ಚಂದಿರ

ಸಾಲು - 8

2009-10-09T04:25:00.000-07:00

- 1 -
ತೆರಿಗೆ ಕಟ್ಟಿ, ಓಟೂ ಒತ್ತಿ
ಸುತ್ತಿ ಸುತ್ತಿ ಸಲಾಂ ಹೊಡೆದೂ
ಲಂಚ ಕೊಡೊ ಗುಗ್ಗೂಸ್ ಎಂದು ಗುದ್ದಿಸಿಕೊಂಡ್ರೂ...
ತೆಪ್ಪಗಿರೊ ಅಸಹಾಯಕ ಪ್ರಜೆಗಳ ದುಸ್ಥಿತಿ,
ಪ್ರಜಾಪ್ರಭುತ್ವಕ್ಕೆ ದೊಡ್ಡ ಅಪಮಾನ!

- 2 -
ಜನಸೇವೆಯ ಹೆಸರಲ್ಲಿ
ನಲವತ್ತೆಂಟು ಕೋಟಿ ರೂಗಳ
ಸುಂದರ ವಜ್ರದ ಸುವರ್ಣ ಕಿರೀಟ
ದೂರದ ತಿರುಪತಿ ತಿಮ್ಮಪ್ಪನಿಗೆ!
ಊರಲ್ಲೇ ಭೀಕರ ನೆರೆಯಿಂದ ತತ್ತರಿಸಿ,
ಕೂಳಿಗೂ, ಸೂರಿಗೂ ಪರದಾಡುವ ಜನರ
ಧಾರುಣ ಪರಿಸ್ಥಿತಿಯಲ್ಲೂ ಮನಕರಗದ
ಅಮಾನವೀಯ ಗಣ್ಯ ನಾಯಕರ ನಡೆ
ಬಹಳ ಅಸಹನೀಯವಾದುದು.

- 3 -
ಪ್ರಜಾಸೇವೆ ಪರಮಾತ್ಮನ ಸೇವೆಯೆಂದು
ಪಢಪಢಿಸಿ ತೊದಲುತ್ತಾ...ಬೊಗಳುತ್ತಾ...
ಅಸಹಾಯಕ ಪ್ರಜೆಗಳ ಪೀಡಿಸಿ, ಹಿಂಸಿಸಿ
ಪ್ರಭುಗಳಾಗುವ ವಿಕೃತ ಸಾಧನೆಯಿಂದ...
ಸಂತೃಪ್ತಿ ಸಿದ್ಧಿಸಿಕೊಳ್ಳಲು ಸಾಧ್ಯವೆ?

- 4 -
ಜಾತಿ, ಮತ, ನಾಡು, ನುಡಿ, ದೇಶ
ಇವೆಲ್ಲವನ್ನೂ ಮೀರಿದ ಪಯಣ...
ಪ್ರಕೃತಿಯೊಂದಿಗೆ ಸಕಲ ಜೀವರಾಶಿಗಳ ಸಂರಕ್ಷಣೆ,
ಸಂಕಷ್ಟದಲ್ಲಿ ಸಿಲುಕಿದ ಸಹಪಯಣಿಗರಿಗೆ
ಸೂಕ್ತ ಸ್ಪಂದನೆ, ಸಾಧ್ಯವಾದ ನೆರವಿಂದ
ಮಾನವತ್ವ ಮೆರೆಯುವುದೆ ಮಾನವನ
ಧ್ಯೇಯೋದ್ಧೇಶ, ಸಾಧನೆ, ಸಾರ್ಥಕ.

ಕರುಣೆಯಿರಲಿ

2009-10-08T04:30:00.000-07:00

ಕೊಚ್ಚಿಹೋಗಿದ್ದು;
ಬರಿ ಮನೆಗಳಲ್ಲಾ, ಮನದ ಆಸೆಗಳು
ಹೂತುಹೋಗಿದ್ದು;
ಬರಿ ದವಸಧಾನ್ಯಗಳಲ್ಲ, ಪುಟಿದ ಕನಸುಗಳು
ಕರಗಿಹೋಗಿದ್ದು;
ಬರಿ ಉಪ್ಪುಸಕ್ಕರೆಯಲ್ಲ, ಸವಿ ನೆನಪುಗಳು
ಸಿಡಿದುಬಿದ್ದಿದ್ದು;
ಬರಿ ಮನೆಯ ಮಾಳಿಗೆಯಲ್ಲ, ನಂಬಿಕೆಗಳು
ಉರುಳಿಬಿದ್ದಿದ್ದು;
ಬರಿ ನಾಲ್ಕುಗೋಡೆಗಳಲ್ಲ, ದಶಕಗಳ ನೆರಳು
ಉಕ್ಕಿಹರಿದದ್ದು;
ಬರಿ ಕಣ್ಣೀರಲ್ಲ, ನಗುವುಂಡ ನೆನ್ನೆಗಳು
ಚದುರಿಬಿದ್ದಿದ್ದು;
ಬರಿ ಪಾತ್ರೆಗಳಲ್ಲ, ಸಂತಸದ ನಾಳೆಗಳು
ಅಳಿಸಿಹೋಗಿದ್ದು;
ಬರಿ ರಂಗೋಲೆಗಳಲ್ಲ, ರಂಗಿನ ಹಬ್ಬಗಳು
ತೋಯ್ದುಹೋಗಿದ್ದು;
ಬರಿ ತೊಟ್ಟವಸ್ತ್ರಗಳಲ್ಲ, ಎಲ್ಲ ಶುಭಕಾರ್ಯಗಳು
ಮಾಯವಾಗಿದ್ದು;
ಬರಿ ಅಂಕಿಅಂಶಗಳಲ್ಲ, ಬದುಕಿನ ಭದ್ರತೆಗಳು

ಮತ್ತೆ ಬರುವನು ಚಂದಿರ - 35

2009-09-25T21:23:00.000-07:00

ದೂರ ದೂರ ದೂರ ತೀರ
ಹೊತ್ತು ಹೊತ್ತು ತಂದ ಭಾರ
ತತ್ತರಿಸಿದೆ ತನು ತಡವರಸಿ
ತುಸುವಿರಾಮ ನೀಡು ಚಂದಿರ

ತಿರುವುಗಳಿಗೆ ತಿರುಳು ಮರುಳು
ಏರಿಳಿತಕೆ ಎದೆಯುಸಿರು ಕಟ್ಟಿದೆ
ಕಾರ್ಮೋಡದ ಕಗ್ಗತ್ತಲಲ್ಲಿ ತಡಕಿ
ಕಾಡ್ಗಿಚ್ಚಿಗೆ ಸಿಕ್ಕಿಕೊಂಡೆ ಚಂದಿರ

ಎಳೆಬಿಸಿಲಿಗೆ ಮೈಯೊಡ್ಡಿದಾಗ
ಇಬ್ಬನಿಯಲಿ ಸುಳಿದಾಡುವಾಗ
ಎಳೆಗಳಲ್ಲಿ ಹೊಳೆವ ಮುತ್ತುಗಳ
ಕಾಣೊ ಅದೃಷ್ಟ ನೀಡು ಚಂದಿರ

ಸುರಿವ ಮಳೆಯ ರಾಗದಲ್ಲಿ
ತೊಟ್ಟಿಕ್ಕುವ ಹನಿಗಳಿಂಚರ
ಮಾಳಿಗೆ ಮೃದಂಗವಾದನಕೆ
ತೇಲಿತೆನ್ನ ಮನವು ಚಂದಿರ

ಹಸಿರನೊತ್ತ ಮರದ ತುದಿಗೆ
ಹಳದಿ ಚಿಟ್ಟೆಯಿಡಲು ಚುಂಬನ
ನಾಚಿ ನಡೆದಳೇಕೊ ಯುವತಿ
ಇನಿಯನ ನೆನಪಾಗಿ ಚಂದಿರ

ರಂಗೋಲೆಯಿಡುವ ಚಿಟ್ಟೆಗೆಳು
ಯೌವನದಿ ಮೈ ಮರೆತಂತಿವೆ
ದುಂಬಿ ಕುಣಿದು ಬರಲು ಅತ್ತ
ತಳಮಳಗೊಂಡವೇಕೊ ಚಂದಿರ

ಹಕ್ಕಿಯೊಂದು ಆಗಿನಿಂದ
ವಿಷಾದಗೀತೆ ಹಾಡುತಿರಲು
ಸಂಗೀತಗಾರನಿಗೇಕೊ ಚಿಂತೆ
ಅದ್ಯಾವ ರಾಗವೆಂದು ಚಂದಿರ

ಹಬ್ಬರದ ಹಬ್ಬಗಳೆಲ್ಲವೂ
ಹಣದುಬ್ಬರಕೆ ತತ್ತರಿಸಿವೆ
ಸರಳ ಪಥದ ಮಂತ್ರವನ್ನು
ಬಿಡದೆ ಜಪಿಸುತಿವೆ ಚಂದಿರ

ದಿನದ ಮೂರು ಹೊತ್ತಿನಲ್ಲೂ
ಧಾರಾವಹಿಗಳ ಗುಂಗಿನಲ್ಲಿ
ಗಂಗೆ ಗಂಡ ತೊರೆದನವಳ
ಕುರುಡಿಯನರಸಿ ಚಂದಿರ

ಪ್ರತಿಭಾನ್ವೇಷಣೆಯೆಂಬ ಹೆಸರಿನಲ್ಲಿ
ಒತ್ತಡದ ಅಬ್ಬರಕೆ ಮಣಿದ ಮುಗ್ಧರು
ಕಮರಿಹೋದವು ಎಳೆ ಹೂಗಳಲ್ಲೆ
ತುಸು ಬೆಳಕು ತೋರೊ ಚಂದಿರ

ಮತ್ತೆ ಬರುವನು ಚಂದಿರ - 34

2009-09-24T23:17:00.000-07:00

ನಿರ್ಣಯಗಳೆಲ್ಲವೂ ವೈಜ್ಞಾನಿಕ
ದೃಷ್ಟಿಯಿಂದ ನಿರ್ಧರಿಸಿದಾಗ
ಕೃತಕ ಜಗದ ನಿರ್ಮಾಣವಷ್ಟೆ
ಸಾಧಿಸುವುದಲ್ಲವೆ ಚಂದಿರ

ಅಗಾಧತೆಯ ಅನುಭಾವದಿಂದ
ಅನನ್ಯ ಅನುಭೂತಿ ಸಿದ್ಧಿಸುತ್ತದೆ
ಸೃಷ್ಟಿಸಿದ ಅಮೂರ್ತ ಸಂಕೋಲೆ
ಕಡಿದು ಹೊರನುಗ್ಗಿಲು ಚಂದಿರ

ಇಡೀ ಜಗತ್ತೇ ನಮ್ಮದಾಗುವ
ಸಾಧ್ಯತೆಗಳು ಅಗಾಧವಾಗಿರೆ
ಪುಟ್ಟ ಮನೆಗೇಕೆ ಸೆರೆಯಾಗಲು
ಹಾತೊರೆಯುವೆ ಚಂದಿರ

ಬದುಕೊಂದು ನಿರಂತರ ಜೂಜಾಟ
ಎಲ್ಲರೂ ಆಡಲೇಬೇಕಾದ ಸನ್ನಿವೇಶ
ಆಯ್ಕೆಗಳಿಲ್ಲದ ಅನಿವಾರ್ಯ ಪರಿಸ್ಧಿತಿ
ಆತ್ಮಸ್ಥೈರ್ಯದಿಂದ ಮುನ್ನಡೆ ಚಂದಿರ

ಸದಾ ಅಮಲಿನಲ್ಲಿರು ಆಪ್ತನೆ
ಕಾವ್ಯ, ಸಂಗೀತ ಇಲ್ಲಾ ಸಖಿ
ಯಾವುದರ ಸಂಗವಾದರು ಸರಿ
ಪಾನಮತ್ತನಾದರೂ ಸರಿ ಚಂದಿರ

ಜ್ಞಾನವಂತ ತನ್ನ ಪರಿಜ್ಞಾನವನ್ನು
ಶ್ರೀಸಾಮಾನ್ಯರಿಗೆ ತಲುಪಿಸದೆ
ಸ್ವಾರ್ಥಸಾಧನೆಗೆ ಬಳಸಿಕೊಂಡರೆ
ಆತ ಮೂರ್ಖನಿಗೆ ಭಿನ್ನವೆ ಚಂದಿರ

ಬುದ್ಧಿವಂತಿಕೆ, ಬಲವಾದ ಭಾಷೆ
ಬಳಸುತ್ತಾ ತಮ್ಮ ಶ್ರೇಷ್ಠತೆಯ
ಮೆರೆಯುವವ ಕ್ರಮೇಣ ಜನರಿಂದ
ದೂರಾಗಿ ಏಕಾಂಗಿ ನರಳುವ ಚಂದಿರ

ಸ್ವಧರ್ಮವನ್ನು ನಿಂಧಿಸುತ್ತಾ
ಕೇವಲ ಅನ್ಯಧರ್ಮದೊಲಿತನ್ನು
ಹೊಗಳುವ ಚನ್ನಿಗ ಮನುಕುಲದ
ಹಿತಚಿಂತಕನೆ ಹೇಳೊ ಚಂದಿರ

ಅನ್ಯಧರ್ಮಗಳ ಸತತ ನಿಂಧಿಸುತ್ತ
ಸ್ವಧರ್ಮ ಲೋಪದೋಷಗಳೆಡೆಗೆ
ನಿರ್ಲಿಪ್ತ ನೋಟದಿ ಹುಸಿನಗೆ ಬೀರುವವ
ಮನುಕಲ ವಿರೋಧಿಯಲ್ಲವೆ ಚಂದಿರ

ಯಾವದೇ ನಿಬಂಧನೆ, ನಿರ್ಬಂಧಗಳು
ಇಲ್ಲದೆಯೆ ಎಲ್ಲರನ್ನೂ ಒಪ್ಪಿಕೊಳ್ಳುವುದು
ನಿಜವಾದ ಮುಕ್ತ, ಆಪ್ತ, ಅನನ್ಯ ಪ್ರೀತಿ
ಮಾನವತ್ವದ ಜಗಜ್ಯೋತಿಯಲ್ಲವೆ ಚಂದಿರ

ಒಂದೆರಡು ಮಾತು

2009-09-21T22:43:00.000-07:00

ನಾ ನಡೆದ ಹಾದಿಯಲಿ
ತಿರುವುಗಳು, ಏರಿಳಿತಗಳು
ಬೆಟ್ಟಗುಡ್ಡಗಳು, ದಟ್ಟಕಾಡುಗಳು,

ಪಚ್ಚೆಪೈರುಗಳು, ನದಿತೀರಗಳು
ಬಯಲುಸೀಮೆ, ಬಾಯ್ಬಿಟ್ಟ ನೆಲ
ಕಲ್ಲು-ಮುಳ್ಳುಗಳೂ ಸಹ
ಚುಚ್ಚಿದ್ದು, ಸವರಿದ್ದು, ತಾಗಿದ್ದು, ಎಡವಿ ಮುಗ್ಗರಿಸಿದ್ದು
ಎಷ್ಟೋ ಲೆಕ್ಕವಿಲ್ಲದಷ್ಟು...

ಹಾದೀಲಿ ಎದುರುಗೊಂಡವರು
ಹುಸಿನಗೆ ಬೀರಿ ಪಕ್ಕ ಸರಿದವರು
ಎತ್ತರದಿಂದ ಕೂಗಿ ಆಬ್ಬರಿಸಿದವರು
ಆಳದಲೆಲ್ಲೋ ಕೈ ಹಿಡಿದೆಬ್ಬಿಸಿ
ಸಾಂತ್ವನ ನುಡಿದವರು
ಜೊತೆಜೊತೆಗೆ ಹೆಜ್ಜೆಯಿಟ್ಟವರು
ಹಾದಿ ಕ್ರಮಿಸಿದ ಹಾಗೆ
ಜೊತೆಗಾರರಾದವರು...

ಹಾದಿಯ ಎರಡೂಬದಿ
ಬಣ್ಣ ಬಣ್ಣಗಳ ಕಡೆಗೆಣಿಸಿ
ಪಯಣದಲಿ ಸಂಯಮದಿ
ಅಡ್ಡದಾರಿಯ ದಿಕ್ಕರಿಸಿ ಮುನ್ನಡೆದು
ಸಾಧಿಸಿದ್ದೇನೊ ನಾನರಿಯೆ
ಆದರೂ, ಸಂತೃಪ್ತಿ
ಸಿದ್ಧಿಸಿದ್ದಂತೂ ಸರ್ವಸತ್ಯ

ಎಲ್ಲವೂ ನೆನಪಿಲ್ಲ ಕ್ಷಮಿಸಿ
ವಯಸ್ಸಾಯಿತೆಂದು ನೆಪವಲ್ಲ
ಕೆಲವು ಮರೆಯ ಬೇಕೆಂದಿರುವೆ
ಆದರೂ ಸೋತಿರುವೆ
ಮತ್ತೆ ಕೆಲವನ್ನು ಮರೆಯಲೇಕೊ
ನನಗೆ ಖಂಡಿತ ಇಷ್ಟವಿಲ್ಲ
ಉಳಿದೆರಡು ದಿನಗಳಿಗೆ ಜೊತೆಯಾಗಿ
ಆ ಸವಿ ನೆನಪುಗಳಾದರೂ
ಬೇಕಲ್ಲ...

ಹಾಯ್ಕು - 7

2009-09-15T22:46:00.000-07:00

ಗೆರೆಗಳು –
ಕಟ್ಟಬಹುದು, ಇಲ್ಲಾ ಕಡಿಯಲೂಬಹುದು
ತಮ್ಮ ಭವಿಷ್ಯವನ್ನು...

ಹಾಯ್ಕು - 6

2009-09-15T22:44:00.000-07:00

ನೋವು, ನಲಿವುಗಳೊಂದಿದ
ರಾಗಗಳು –
ಆಲಿಸಿದವರು ಅತಿವಿರಳ...

ಹಾಯ್ಕು - 5

2009-09-14T21:51:00.000-07:00

ಬೆಲೆಯುಬ್ಬರ –
ಅಬ್ಬರದ ಹೇಳಿಕೆಗಳು ಉರಿಯುತ್ತಿವೆ
ಕಾಡ್ಗಿಚ್ಚಿನಂತೆ...

ಹಾಯ್ಕು - 4

2009-09-14T21:49:00.000-07:00

ವಸಂತ –
ಹೊಂಬಿಸಿಲಿಂದ ಸೂರ್ಯ ಕರಗಿಸುತ್ತಾನೆ
ಎಲ್ಲರ ನೋವನ್ನು...

ಹಾಯ್ಕು - 3

2009-09-13T22:02:00.002-07:00

ಹಾವು,
ಚುರುಕಾಗಿದೆ ತನ್ನ ಪೊರೆ ಕಳಚಿ.
ಮುಖವಾಡ ಹೊತ್ತವರು ಕಂಡು ಬೆಚ್ಚಿಬಿದ್ದರು...

ಹಾಯ್ಕು - 2

2009-09-13T21:56:00.000-07:00

ಮಾಗಿಯಲ್ಲಿ,
ಬೆತ್ತಲಾದ ಮರಗಳು ಸಂಕೋಚ ತೊರೆದು,
ಸಂತಾಪ ಸೂಚಿಸುತ್ತಿವೆ...

ಹಾಯ್ಕು - 1

2009-09-11T22:55:00.000-07:00

ಸುದೀರ್ಘ ಮಾಗಿ –
ಮರಗಳು ಎಲೆಗಳನ್ನು ಕಳಚುತ್ತಿವೆ
ಶುಭಯಾತ್ರೆ ಕೋರುತ್ತಾ...

ಕಾಡು...

2009-09-10T01:02:00.000-07:00

ಕಾಡು...
ಅದರೂ ಇಲ್ಲಿ,
ಕಂಗೊಳಿಸುವ ಹಸಿರಿಲ್ಲ,
ವಗರಾದ ಚಿಗುರಿಲ್ಲ
ಮಾದಕ ಹೂವುಗಳಿಲ್ಲ,
ರುಚಿಯಾದ ಹಣ್ಣಿಲ್ಲ

ಕಾಡು...
ಆದರೂ ಇಲ್ಲಿ
ನಿರ್ಮಲ ನೀರಿಲ್ಲ,
ತಂಪಾದ ನೆರಳಿಲ್ಲ
ತಂಗಾಳಿ ಬೀಸುವುದಿಲ್ಲ
ಜಲಧಾರೆಗಳ ಸದ್ದಿಲ್ಲ

ಕಾಡು...
ಆದರೂ ಇಲ್ಲಿ
ಹಕ್ಕಿಗಳಿಂಚರವಿಲ್ಲ
ವನ್ಯಮೃಗಗಳು ಕಾಣುವುದಿಲ್ಲ
ಹುಳ-ಹುಪ್ಪಟೆಗಳು ಹಾಡುವುದಿಲ್ಲ
ರಂಗಿನ ಚಿಟ್ಟೆಗಳ ಸಡಗರವಿಲ್ಲ

ಕಾಡು...
ಆದರೂ ಇಲ್ಲಿ
ಮುಂಜಾವಿನ ಮಂಜಿಲ್ಲ
ಮುಸ್ಸಂಜೆ ಬೆಳಕಿನ ಸವಿಯಿಲ್ಲ
ಮೋಡಗಳ ಮೆರವಣಿಗೆಯಿಲ್ಲ
ಮಳೆಯ ಸುಳಿವಿಲ್ಲ

ಕಾಡು...
ಆದರೂ ಇಲ್ಲಿ
ಬೆಟ್ಟಗುಡ್ಡಗಳಿಲ್ಲ
ಆಳದ ಕಣಿವೆಗಳಿಲ್ಲ
ಹೆಮ್ಮರಗಳ ಗುರುತಿಲ್ಲ
ನಲಿದಾಡುವ ನವಿಲುಗಳಿಲ್ಲ

ಮತ್ತೆ ಬರುವನು ಚಂದಿರ - 33

2009-09-09T00:46:00.000-07:00

ಆಸೆ, ಆಶಯಗಳಿಗೆ ಪೂರಕವಾಗಿ
ಅರ್ಹತೆ, ಸಾಮರ್ಥ್ಯ, ಸಂಯಮಗಳ
ಸಿದ್ಧಿಸಿಕೊಂಡರೆ ಅನನ್ಯ ಅವಕಾಶಗಳು
ತಡವಾದರೂ ತಾಗುವವು ಚಂದಿರ

ವೃತ್ತಿಯೊಳಗೆ ಮೇಲು-ಕೀಳೆಂದು
ಭಾವಿಸುತ್ತಾ, ಬಿಂಬಿಸಿಕೊಳ್ಳುವವ
ವಿಕೃತ ಮನಸಿನ ಮತಿಹೀನನಷ್ಟೆ
ಜಗದ ಮಾನದಂಡವಲ್ಲ ಚಂದಿರ

ಮಹತ್ತರ ಮಹತ್ವಾಕಾಂಕ್ಷೆಯಿಂದ
ಪೂರಕ ಪರಿಶ್ರಮದೊಂದಿಗೆ ಕಾರ್ಯ
ಪ್ರವೃತ್ತರಾದಾಗ ಸಾಧಿಸುವ ಸಾಧ್ಯತೆಗೆ
ಹತ್ತಿರವಾಗುವುದು ನಿಶ್ಚಿತ ಚಂದಿರ

ನಂಬಿಕೆಯೆಂಬುದು ಅಸಹಾಯಕರಿಗೆ
ಅಂಧಃಕಾರದಲ್ಲಿರುವಾಗ ಸಂತೈಸುವ,
ಹಣತೆ ಹಿಡಿದು ಹಾದಿ ತೋರುವ
ಏಕೈಕ ಆಪ್ತ ಗೆಳೆಯನಲ್ಲವೆ ಚಂದಿರ

ದೇಶ ಕಾಲದ ಸಿಡಿಲು ಮಿಂಚಿಗೆ
ಪರಿಶುದ್ಧ ಪ್ರಾಮಾಣಿಕತೆ ಬಳಲಿ
ಮೂರ್ಖತನದ ಪರಮಾವಧಿಗೇರಿ
ಅಬ್ಬರದಿಂದ ನರ್ತಿಸುತ್ತಿದೆ ಚಂದಿರ

ಅಮೂರ್ತ ನರಕದ, ಮೂರ್ತ ಪ್ರತಿರೂಪಗಳ
ಕಡೆಗೆಣಿಸಿ ಕೇಡಿನ ಕಾರ್ಯದಲ್ಲಿ ಮೈಮರೆತು
ಮಗ್ನರಾದ ಸನ್ನಿವೇಶದಲ್ಲಿ ಪ್ರಕೃತಿಯ ವಿಕೋಪ
ರುದ್ರತಾಂಡವವಾಡುವುದು ಖಚಿತ ಚಂದಿರ

ಸುಭದ್ರ, ಸುಖಕರ ಮತ್ತು ಸಂತಸದ
ಭವಿಷ್ಯಕ್ಕಾಗಿ ಸುಂದರ ವರ್ತಮಾನ
ವ್ಯರ್ಥಮಾಡುವುದು ಶುದ್ಥ ಮೂರ್ಖತನ
ಎಂದು ಕಿವಿಮಾತು ಹೇಳೊ ಚಂದಿರ

ಹಣವೆಂಬುದು ಎಲ್ಲರಿಗೂ ಅತ್ಯಗತ್ಯ
ಆದರೆ, ಅದೆಷ್ಟು ಎಂಬುದಾಗಿ ಸ್ಪಷ್ಟ
ತಿಳುವಳಿಕೆಯಿಂದ ಬದ್ಧನಾಗಿರದಿದ್ದರೆ
ಬದುಕು ಜಾರುವುದು ನಿಶ್ಚಿತ ಚಂದಿರ

ತಂತ್ರಜ್ಞಾನದ ಅಗತ್ಯತೆ ನಿಯಮಿತ,
ಯಾವುದು, ಏಕೆ, ಹೇಗೆ, ಯಾವಾಗ
ಎಂಬುದರ ಸ್ಪಷ್ಟ ಅರಿವು ಇರದಿದ್ದರೆ
ಮನುಕುಲಕ್ಕೆ ಕೇಡು ಖಚಿತ ಚಂದಿರ

ಅಸಹಾಯಕರಿಗೆ, ಅಸಮರ್ಥರಿಗೆ
ನೆರವಾಗುವ ಸಾಮರ್ಥ್ಯವಿದ್ದರೂ
ಸ್ವಾರ್ಥ ಸಾಧನೆಗೆ ಮಾಡದಿರವುದು
ವಿಕೃತ ನಡವಳಿಕೆ ಅಲ್ಲವೆ ಚಂದಿರ

ಮತ್ತೆ ಬರುವನು ಚಂದಿರ - 32

2009-09-08T00:22:00.001-07:00

ಸಾಧನೆಯ ತುದಿಗೇರುವುದು
ಕೆಲವು ಕ್ಷೇತ್ರಗಳಿಗೇ ಸೀಮಿತ
ಸರ್ವತೋಮುಖ ಸಾಧನೆಯು
ವ್ಯಕ್ತಗಳಿಗೆ ಸಾಧ್ಯವೆ ಚಂದಿರ

ಕೋಪವೆಂಬ ಧೂರ್ತನನ್ನು
ಹಿಡಿತದಲ್ಲಿಡು ಗೆಳೆಯನೆ
ಸಡಿಲಿಸಿದರೆ ಸಿಡಿಯುವನು
ಸಹಿಸಲಾರನು ಚಂದಿರ

ಪ್ರಾಮಾಣಿಕತೆಯ ಪಠಿಸುವ
ಪಡಪಡಿಸುತ ಮುಕ್ಕುತಿರುವ
ಬಡವ ಬಲ್ಲಿದರನೂ ಬಿಡದವ
ಬಲಿಯಾದನೊಮ್ಮೆಗೆ ಚಂದಿರ

ನ್ಯೂನತೆಗಳು ಮನುಜಗೆ
ಸಹಜವಾಗಿ ಸಿದ್ಧಿಸಿದ್ದರೂ
ನಿಯಂತ್ರಿಸುವ ಸಾಮರ್ಥ್ಯ
ಸಹ ನಮಗೇ ಬಿಟ್ಟ ಚಂದಿರ

ನಾವು ಮಾನವೀಯತೆಯೊಂದಿಗೆ
ಅತಿ ಸಾಮಾನ್ಯನಾಗಿ ಬದುಕುವುದು
ಸಹ ನಮ್ಮ ಅತಿ ಮಹತ್ತರ ಸಾಧನೆ
ಇದಕೆ ಮಾದರಿಯಾಗಿರುವ ಚಂದಿರ

ಬದುಕಿಗೆ ಅತಿಮುಖ್ಯವಾಗಿರುವುದು
ಎಲ್ಲರಿಗೂ ಅತ್ಯಗತ್ಯವಾಗಿರುವುದು
ನಿಷ್ಪಕ್ಷಪಾತವಾಗಿ, ಸಮಾನವಾಗಿ
ಎಲ್ಲರಿಗೂ ಲಭ್ಯವಿದೆಯಲ್ಲವೆ ಚಂದಿರ

ಬದುಕಿನ ಸೋಲು ಗೆಲುವಿಗೆ
ಸಿದ್ಧಮಾದರಿಗಳು, ಅರ್ಥಗಳಿಲ್ಲ
ಅದು ಅವರವರ ಸಾಮರ್ಥ್ಯಕ್ಕೆ
ಪರಿಕಲ್ಪನೆಗೆ ಸೀಮಿತ ಚಂದಿರ

ಪರಿಶುದ್ಧ ಪ್ರೀತಿಯೆಂಬುದು
ಒಂದು ಸುಂದರ ಪರಿಕಲ್ಪನೆ
ಸಾಧಿಸಿದಷ್ಟೂ ಸಿದ್ಧಿಸುವುದಿಲ್ಲ
ಸಿದ್ಧಿಸುವುದು ಪರಿಶುದ್ಧವೆ ಚಂದಿರ

ಶ್ರೇಷ್ಟತೆ ಎಂಬುದರ ಬೆನ್ನತ್ತಿದರೂ
ಎಂದಿಗೂ ತಲುಪಲಾಗದೆ ಸೋತು
ಖಿನ್ನತೆಯಿಂದ ಕೊರಗದಿರು ಗೆಳೆಯ
ಹತ್ತಿರವಿದ್ದೂ ಎತ್ತರದವನು ಚಂದಿರ

ಪರಿಶುದ್ಧತೆಯೆಂಬುದು
ಪರಿಶೋಧಿಸಲಾಗದೆ
ಪರಿಜ್ಞಾನಕೆ ನಿಲುಕದೆ

ಪರಧಿ ದಾಟಿದ ಚಂದಿರ

ದುಷ್ಟ ವ್ಯಾಘ್ರ ಕಾಯುತ್ತಲೇ ಇದೆ

2009-08-27T04:40:00.000-07:00

ನಿನ್ನೊಂದಿಗೆ ಎಲ್ಲ ಜಾಗಗಳೂ ಸುತ್ತುವೆ,
ಸುಂದರ ಕಾಣಿಕೆಗಳ ನೀಡುವೆ,
ಸುಮಧುರ ಹಾಡುಗಳಾಡುವೆ ನಲ್ಲೆ,
ಮನಮಿಡಿಯುವ ಕವನ ಪಠಿಸುವೆ,
ನೀನೆ ನನ್ನ ಕನಸಿನ ಕನಸು,
ತಾರೆಗಳ ಧ್ರುವತಾರೆ,
ಸರ್ವಸ್ವದ ಆಭರಣ,
ಋತುಗಳ ವಸಂತ,
ಮರುಭೂಮಿಯ ಮಳೆ,
ಬರಗಾಲದ ಹಸಿರು,
ರಾತ್ರಿಗಳ ರಾಣಿ,
ಪದ್ಯದ ರಾಗ,
ನೀನೆ ನನ್ನ ಜಗ,
ನೀನೆ ನನ್ನ ದೈವ,
ನೀನೆ ನನ್ನ ಜೀವ,
ನೀನೆ ನನ್ನ ಒಲವು,
ನಿಜವಾಗಲೂ ನಿನ್ನ ವರ್ಣಿಸಲಸದಳ...
ನಿನಿಗೆ ಸ್ವರ್ಗವ ನೀಡಲು ಹಾತೊರೆಯುವೆ
ನಿನ್ನ ಕೂಡಲೆ ಕಾಣಲು ಬಯಸುವೆ
ಇದೆಲ್ಲಾ ನಿನಗಾಗಿ ಮಾಡುವೆನಾದರೂ...
ಗೆಳತಿ
ಮೊದಲಿನಿಂದಲೂ ನನ್ನೊಳಗೆ
ಹಸಿದ ದುಷ್ಟ ವ್ಯಾಘ್ರವೊಂದು
ಕಾಯುತ್ತಲೇ ಇದೆ....

ಹಾಡು ಅದೇ

2009-08-21T23:06:00.001-07:00

ಹಾಡು ಅದೇ ಮತ್ತೆ ಮತ್ತೆ
ಹೊಮ್ಮುತಿದೆ ಸುತ್ತಿಸುತ್ತಿ
ಎಲ್ಲಿ ಅಡಗಿ ಕೂಡಲಿ
ಯಾವ ಕಡೆಗೆ ಓಡಲಿ

ಬತ್ತಿಹೋದ ಬಾವಿಯಲ್ಲಿ
ಹಸಿರು ಬಳ್ಳಿ ಹರಡಿದೆ
ಯಾವುದೊ ಜೀವಜಂತುವಲ್ಲಿ
ಹೊಂಚು ಹಾಕಿ ಕೂತಿದೆ

ಒಣಗಿ ನಿಂತ ಮರದ ಮೇಲೆ
ಯಾವದೊ ಸಸಿ ಚಿಗುರಿದೆ
ಸರ್ಪವೊಂದು ಅಂದಿನಿಂದ
ಯಾರಿಗಾಗೊ ಕಾದಿದೆ

ಬರಗಾಲದಿ ಮರಳುಗಾಡು
ಬೆಂಕಿಯುಗುಳಿ ನರ್ತಿಸಲು
ಯಾವುದೊ ಜೀವವಲ್ಲಿ
ವಿಷಾದ ರಾಗ ನುಡಿಸುತಿದೆ

ಹಾಡು ಅದೇ ಮತ್ತೆ ಮತ್ತೆ
ಹೊಮ್ಮುತಿದೆ ಸುತ್ತಿಸುತ್ತಿ
ಎಲ್ಲಿ ಅಡಗಿ ಕೂಡಲಿ
ಯಾವ ಕಡೆಗೆ ಓಡಲಿ

ಮತ್ತೆ ಬರುವನು ಚಂದಿರ - 31

2009-08-20T04:36:00.000-07:00

ಹಾಡು ಹಕ್ಕಿಯೆ ಹಾರುತ
ಹಾದಿ ಸನಿಹಕೆ ಜಾರಿದೆ
ನಲಿವ ನವಿಲಿನ ಮಾಯೆ
ನಯನಮನೋಹರ ಚಂದಿರ

***
ನವ ದಿಗಂತದ ಆಗಮನಕೆ
ರವಿಯು ಆರತಿ ಬೆಳಗುವ
ಮಸ್ಸಂಚೆ ಪರದೆ ಸರಿಯಲು
ನಗುನಗುತ ಬರುವ ಚಂದಿರ

***

ಚೆಲುವ ಚತುರ ಚಕೋರನು
ಚದುರಂಗದಾಟವನಾಡುವ
ಯಾವ ಮಾಯಾ ಮೋಡಿಗೆ
ತಲೆತೂಗುತಿರುವ ಚಂದಿರ

***
ಮೋಡ ಕವಿಯುವ ಮಾತ್ರಕೆ
ಮಂದಹಾಸವು ಮಸುಕಾವುದೆ
ಶೃಂಗಾರ ಲಹರಿಯ ಹರಿಸುತ
ಪ್ರೇಮಿಗಳ ಹರಸುವ ಚಂದಿರ
***
ಬಾನಿನಂಚಿನ ಬೆಳ್ಳಿ ಬೆಳಗು
ಯಾವ ರಾಗದ ಆರೋಹಣ
ಇದ್ಯಾವ ತಾಳದ ದಿಂದಿಂನ
ತಾರೆಗಳ ರಿಂಗಣ ಚಂದಿರ
***
ಯಾವ ಚುಕ್ಕಿಯ ಸೆಳೆತಕೆ
ಹಾರುವ ಹಕ್ಕಿ ಮಿಡಿದಿದೆ
ಗಮ್ಯವ ಸೇರೊ ತುಡಿತಕೆ
ಸಕಲ ತೊರೆದಿದೆ ಚಂದಿರ
***
ಸಹಜ ರೀತಿಯ ಸೌಂದರ್ಯ
ಸವಿಯುವ ಕ್ರಮ ಸ್ವಾಭಾವಿಕ
ಅಸಹಜ ರೀತಿಯ ಆಸ್ವಾಧ
ಅಪರಾಧ ಅಲ್ಲವೆ ಚಂದಿರ?
***
ಮಾನ್ಯ ಶಿಷ್ಟ ಸಜ್ಜನರು
ಮದ್ಯಪಾನ ಬಲಹೀನತೆ
ಎಂದು ಬಿಂಬಿಸುವ ಪರಿ
ಸಭ್ಯತೆಯೆ ಹೇಳು ಚಂದಿರ?
***
ಪ್ರಾಮಾಣಿಕವಾಗಿ ಬಯಸುವ
ನಿಸ್ವಾರ್ಥದಿಂದ ಅಪ್ಪಿಕೊಳ್ಳುವ
ನಿತ್ಯ ಮುತ್ತಿಟ್ಟು ಮತ್ತೇರಿಸುವ
ಸಾಧನ ಮದ್ಯ ಅಲ್ಲವೆ ಚಂದಿರ?
***
ಪ್ರಾಮಾಣಿಕತೆ, ಸತ್ಯ, ನಿಷ್ಠೆಗಳು,
ನಂಬಿಕೆ, ನೈತಿಕತೆ, ಮೌಲ್ಯಗಳು
ಕೇಳಲು ಮತ್ತು ಹೇಳಲು ಬಹಳ
ಸೊಗಸಾಗಿದೆಯಲ್ಲವೆ ಚಂದಿರ?

ರಣ ಹದ್ದುಗಳು

2009-08-12T00:07:00.000-07:00

ಹೊಂಚುತ್ತಿವೆ ರಣ ಹದ್ದುಗಳು
ಉರಿಬಿಸಿಲು ಒಡಲ ಸುಡುತಿರೆ
ದಿಗ್ಗನೆ ಉಮ್ಮಳಿಸಿದೆ ಬೆಂಕಿ ಮುಗಿಲುದ್ದ
ಬಿರುಕಿಟ್ಟ ಧರೆಗೆ ಸಾಂತ್ವನದ ಹಗಲುಗನಸು

ಹೆಣಗಳ ಹಿಂಡು ಹಿಂಡು
ಹಸಿದ ಹದ್ದುಗಳ ಆಕ್ರಂದನ
ಸ್ಮಶಾನ ಮೌನದ ಶೋಕಗೀತೆಗೆ
ನಗ್ನ ನೀಲಾಕಾಶದ ನೀರವಮೌನ ಸಾಥ್

ಹಸಿವು, ಬಡತನ, ಅಸಾಹಯಕತೆ
ಜಗದ ಉದ್ದಗಲಕೂ ಅವರದೇ ಸಂತೆ
ಜಗದೋದ್ಧಾರಕೊನೊಬ್ಬ ಅಬ್ಬರಿಸುತಿರುವ
ಸಾವರಸಿ, ತಡವರಿಸಿದ ಮೂಕವೀಕ್ಷಕರ ಅಳಲು

ನೀಲಿ ನಕಾಶೆ ಎಂದೋ ರೆಡಿ
ಕಾಲ್ತುಲಿತಕೆ ಸಾವಿರಾರು ಜನರ ಆಹುತಿ
ಬೆಪ್ಪನಿಗೆ ಇದ್ಯಾವುದೂ ತೋಚದ ಅಗೋಚರ
ಜಗದೊಡೆಯನ ಆಥಿತ್ಯಕೆ ಸಕಲವು ಸಮರ್ಪಣೆ

ಸೂಕ್ಷ್ಮಾತಿಸೂಕ್ಷ್ಮಗಳ ತಿರುಳಿದು
ಬಟಾಬಯಲಾಗುವುದು ಭಂಡತನ
ಬೇಟೆಯಾಡುವರೊ ಅನಾಯಾಸವಾಗಿ
ಮರುಳ, ತಿಳಿಗೇಡಿ ಎಚ್ಚೆತ್ತು ಜೀವವುಳಿಸಿಕೊ

ಮತ್ತೆ ಬರುವನು ಚಂದಿರ - 30

2009-08-07T21:46:00.000-07:00

ಅಸ್ಪಷ್ಟ ಹಾದಿಯ ಹಕ್ಕಿಗೆ
ಹಲವಾರು ಹಂಬಲದ ತೇರು
ಕಲಹ, ಕದನ, ಕೋಲಾಹಲ
ಉನ್ಮತ್ತ ಚಿತ್ತ ಚಂದಿರ

ವೇಗ, ಉದ್ವೇಗದ ಸವಾರಿ
ಹಗಲು ವೇಶದ ಅನಾಮಧೇಯ
ಹರಹರ ಅರ್ಧನಾರೀಶ್ವರಿನಿಗೆ
ಸಂಯಮ ಪರಾರಿ ಚಂದಿರ

ಮಾತಿಗಿಲ್ಲ ಪುರಸೊತ್ತು
ಮತಿಗೆ ಎಲ್ಲಿಲ್ಲದ ಕಸರತ್ತು
ನುಸುಳುವ ಸ್ಮಶಾನ ಮೌನ
ಉರಿವ ಅಂತಃರಾತ್ಮ ಚಂದಿರ

ಏನೇನೋ ಲೆಕ್ಕಾಚಾರ
ಇಲ್ಲಿ ಎಲ್ಲವೂ ಅಗೋಚರ
ಪಿಸುಮಾತು, ಗುಸುಗುಸು
ಸಂಚಿಗೆ ಮದ್ಯಸಾರ ಚಂದಿರ

ಬಡಪಾಯಿ ಶಂಭುವಿಗೇಕೋ
ರಿಂಗಣಿಸುವ ತವಕ ತಲ್ಲಣ
ಅತಂತ್ರತೆ, ಅಸಹಾಯಕತೆ
ನಿತ್ಯನೂತನ ಸಿದ್ಧಿ ಚಂದಿರ

ಮನೆಯ ಹಿತ್ತಲಲ್ಲಿ ಗುಲಾಬಿ ಮೊಗ್ಗು
ಆ ಬದಿ ಮನೆಯೊಡತಿಗೆ ಏಕೋ
ಎಲ್ಲಿಲ್ಲದ ಉರುಪು, ಉಮ್ಮಸ್ಸು
ಯಾವ ವಿಸ್ಮಯಕೋ ಚಂದಿರ

ಪಂಚರಂಗಿ ಪರಮಾತ್ಮ ಮನೆಯೊಡೆಯ
ಸದಾ ಅಲೆಯುವ ಪರದೇಸಿ ಪುಣ್ಯಾತ್ಮ
ಹಸಿದಾಗ ಅಪ್ಪಣೆಯ ಬೇಡುವುದೆ ಧರ್ಮ
ಕಾದ ಕಾವಲಿಗೆ ತೀವ್ರ ಕಳವಳ ಚಂದಿರ

ಆ ಮರದಲ್ಲಿ ಮಿಡಿಗಾಯಿ
ಇಲ್ಲಿ ಸಂಯಮವು ಬತ್ತಿರಲು
ರುಚಿ ನೋಡುವ ಅತಿಯಾಸೆಗೆ
ಆಗ ನೋಟ ಮಂಪರು ಚಂದಿರ

ತರ್ಕಕ್ಕೆ ನಿಲುಕದ ಆ ಪುಳಕ
ಅದೇ ಸಂಗ್ರಾಮ, ಸಂಭ್ರಮ
ಮಂದಹಾಸದಿ ಮತ್ತೆ ಮರಳಿ
ವಾಸ್ತವಕ್ಕೆ ಪ್ರವೇಶ ಚಂದಿರ

ಮರದಿಂದ ಜಾರಿದ ಮಂಜು
ಹೃದಯಕ್ಕೆ ರೋಮಾಂಚನ
ಬೇಸರ ತುಂಬಿದ ದಿನದಿಂದ
ಕ್ಷಣದಲಿ ಮುಕ್ತಿ ಚಂದಿರ

ಒಂದೇ ಕಾಲು

2009-08-07T00:46:00.000-07:00

ಒಂದು ವೇಳೆ ನಮಗೇನಾದರೂ...
ಒಂದೇ ಒಂದು ಕಾಲು
ಇದ್ದಿದ್ದರೆ:

ನಾವೇಗೆ –
ನಿಲ್ಲುವುದು
ನಡೆಯುವುದು
ಓಡುವುದು
ಮತ್ತೆ ಕೂರುವುದು

ಕೇಳಿ!
ಮತ್ತೆ ಹೇಗೆ –
ಮರ ಹತ್ತುವುದು
ಬೆಟ್ಟದ ತುದಿ ಮುಟ್ಟುವುದು
ನದಿಗಳ ದಾಟುವುದು
ಕಣಿವೆಗೆ ಜಾರುವುದು

ನಾವೇಗೆ –
ಈಜುವುದು
ಜಾಗಿಂಗ್
ಸೈಕ್ಲಿಂಗ್
ಸ್ಕೇಟಿಂಗ್ ಮಾಡೋದು

ಮರೆತು ಬಿಡಿ –
ಕುದುರೆ ಸವಾರಿ
ರಿವರ್ ರಾಫ್ಟಿಂಗ್
ಟ್ರೆಕ್ಕಿಂಗ್
ಮತ್ತೆ ಸ್ಕೀಯಿಂಗ್

ಅಯ್ಯೋ ದೇವರೆ!
ನಾವೇಗೆ –
ಕ್ರಿಕೆಟ್ ಆಡೋದು,
ಟೆನ್ನಿಸ್, ಷಟಲ್,
ಕಬಡ್ಡಿ, ಕೋ ಕೋ
ಪುಟ್ಬಾಲ್, ವಾಲಿಬಾಲ್
ಬೇಸ್ಬಾಲ್, ಬಾಸ್ಕೆಟ್ಬಾಲ್
ಇವೆಲ್ಲ ಹಾಳಾಗೋಗಲಿ...

ದುರಂತವೆಂದರೆ... ಹೇಗೆ –
ಮಕ್ಕಳೊಂದಿಗೆ ಆಡೋದು
ಗೆಳೆಯರೊಂದಿಗೆ ಕುಣಿಯೋದು
ಗೆಳತಿಯೊಂದಿಗೆ ಸುತ್ತೋದು
ಮತ್ತೆ ಅವಳನ್ನು ರಮಿಸೋದು...

ಈಗ,
ಇಂಥಹ ಸನ್ನಿವೇಶವನ್ನು ಬಗೆಹರಿಸುವ
ಬಗ್ಗೆ ಯೋಚಿಸೋಣ,
ನಾವು ಬಹುಶಃ ಇವುಗಳ ನೆರವು
ಪಡೆಯಬಹುದು –
ಊರುಗೋಲು
ಅಥವಾ ವಾಸ್ತವವನ್ನೊಪ್ಪಿ ಬದುಕೋದು ಕಲಿಯಲೂಬಹುದು
ಅಥವಾ ಕೃತಕ ಕಾಲನ್ನು ಜೋಡಿಸಬಹುದು
ರಬ್ಬರಿಂದ ತಯಾರಿಸಿರುವುದಾಗಲಿ,
ಉಕ್ಕಿಂದ, ಬೆಳ್ಳಿ ಅಥವಾ ಚಿನ್ನದ ಕಾಲು

ದಯವಿಟ್ಟು ನನ್ನ ಶಪಿಸದಿರಿ
ಸ್ವಲ್ಪ ಹುಚ್ಚುತನದ ಜೊತೆಗೆ
ಕಲ್ಪನೆಯೂ ಜಾಸ್ತಿಯಾಗೇ ಚಿಗುರಿತ್ತು
ಕಳೆದ ರಾತ್ರಿ ಹೀಗೇ.....

ಕೊನೆಯದಾಗಿ,
ದೆವರೇ ನಿನಗೆ ತಲೆಬಾಗುವೆ
ನಮಗೆರಡು ಕಾಲುಗಳ ನೀಡಿರುವೆ!

ಹಾಡು ಹಕ್ಕಿ

2009-08-06T03:42:00.000-07:00

ಹಾಡು ಹಕ್ಕಿಯೆ ಹಾರುತ
ಹಾದಿಯ ಸನಿಹಕೆ ಜಾರದೆ
ನಲಿವ ನವಿಲಿನ ಮಾಯೆಗೆ
ನಯನ ಮನೋಹರವಾಗಿದೆ

ನವ ದಿಂಗತದ ಆಗಮನಕೆ
ರವಿಯು ಆರತಿ ಬೆಳಗುವ
ಮುಸ್ಸಂಜೆ ಪರದೆಯನೆಳೆದು
ಮುತ್ತಿನ ತೋರಣ ಕಟ್ಟುವ

ಚೆಲುವ, ಚತುರನು ಚಂದಿರ
ಚದುರಂಗದಾಟವನಾಡುವ
ಇವನ ಮಾಯಾ ಮೋಡಿಗೆ
ಮರುಳಾಗಿ ಮೈಮನ ಪುಳಕ

ಮೋಡ ಕವಿಯುವ ಮಾತ್ರಕೆ
ಮಂದಹಾಸವು ಮಸುಕಾಯಿತೆ
ಶೃಂಗಾರ ಲಹರಿಯು ಹರಿವ
ಕ್ಷಣದಲಿ ಮೂಕವಿಸ್ಮಿತರಲ್ಲವೆ

ಬಾನಿನಂಚಿನ ಬೆಳ್ಳಿ ಬೆಳಗು
ಯಾವ ರಾಗದ ಆರೋಹಣ
ಯಾವ ತಾಳದ ದಿಂ ದಿಂನ
ತಾರೆಗಳ ತೇರಿನ ರಿಂಗಣ

ಯಾವ ಚುಕ್ಕಿಯ ಸೆಳೆತಕೆ
ಹಾರುವ ಹಕ್ಕಿಯು ಮಿಡಿದಿದೆ
ಗಮ್ಯವ ಸೇರುವ ತುಡಿತಕೆ
ಸಕಲವ ತೊರೆದು ನಿಂತಿದೆ

ಬೆಂಕಿ ಮತ್ತು ಹಿಮ

2009-07-30T04:16:00.000-07:00

ಕೆಲವರು ಹೇಳುತ್ತಾರೆ
ಜಗತ್ತು ಬೆಂಕಿಯಿಂದ ಭಸ್ಮವಾಗತ್ತದೆ ಎಂದು
ಮತ್ತೆ ಕೆಲವರು ಹೇಳುತ್ತಾರೆ ಹಿಮದಿಂದ ಎಂದು
ಮಹದಾಸೆಯಿಂದ ನಾನು ಮನಗಂಡಿರುವುದೇನೆಂದರೆ,
ನಾನು ಬೆಂಕಿಯ ಪರವಾಗಿರುವವರನ್ನು ಬೆಂಬಲಿಸುತ್ತೇನೆ.
ಆದರೆ, ಒಂದು ವೇಳೆ ಜಗತ್ತು ಎರಡು ಬಾರಿ ನಾಶಗೊಳ್ಳುವ ಸನ್ನಿವೇಶದಲ್ಲಿ,
ನನಗನ್ನಿಸುತ್ತದೆ, ನಾನು ಸಾಕಷ್ಟು ದ್ವೇಷವನ್ನೂ ಕಂಡಿದ್ದೇನೆ
ಸರ್ವನಾಶವಾಗಲು ಹಿಮವೂ ಸಹ ಒಂದು ಅದ್ಭುತವೇ ಸರಿ
ಮತ್ತೆ ಅಷ್ಟು ಸಾಕಾಗುತ್ತದೆ.

ಮೂಲ ಕವಿ : ರಾಬರ್ಟ್ ಫ್ರಾಸ್ಟ್
ಕನ್ನಡಕ್ಕೆ : ಚಂದಿನ

ಮಂಜಿನ ಮಳೆ

2009-07-30T03:08:00.001-07:00

ಅರಳಿ ಮರದಿಂದ
ಕಾಗೆ ನನ್ನ ಮೇಲೆ ಒಮ್ಮೆಗೆ
ಮಂಜಿನ ಮಳೆ ಉದುರಿಸಿದ
ಪರಿಯಿಂದಾಗಿ

ಕೂಡಲೇ ಬದಲಾದ ಮನಃಸ್ಥಿತಿ,
ನನ್ನ ಹೃದಯಕ್ಕೆ ತುಸು ನೆಮ್ಮದಿ;
ಬೇಸರ ತುಂಬಿದ ದಿನದಿಂದ
ಸ್ವಲ್ಪ ಮಟ್ಟಿಗೆ ವಿಮುಕ್ತಿ

ಮೂಲ ಕವಿ : ರಾಬರ್ಟ್ ಫ್ರಾಸ್ಟ್
ಕನ್ನಡಕ್ಕೆ : ಚಂದಿನ

ಪ್ರತಿಬಿಂಬ

2009-07-28T05:01:00.001-07:00

ಅಸ್ಪಷ್ಟ ಹಾದಿಯ ಹಕ್ಕಿಗೆ
ಹಲವಾರು ಹಂಬಲದ ತೇರು
ಕಲಹ, ಕದನ, ಕೋಲಾಹಲ
ಉನ್ಮತ್ತ ಚಿತ್ತಕ್ಕೆ ಪಿತ್ತ

ವೇಗ, ಉದ್ವೇಗದ ಸವಾರಿ
ಹಗಲುವೇಶದ ಅನಾಮಧೇಯ
ಹರಹರ ಅರ್ಧನಾರೀಶ್ವರನಿಗೆ
ಸಂಯಮ ಎಂದೋ ಪರಾರಿ

ಮಾತಿಗಿಲ್ಲ ಪುರಸೊತ್ತು
ಮತಿಗೆ ಎಲ್ಲಿಲ್ಲದ ಕಸರತ್ತು
ನುಸುಳುವ ಸ್ಮಶಾನ ಮೌನಕ್ಕೆ
ಧಾರಾವಾಹಿಯ ತಪ್ಪದ ಕಿರಿಕಿರಿ

ಏನೇನೋ ಲೆಕ್ಕಾಚಾರ
ಇಲ್ಲಿ ಎಲ್ಲವೂ ಅಗೋಚರ
ಪಿಸುಮಾತು, ಗುಸುಗುಸು
ಸಂಚಿಗೆ ಮದ್ಯಸಾರದ ನೈವೇದ್ಯ

ಬಡಪಾಯಿ ಶಂಭುವಿಗೇಕೋ
ರಿಂಗಣಿಸುವ ತವಕ, ತಲ್ಲಣ
ಅತಂತ್ರತೆ, ಅಸಹಾಯಕತೆ
ನಿತ್ಯನೂತನದ ಕಾರ್ಯಸಿದ್ಧಿ

ತುದಿಗಾಲ ತುಡಿತ

2009-07-23T05:00:00.000-07:00

ಮನೆಯ ಹಿತ್ತಲಲ್ಲಿ ಗುಲಾಬಿ ಮೊಗ್ಗು
ಆ ಬದಿಯ ಮನೆಯೊಡತಿಗೆ ಏಕೋ
ಎಲ್ಲಿಲ್ಲದ ಉರುಪು, ಉಮ್ಮಸ್ಸು

ಪಂಚರಂಗಿ ಪರಮಾತ್ಮ ಆ ಮನೆಯೊಡೆಯ
ಅಲೆಯುವ ಪರದೇಸಿ ಪುಣ್ಯಾತ್ಮ
ಹಸಿದಾಗ ಅಪ್ಪಣೆಯ ಬೇಡುವುದೇ

ಮಿಡಿಗಾಯಿ ಮರದಲ್ಲಿ, ಸಂಯಮ ಬತ್ತಿರಲು
ರುಚಿ ನೋಡುವ ತವಕ ತುದಿಯಲ್ಲಿ ಕೊತ ಕೊತ
ಆಗ ನೋಟವೂ ಮಂಪರು, ಮಂಪರು

ತರ್ಕಕ್ಕೆ ನಿಲುಕದ ಅಂಗಾಂಗ ಪುಳಕ
ನಿಟ್ಟುಸಿರಿಡುವವರೆಗೂ ಅದೇ ಸಂಗ್ರಾಮ, ಸಂಭ್ರಮ
ಮಂದಹಾಸದಿ ಮತ್ತೆ ವಾಸ್ತವಕ್ಕೆ ಮರು ಪ್ರವೇಶ

ಮತ್ತೆ ಬರುವನು ಚಂದಿರ - 29

2009-07-16T21:36:00.000-07:00

ಅತಂತ್ರ ಸ್ಥಿತಿಯ ಭೀಕರ ಚಿತ್ರ
ಕದಡಿ, ಕಾಡುವ ಭಾವಾತಿರೇಕ
ಮುಕ್ತಿ, ಮೋಕ್ಷಗಳ ಶೋಧನೆಗೆ
ಅಂತಿಮ ಎಲ್ಲಿ ಹೇಳೊ ಚಂದಿರ

ವಾಸ್ತವದ ವ್ಯವಹಾರಿಕ ನೆಲೆಯಲ್ಲಿ
ಮೌಲ್ಯಗಳ ಹುಡುಕುವ ನೆಪವೇಕೆ
ಪ್ರತಿಫಲದ ಆಪೇಕ್ಷೆಯಿಂದ ಬೆಸದ
ಸ್ನೇಹಕೆ, ಜರಿಯುವೆ ಏಕೆ ಚಂದಿರ

ಸೈದ್ಧಾಂತಿಕ, ತಾತ್ವಿಕ ನೆಲೆಗಟ್ಟು,
ಗತಕಾಲದ ವೈಭವಗಳ ಜೊತೆಗೆ
ವಾಸ್ತವಕ್ಕೆ ಹಿಡಿದಾಗ ನೈಜ ಕನ್ನಡಿ
ನಿರ್ಲಿಪ್ತ ನಗೆ ಬೀಸುವ ಚಂದಿರ

ಚಾರಿತ್ರಿಕ ಪಾತ್ರದ ಹಿನ್ನಲೆಯಲ್ಲಿ
ಸಮಕಾಲೀನ ಪ್ರತಿರೂಪಗಳನ್ನು
ಪ್ರತಿಮೆಗಳಾಗಿ ಬಳಸುವ ಪ್ರಕ್ರಿಯೆ
ಶ್ರೇಷ್ಟತೆಗೆ ಮಾದರಿಯೆ ಚಂದಿರ

ವಿಭಿನ್ನ ಮಗ್ಗುಲುಗಳಿಗೆ ತಿರುಗಿಸಿ
ಸೂಕ್ಷ ಪರಿಶೀಲನೆಗೆ ಅಳವಡಿಸಿ
ನಿರ್ಲಿಪ್ತ ಮನಸ್ಥಿತಿ ಹಿನ್ನಲೆಯಲ್ಲಿ
ಸತ್ಯಕ್ಕೆ ಹತ್ತರವಾಗುವೆ ಚಂದಿರ

ಬಿಡಿ ಬಿಡಿಯಾಗಿ ಕಡಿದ ನಂತರ
ವಿಚಿತ್ರವಾಗಿ ಜೋಡಿಸುವುದನ್ನೇ
ಕ್ರೀಯಾಶೀಲತೆಗೆ ಕನ್ನಡಿಯೆಂದು
ಸೃಜನಶೀಲ ತಾನೆನ್ನುವ ಚಂದಿರ

ಆಕರ್ಷಕವಾಗಿ, ಸಾರ್ಥಕವಾಗಿ
ಕಟ್ಟಿಕೊಡುವ ಕಠಿಣ ಪರಿಶ್ರಮಕ್ಕೆ,
ಸಂಯಮ, ಸಹನೆಯ ಪರೀಕ್ಷೆಗೆ
ಹಿಂಜರಿಯುವೆ ಏಕೆ ಚಂದಿರ

ಭಾವ ಲಯಗಳ ಮಿಡಿತದಿಂದ
ಭಾವ ಲಹರಿಯ ಹಿಡಿತದಿಂದ
ಚಲನಶೀಲತೆ ಮೊಟಕುಗೊಳ್ಳದೆ
ಸತತ ಚಲಿಸುತಿರು ಚಂದಿರ

ಬಾಳಿನ ಅನಿರೀಕ್ಷಿತ ತಿರುವುಗಳಿಗೆ
ಕುತೂಹಲ ಕೆರಳಿಸುವ ಸನ್ನಿವೇಶಕೆ,
ಮುಗ್ಥ ಅಚ್ಚರಿಗಳಿಗೆ ಬೆರಗಾಗುತ
ಜೀವ ಚೈತನ್ಯ ತುಂಬಿಸು ಚಂದಿರ

ತಂತ್ರ ಮಂತ್ರಕೆ ತಲೆದೂಗುತ್ತಾ
ಅಂಧ ಆಮಿಷಗಳಿಗೆ ಜಾರಿ ಬಿದ್ದು
ಧರ್ಮ ಸಂಕಟಕ್ಕೆ ಸಿಕ್ಕಿ ಕೊಂಡೆನು
ಪಾರುಮಾಡೊ ಗೆಳೆಯ ಚಂದಿರ

ಮತ್ತೆ ಬರುವನು ಚಂದಿರ - 28

2009-06-28T21:38:00.000-07:00

ಒಂಟಿ ಬದುಕಿನ ನಿರಂತರ ಓಟ
ಸಂಜೆಗಣ್ಣಿನ ಅಸ್ಪಷ್ಟ ನೋಟಕೆ
ಸ್ಥಾಯೀಭಾವದ ಸ್ಥಿರ ಹಿನ್ನಲೆಗೆ
ಹಿಮ್ಮೇಳ ನುಡಿಸುವನೊ ಚಂದಿರ

ನಡೆದ ಹಾದಿಯ ಪರಮಾವಧಿ
ಪಾಪ, ಪುಣ್ಯದ ಪರಮಾರ್ಥಕ
ಸಂಸರ್ಗ, ಸಂಸಾರ, ಸಂಸೃತಿ
ಸಂಸ್ಕರಿಸುವವನೆ ಚಂದಿರ

ಸಹನೆಯಿಂದೋಡಿಸುತ್ತಾ ಬೇಸರ
ಕ್ಷಮೆಯಿಂದ ನಿಯಂತ್ರಿಸು ಕೋಪ
ಬಲಹೀನತೆ ಜಯಿಸು ಪ್ರೇಮದಿಂದ
ತಪ್ಪನ್ನು ನಗುವಿಂದ ಉತ್ತರಿಸೊ ಚಂದಿರ

ಮುತ್ತಿರುವ ಪರದೆಗಳನ್ನು ಕಿತ್ತೆಸೆದು
ಅಡಗಿದ್ದ ವಿಕೃತಿ ಅನಾವರಣಗೊಳಿಸಿ
ಮುಕ್ತಿಮಾರ್ಗದಲಿ ನಡೆಯಲಿಚ್ಛಿಸಿದರೆ
ಆರ್ದ ಸಂತೃಪ್ತಿ ಸಿದ್ಧಿಸುವುದು ಚಂದಿರ

ಅವತರಿಪ ವಿಶಿಷ್ಟ ತುಮುಳಗಳಿಗೆ
ಕದಡದಿರಲಿ ಸ್ಥಿರಚಿತ್ತ, ಸಂಯಮ
ಕಾಲಾತೀತದಲ್ಲಿ ಲೀನವಾಗುವುದು
ಮತ್ತೆ ಮರುಕಳಿಸದಂತೆ ಚಂದಿರ

ನೆನಪುಗಳ ಹೊಳೆಯಲ್ಲಿ ಮಿಂದು
ಆಶಯಗಳಿಗೆ ವಾಸ್ತವದ ನೋಟ
ಪರಿಚಯಿಸುವ ಸ್ಥೈರ್ಯವಿರದಿದ್ದರೆ
ಗಾಳಿಗೋಪುರ ಖಚಿತ ಚಂದಿರ

ಭೂತ, ವರ್ತಮಾನದ ಬಿಡಿಚಿತ್ರಗಳು
ಅಗಾಧವಾಗಿ ಕಲಕುತಿವೆ ಮನವನ್ನು
ಏಕಾಗ್ರತೆಯ ಸಾಧಿಸುವ ಹಾದಿಯಲಿ
ಮತ್ತೆ ಸೋತಿರುವೆನೊ ಚಂದಿರ

ಬದುಕು ಕಾಣಿಸಿದ ಚಿತ್ರಗಳೆಲ್ಲವು
ಸ್ಥಾನಪಲ್ಲಟಗೊಂಡಿವೆ ಬಲುಬೇಗ
ಅದರ ವೇಗ, ಅವೇಗದ ಬಿರುಸಿಗೆ
ಬಲಿಪಶುವಾಗಿರುವೆನೊ ಚಂದಿರ

ಪ್ರತಿರೂಪಗಳ ಗುರುತಿಸಲಾಗದೆ
ಪರಿಕಲ್ಪನೆಗಳಿಗೆ ರೆಕ್ಕೆಗಳನ್ನಿಡದೆ
ಕಾರ್ಯಪ್ರವೃತ್ತಿಗೆ ಸಜ್ಜುಗೊಳ್ಳದೆ
ನುಚ್ಚುನೂರಾಗಿರುವೆನೊ ಚಂದಿರ

ಚಿಂತನೆಗಳಿಗೆ ಚಾಲನೆ ನೀಡದೆ
ಮಂಥನಗಳಿಗೂ ಮನಗೊಡದೆ
ಅಂತರಾತ್ಮವನೆಂದೂ ಪ್ರಶ್ನಿಸದೆ
ಅಸ್ಪಷ್ಟಗಳಿಗೆ ಬಲಿಯಾದೆ ಚಂದಿರ

ಅಡಗಿದ್ದ ಶಿಷ್ಟ ಕರೆಗಳು

2009-06-27T00:59:00.000-07:00

ಅಂತಃರಂಗದೊಳಗಿನ ಪುಟ್ಟ ದನಿ
ನನ್ನ ಕರೆದು ಹೇಳುತ್ತಿದೆ---
“ಸತ್ಯವೆಂಬ ಉಡುಗೊರೆ ಹಂಚು,
ಅದವರ ನೋವು ನಿವಾರಣೆಗೆ ನೆರವಾಗುತ್ತದೆ.” ಎಂದು.
ಅಂತಃಸತ್ವದಿಂದ ಚೈತನ್ಯ ಹೊಮ್ಮುತ್ತಿದೆ,
ಅದರ ದೃಢವಾದ ಪಿಸುಮಾತುಗಳಿಂದ.
ನನ್ನನ್ನು ಒತ್ತಾಯಿಸುತ್ತದೆ, ಒಳಗಿನ ಬೆಳಕನ್ನು ಹರಡಿ,
ಅಂಧಕಾರದಲ್ಲಿರುವವರ ಬದುಕನ್ನು ಬೆಳಗಲು.
ಆತ್ಮಸಾಕ್ಷಿ ಮೌನ ಮುರಿದು,
ನನ್ನಾತ್ಮವನ್ನು ಎಚ್ಚರಿಸುತ್ತದೆ, ಸುಖನಿದ್ರೆಯಿಂದ.
ದೊಂಬಿಡುತ್ತದೆ, ಪ್ರಶಾಂತ ಸಂತಸವನ್ನು ಪಸರಿಸಲು,
ಏಕೆಂದರೆ, ಉಳಿದವರನ್ನು ಅದು ತೊಂದರೆಗಳಿಂದ ಸಂರಕ್ಷಿಸುತ್ತದೆ.
ದಿವ್ಯ ನ್ಯಾಯಾಲಯದಲ್ಲಿ, ಅಂತರಾಳವೆಂಬ ನ್ಯಾಯಾಧೀಶರು
ಸೂಚಿಸುತ್ತಾರೆ, ನ್ಯಾಯವೆಂಬ ಸುವರ್ಣ ನಿಯಮವನ್ನು ಪಾಲಿಸಲು.
ಮೂಲ ನಂಬಿಕೆಗಳನ್ನು ಆಚರಿಸುತ್ತಾ ಸಮಾಜಕ್ಕೆ ಮಾದರಿಯಗಲು,
ಅದು ಅನ್ಯರ ಸಕಲ ಕಷ್ಟ ನಿವಾರಣೆಗೆ ಬಹಳ ಉಪಯೋಗವಾಗುತ್ತದೆ.
ಪ್ರಜ್ವಲ ಆಧ್ಯಾತ್ಮದ ಕರೆ
ಮತ್ತೆ ಚಿಗುರೊಡೆಯುತ್ತದೆ
ಈ ಸಲ ನನ್ನನ್ನು ವಿಶಾಲ ದೂರದೃಷ್ಟಿಯನ್ನು ಹಂಚಿಕೊಳ್ಳಲು ತಿಳಿಸುತ್ತದೆ,
ಎಲ್ಲರೂ ಸರ್ವ ಋತುಗಳಲ್ಲಿ, ಸನ್ಮಾರ್ಗದಲ್ಲಿ ನಡೆಯಲು ಸಹಾಯವಾಗಲೆಂದು.
ಅಂತಃರಂಗದ ಅರ್ಚಕ ಹೇಳುತ್ತಾನೆ,
ನೋವು ನಿವಾರಕ ಶಕ್ತಿಯನ್ನು ಅನುಗ್ರಹಿಸಲು,
ಮತ್ತೆ ಆಜ್ಞಾಪಿಸುತ್ತಾನೆ, ಅದರ ಸದುಪಯೋಗವನ್ನು ಎಲ್ಲೆಡೆ ಹರಡಲು,
ಎಲ್ಲರೂ ತಮ್ಮ ಸುಂಗಧ ಪರಿಮಳವನ್ನು ಮತ್ತೆ ಹಿಂಪಡೆಯಲು.
ನನ್ನ ಏಕಾಂತತೆಯ ಗೂಡಿಂದ,
ನನಗೆ ಜ್ಞಾನ ಸಿದ್ಧಿಸುತ್ತದೆ, ದಿವ್ಯಸ್ಪೂರ್ತಿಯ ದೇವಕನ್ಯೆಯರಿಂದ,
ನಂತರ ಅದು ಎಲ್ಲಡೆಗೆ ಹಬ್ಬುತ್ತದೆ,
ಯಾರೊಬ್ಬರನ್ನೂ ಬಿಡದ ಹಾಗೆ, ಅವರ ದುಃಖಗಳನ್ನು ಸರ್ವನಾಶಮಾಡಲು.
ಅಡಗಿದ್ದ ಶಿಷ್ಟ ಕರೆಗಳ ಈ ಜ್ಯೋತಿ
ಜೀವಂತವಾಗಿ ಹೀಗೇ ಬೆಳಗುತ್ತಿರಲು,
ನಾನು ಮುಂದುವರೆಸುತ್ತೇನೆ, ಶಿಷ್ಟ ಸಲಹೆಗಳ ಸ್ವೀಕರಿಸುವುದನ್ನು,
ನಾನು ಹೀಗೆ ಹಂಚಿಕೊಳ್ಳುವುದನ್ನೂ ಸಹ ಮುಂದುವರೆಸುತ್ತೇನೆ,
ಸರ್ವ ಶ್ರೇಷ್ಠ ಜಗತ್ ಸತ್ಯಗಳ ಹರಡುವುದನ್ನು.

ಮೂಲ ಕವಿಯತ್ರಿ : ಚಿತ್ರ .ಜಿ. ಲೇಲೆ
ಕನ್ನಡಕ್ಕೆ : ಚಂದಿನ

ಪ್ರಸಕ್ತ ಚಿತ್ರಣಕ್ಕೊಂದು ಕನ್ನಡಿ

2009-06-26T23:25:00.000-07:00

ಎಷ್ಟೋ ಕೊರತೆಗಳಿರುವುದು ಕಂಡಿದ್ದೇನೆ
ಅವನ್ನು ಪಡೆಯಲಿಕ್ಕೆ, ದುಬಾರಿ ಬೆಲೆ.
ಜನಸಾಮಾನ್ಯರು ಅತ್ತಿತ್ತ ಪರದಾಡುತ್ತಾರೆ
ಊಟ, ನೀರು ಮತ್ತೆ ನೆಲೆಗಾಗಿ.

ಪ್ರಾಮಾಣಿಕರಿಗೆ ಉಸಿರುಗಟ್ಟುವ ಸನ್ನಿವೇಶ
ನರಿಗಳಂಥವರು ತಮ್ಮ ತಿಜೋರಿ ತುಂಬಿಸುತ್ತಾರೆ
ಸುಳ್ಳು ಪ್ರಮಾಣ ಪತ್ರ ನೀಡಿ ಪ್ರಭಾವಿಗಳಾಗುತ್ತಾರೆ
ಮಧ್ಯರಾತ್ರಿ ನಿದ್ದೆಗೆಟ್ಟು ಓದುವವರಿಗೆ ಕೇವಲ ವಯಸ್ಸಾಗುತ್ತದೆ.

ಕುತಂತ್ರಿಗಳು ಪರರ ಪರಿಶ್ರಮವನ್ನು ದೋಚುತ್ತಾರೆ
ಅಳಿದುಳಿದದ್ದು ಮಾತ್ರ ಪ್ರತಿಭಾನ್ವಿತರಿಗೆ ನೀಡುತ್ತಾರೆ
ಪರಿಣಾಮಕಾರಿ ಕೆಲಸಗಾರರನ್ನು ಹೊರಹಾಕುತ್ತಾರೆ
ಸೋಮಾರಿಗಳನ್ನು ಶ್ರೇಷ್ಟರೆಂದು ಬಿಂಬಿಸುತ್ತಾರೆ.

ಭ್ರಷ್ಟಾಚಾರ, ಕುತಂತ್ರಗಳಿಂದು ಸಹಜ ಸ್ವಾಭಾವಿಕವಾಗಿವೆ
ಅವರಿಗೆ ತಿರುಗಿ ಬಿದ್ದವರನ್ನು ನಿರ್ಣಾಮ ಮಾಡುತ್ತಾರೆ
ಉದ್ಯೊಗವಕಾಶಗಳು ತಮ್ಮ ಹೊಗಳು ಭಟ್ಟರಿಗೆ ಮೀಸಲು
ಸಾಮರ್ಥ್ಯ ಹೊಂದಿರುವವರನ್ನು ಕಡೆಗೆಣಿಸುತ್ತಾರೆ.

ಪ್ರಶಸ್ತಿಗಳೇನಿದ್ದರೂ ತಮ್ಮ ಅನುಯಾಹಿಗಳಿಗೆ ಮಾತ್ರ
ಉಳಿದವರಿಗೆ ಶಿಸ್ತುಕ್ರಮ ಕೂಡಲೇ ಜಾರಿಗೊಳಿಸುತ್ತಾರೆ
ಉಳ್ಳವರು ಮಾತ್ರ ಮತ್ತೂ ಶ್ರೀಮಂತರಾಗುತ್ತಾರೆ
ನಿಸ್ವಾರ್ಥ ಶ್ರಮಿಕರು ಮತ್ತೂ ಬಡವರಾಗುತ್ತಾರೆ.

ಹೆಗ್ಗಣಗಳಂಥಹ ಲಂಚಕೋರರಿಗೆ ಉತ್ತಮ ಅವಕಾಶ ಲಭ್ಯ
ಪ್ರಾಮಾಣಿಕರತ್ತ ಒಮ್ಮೆ ತಿರುಗಿ ನೋಡಲೂ ಸಹ ಹೇಸುತ್ತಾರೆ
ಬಡ್ತಿಯೆಂಬುದು ಕೆಲವರ ಪಿತ್ರಾರ್ಜಿತ ಆಸ್ತಿಯಂತೆ ಅನುಭವಿಸುತ್ತಾರೆ
ನೀತಿವಂತರಿಗೆ ಮಾತ್ರ ಹಿಂಬಡ್ತಿಯ ಕೊಡುಗೆ ನೀಡುತ್ತಾರೆ.

ಮೌಲ್ಯ, ನೈತಿಕತೆ ಎಂಬುದೆಂದೋ ಕಳೆದು ಹೋಗಿವೆ
ಅವನೀತಿವಂತರನ್ನೇ ಅತ್ಯುತ್ತಮರೆಂದು ಕೊಂಡಾಡುತ್ತಾರೆ
ಆದರೂ, ಅಲ್ಲಲ್ಲಿ ಸತ್ಯದ ಹಣತೆಗಳು ಇನ್ನೂ ಕಂಡುಬರುತ್ತವೆ
ಅವುಗಳನ್ನು ಉಳಿಸಿಕೊಳ್ಳದಿದ್ದರೆ, ಕೊಳೆಯುವುದಂತೂ ನಿಶ್ಚಿತ.

ಮೂಲ ಕವಿಯತ್ರಿ : ಚಿತ್ರ .ಜಿ. ಲೇಲೆ
ಕನ್ನಡಕ್ಕೆ : ಚಂದಿನ

ಮತ್ತೆ ಬರುವನು ಚಂದಿರ - 27

2009-06-22T02:28:00.000-07:00

ಗೆಳೆಯರ ಜೊತೆ ದೊಡ್ಡಕೆರೆಯಲಿ ಮಿಂದು
ಕಾದ ಮರಳ ದಂಡೆಯಲಿ ಅಂಗಾತ ಮಲಗಿ
ಹೊಂಗೆ ಮರದಡಿಯಲಿ ಸುಖನಿದ್ರೆ ಮುಗಿಸಿ
ಹಸಿವಾದಾಗ ಮನೆಗೆ ಮರಳಿದ ಚಂದಿರ

ರಂಗಮಂಟಪದಲ್ಲಿ ಜೋರು ಪ್ರದರ್ಶನ
ಊರೈಕಳ ಜೊತೆಗೆ ನೋಡವ ಸಿರಿತನ
ಮಸಾಲೆ ಉರಿಗಾಳು ಪುರಿ ಮೆಲ್ಲುವುದು
ಸ್ವರ್ಗ ಸಿದ್ಧಿಸಿದ ಸಂತಸ ಚಂದಿರ

ಊರ ಗುಡ್ಡಗಳಲ್ಲಿ ಓತಿಕ್ಯಾತವನ್ನಟ್ಟಿ
ಮುಳ್ಳು ಕಲ್ಲುಗಳ ತುಳಿದು ಹಿಮ್ಮೆಟ್ಟಿ
ತರಚಿ-ಪರಚಿದರು ಕಲ್ಲು ಬೀಸಿದಾಗ
ಏನೋ ಸಾಧಿಸಿದ ತೃಪ್ತಿ ಚಂದಿರ

ಘಮ ಘಮ ಮಲ್ಲಿಗೆ ಮುಂಜಾನೆ ಎದ್ದು
ಅಕ್ಕನಿಗೆ ಕೊಟ್ಟಾಗ ಸಿಕ್ಕ ಆಪ್ತ ಮುತ್ತು
ಕದ್ದ ಮಾವಿನ ಕಾಯಿಗಚ್ಚಿ ಉಪ್ಪುಖಾರ
ಮಂಡಕ್ಕಿ ಮುಕ್ಕಿದ್ದೇನು ಮಜ ಚಂದಿರ

ಮಳೆಗಾಲ ಬಂದಾಗ ಹಸಿರಾದ ಒಡಲು
ಬಣ್ಣಬಣ್ಣದ ಚಿಗುರು ಬಗೆಬಗೆಯ ನವಿರು
ಸಿರಿಕಾಣೊ ಕೆರೆಯಲ್ಲಿ ಕಿರಣಗಳ ತೇರು
ಹಕ್ಕಿಗಳ ಕಲರವಕೆ ಮನಸೋತ ಚಂದಿರ

ನೇರಳೆಕಾಯಿಗಳು ಕಡುನೀಲಿಯಾದಂತೆ
ಇತ್ತಲ ಪೇರಳೆಕಾಯಿ ದುಂಡಗೆ ಮೈದುಂಬಿ
ದೂರದ ನೆಲ್ಲೀಕಾಯಿ ನಳನಳಿಸಿ ಕರೆಯಲು
ಹಲಸಿನ ಹಣ್ಣಿನ ಘಮ ಸೆಳೆದು ಚಂದಿರ

ಊರ ಜಾತ್ರೆಗೆ ಹೊರಡುವ ಉಮ್ಮಸ್ಸು
ಕೂಡಿಟ್ಟ ದುಡ್ಡೆಲ್ಲ ಕಿಸೆಗಿಳಿಸಿದ ಪೋರರು
ನಲಿದಾಡಿ ಬಯಲಲ್ಲಿ ರಿಂಗಣಿಸಿ ಕುಣಿದು
ರಂಗಿನ ತರುಣಿಯರ ತೇರು ಚಂದಿರ

ಪಂಚಭೂತಗಳಲ್ಲಿ ಲೀನವಾದ ನಂತರ
ಮರುಜನ್ಮದ ಪರಿಕಲ್ಪನೆ ಅತಿಮಾನಸ
ಪ್ರಕೃತಿಯಿಂದ, ಪ್ರಕೃತಿಯೆಡೆಗೆ ಪಯಣ
ಈ ನಿಗೂಢ ಪ್ರಕ್ರಯೆ ವಿಸ್ಮಯ ಚಂದಿರ

ರಣರಣ ಬಿಸಿಲಿಗೆ ಮೈ ಸುಡುತ್ತಿರಲು
ಕಣ್ಣುಗಳು ಕಡುಗೆಂಪಾಗಿ ಉರಿದುರಿದು
ಕಾಣದಾಗಿದೆ ಸುತ್ತಮುತ್ತ ಮರದ ನೆರಳು
ಆಯಾಸಕೆ ತಳಮಳಿಸಿದೆ ಜೀವ ಚಂದಿರ

ಮೌನದೊಂದಿಗೆ ಸಂಯೋಜಿತ ಸಂಗೀತ
ಲಹರಿಗಳು ಹೊರಡಿಸುವ ನಾದ ಅದ್ಭುತ
ಹಗುರಾದ ಮೈಮನಗಳಿಗೆ ಚೈತನ್ಯದಿಂದ
ಹಾರುವ ಹಕ್ಕಿಯ ಹಾಗೆ ಚಂದಿರ

ನಿನ್ನ ಆಯ್ಕೆಗಳು

2009-06-20T00:38:00.000-07:00

ನಿನಗಿರುವುದು
ಕೇವಲ ಎರಡೇ ಎರಡು
ಆಯ್ಕೆಗಳು:
ಬೇರುಗಳು,
ಇಲ್ಲಾ ರೆಕ್ಕೆಗಳು
ಇವೆರಡರಲ್ಲಿ
ಯಾವುದಾದರೂ ಒಂದನ್ನು
ಆರಿಸಿಕೊ.

ನೀನೇನಾದರೂ
ಬೇರುಗಳುನ್ನು
ಆರಿಸಿಕೊಂಡರೆ---
ಕೂಡಲೇ ಖಚಿತ ಪಡಿಸಿಕೊ
ಅವುಗಳು
ಉದ್ದವಾಗಿ, ಆಳವಾಗಿ ಬೆಳೆದು,
ಗಟ್ಟಿಯಾದ ತಳಪಾಯದೊಂದಿಗೆ
ನೆಲೆಯೂರಿವೆ ಎಂದು.
ನಂತರ ನೀನು ಅತ್ಯಗತ್ಯವಾಗಿ
ಸುಂದರ ಎಲೆಗಳಿಂದ ಸಜ್ಜಾಗಿ,
ಪರಿಮಳ ಭರಿತ ಹೂವುಗಳೊಂದಿಗೆ,
ರಸ ಭರಿತ ಹಣ್ಣುಗಳನ್ನು
ನೀಡಿದಾಗಲೇ
ಜಗವು ನಿನ್ನಲ್ಲಿಗೆ ಬರಲು
ಹಾತೊರೆಯುತ್ತದೆ.

ಇಲ್ಲವಾದರೆ ನೀನು
ರೆಕ್ಕೆಗಳನ್ನು
ಆರಿಸಿಕೊ---
ಸ್ವಚ್ಛಂದವಾಗಿ
ಹಾರುತ್ತಾ...
ಜಗದ ಬೆನ್ನಟ್ಟಲು.

ಹನಿಗಳು – 5

2009-06-18T05:25:00.001-07:00

- 1 -

ಹೆಂಡ
ಮತ್ತು ಹೆಂಡತಿ
ಇವರಿಬ್ಬರೂ
ಭಾರೀ ಪ್ರಚಂಡರು.
ಯಾವಾಗಲೂ ನನ್ನ
ವಾಲಿಬಾಲಿನಂತೆ
ಆಡಿಕೊಳ್ಳುತ್ತಾರೆ.

- 2 -

ನಾನು
ತಣ್ಣಗೆ, ತೆಪ್ಪಗೆ
ಇದ್ದಿಲಿನಂತೆ ತೂಕಡಿಸುವಾಗ.
ಸುಲಭವಾಗಿ ಕಿಚ್ಚಿನ ಕೆಂಡ ಹಚ್ಚಿದ
ಪ್ರಚಂಡರು
ಮಹಿಳೆ ಮತ್ತು ಮದ್ಯ.

- 3 -

ಗೆಳತಿ
ನೀನೀಗ
ಯಾರನ್ನಾದರೂ
ಪ್ರೀತಿಸು ಅಡ್ಡಿಯಿಲ್ಲ.
ಏಕೆಂದರೆ,
ನಾನಲ್ಲ ಈಗ
ನಿನ್ನ ನಲ್ಲ.

- 4 -

ನಾನೂ
ಸಹ ಸಭ್ಯ.
ಮದ್ಯ ಮತ್ತು ಮಹಿಳೆ
ಕಣ್ಣಿಗೆ ಬೀಳದಿರುವ
ಕ್ಷಣದವರೆಗೆ.

- 5 -

ಕೆಲವರು
ಶೇರುಪೇಟೆ,ಚರ
ಮತ್ತು ಸ್ಥಿರಾಸ್ತಿಗಳಲ್ಲಿ,
ಹಣ ತೊಡಗಿಸಿ
ಸಂತೃಪ್ತಿ
ಹೊಂದುತ್ತಾರೆ.
ನಾನೂ ಸಂತೃಪ್ತ
ಮದ್ಯಪಾನದಿಂದ.

- 6 -

ಬದುಕಲ್ಲಿ
ಏಳು-ಬೀಳು
ಸಹಜವೆಂದು
ಒಪ್ಪಿಕೊಳ್ಳುವೆ.
ಆದರೆ,
ನಾನು ಕುಡಿದು
ಎದ್ದು-ಬಿದ್ದರೆ
ದಡ್ಡಳಂತೇಕೆ
ಅಳುವೆ.

- 7 -

ಕುಡಿತದಿಂದ
ಸಿದ್ಧಿಸುವ ಸುಖ
ಕುಡಿಯದೇ ಬೊಗಳುವ
ದಡ್ಡ ಶಿಖಾಮಣಿಗಳಿಗೆ
ಹೇಗೆ ವರ್ಣಿಸಲಿ
ಪ್ರಭುವೆ.

- 8 -

ಎಷ್ಟೇ
ಕುಡಿದಿದ್ದರೂ
ಕರೆಕ್ಟಾಗಿ ಬಿಲ್ಲು ಕೊಟ್ಟು,
ತಡವಾಗಿಯಾದರೂ ನನ್ನ ಮನೆಗೇ
ತಲುಪುವ ಸಜ್ಜನಿಕೆಯನ್ನು
ಕೇವಲವಾಗಿ
ಕಾಣದಿರಿ
ಆಪ್ತರೆ.

- 9 -

ಕುಡಿತ ಬಹಳ
ಅನಾರೋಗ್ಯಕರ ,
ದುರಭ್ಯಾಸ ಎಂದು
ಪದೇ ಪದೇ ಒತ್ತಿ ಹೇಳುವ
ಶಿಷ್ಟರಿಗೊಂದು ಪುಟ್ಟ ಸಲಹೆ
ವ್ಯರ್ಥವಾಗುವ ಮುನ್ನ
ಒಮ್ಮೆಯಾದರೂ ಕುಡಿದು
ಬದುಕು ಪಾವನವಾಗಿಸಿ.

- 10 -

ದಾರಿ
ತಪ್ಪುವುದಕ್ಕೆ
ನೂರಾರು ಮಾರ್ಗ.
ಮದ್ಯಪಾನವನ್ನೇ
ಎತ್ತಿ ತೋರುವ
ಸಜ್ಜನರ ಹುನ್ನಾರಕ್ಕೆ
ನನ್ನ ತೀವ್ರ ವಿರೋಧ.

ಬಿಂಬ – 40

2009-06-18T05:24:00.001-07:00

ಸುಂದರಿಯೊಬ್ಬಳ
ಸೌಂದರ್ಯ ಸವಿಯುವುದು
ಮಾನವ ಸಹಜವಾದರೂ,
ಅಸಹಜ ರೀತಿಯಲ್ಲಿ
ಆಸ್ವಾಧಿಸುವುದು
ಅಪರಾಧ
ಅಲ್ಲವೆ?

ಬಿಂಬ – 39

2009-06-18T05:23:00.000-07:00

ನಾನು ಸಹಜವಾಗಿ
ಸಭ್ಯನಾಗಿರುವುದು
ನಿಮ್ಮ ಪ್ರಾಮಾಣಿಕ
ಹೆಬ್ಬಯಕೆ, ಒತ್ತಾಸೆ
ಎಂಬುದು ನಿಜವಾಗಿದ್ದಲ್ಲಿ
ದಯವಿಟ್ಟು ಕುಡಿತವನ್ನೊಂದು
ಬಲಹೀನತೆಯೆಂಬುದಾಗಿ
ಬಿಂಬಿಸುವುದು ನೀವು
ಕೂಡಲೇ ನಿಲ್ಲಿಸಿ.

ಬಿಂಬ – 38

2009-06-18T05:22:00.002-07:00

ನನ್ನನ್ನು
ನಿರ್ಲಿಪ್ತವಾಗಿ,
ಪ್ರಾಮಾಣಿಕವಾಗಿ,
ನಿಸ್ವಾರ್ಥದಿಂದ, ತೀವ್ರವಾಗಿ
ಬಯಸುವ, ಪ್ರೀತಿಸುವ, ಅಪ್ಪಿಕೊಳ್ಳುವ,
ಮುತ್ತಿಟ್ಟು ಮತ್ತೇರಿಸುವ
ಏಕೈಕ ಆಪ್ತ ಸಾಧನ
ಮದ್ಯಪಾನ.

ಬಿಂಬ – 37

2009-06-18T05:22:00.001-07:00

ನಮ್ಮ
ಸಮಾಜದಲ್ಲಿ
ಕೆಟ್ಟವರ ಪ್ರಮಾಣ
ಹೆಚ್ಚಾಗಿರುವುದರಿಂದಲೇ
ಸಜ್ಜನರಿಗೆ ಸೂಕ್ತ
ಪ್ರಾಶಸ್ತ್ಯ.

ಬಿಂಬ – 36

2009-06-18T05:21:00.000-07:00

ನಮ್ಮ
ಸ್ವತಂತ್ರವನ್ನು
ಸರಿಯಾದ ರೀತಿಯಲ್ಲಿ
ನಿಭಾಯಿಸುವುದೂ
ಸಹ ಅತಿದೊಡ್ಡ
ಜವಾಬ್ದಾರಿ
ಅಲ್ಲವೆ?

ಬಿಂಬ – 35

2009-06-18T05:20:00.002-07:00

ಸಹಿಸಿಕೊಳ್ಳುವ
ಸದ್ಗುಣ ಯಥೇಚ್ಛವಾಗಿ
ನಮ್ಮಲ್ಲಿ ಅಡಗಿರುವುದು.
ಕೇಡು, ಕಿರುಕುಳ,
ಮತ್ತು ಶೋಷಣೆ
ನಿರಂತರವಾಗಿ,
ಹಾಗು ನಿರ್ಭೀತಿಯಿಂದ
ಮುಂದುವರೆಯಲು
ಪರೋಕ್ಷ ಪ್ರೇರಣೆ ನೀಡಲು
ಸಹಕಾರಿಯಾಗಿದೆ
ಅಲ್ಲವೆ?

ಬಿಂಬ – 34

2009-06-18T05:20:00.001-07:00

ಭ್ರಷ್ಟಾಚಾರ
ಸಹಿಸಿಕೊಳ್ಳುವ
ಸಹನೆ, ಸಂಯಮಗಳು
ನಮ್ಮಲ್ಲಿ ನೆಲೆಯೂರಿರುವುದರಿಂದ,
ನಾವೂ ಸಹ ಭ್ರಷ್ಟಚಾರದ
ಪರೋಕ್ಷ ಬೆಳವಣಿಗೆಗೆ
ಕಾರಣರಾಗಿದ್ದೇವೆ, ಹಾಗಾಗಿ
ಭ್ರಷ್ಟರಾಗಿದ್ದೇವೆ.

ಬಿಂಬ – 33

2009-06-18T05:19:00.002-07:00

ಬಹುತೇಕ
ಎಲ್ಲರೂ
ಪ್ರಮಾಣಿಕರೇ
ಅಪ್ರಮಾಣಿಕರಾಗುವ
ಸೂಕ್ತ ಅವಕಾಶಗಳು
ಸಿಗುವವರೆಗೆ.

ಬಿಂಬ – 32

2009-06-18T05:19:00.001-07:00

ಪ್ರಮಾಣಿಕತೆ,
ಸತ್ಯ, ನಿಷ್ಠೆ,
ನಂಬಿಕೆ
ನೈತಿಕತೆ
ಮೌಲ್ಯಗಳು
ಕೇಳುವುದಕ್ಕೆ
ಮತ್ತು ಹೇಳುವುದಕ್ಕೆ
ತುಂಬಾ ಸೊಗಸಾಗಿರುತ್ತವೆ.

ಬಿಂಬ – 31

2009-06-18T05:18:00.001-07:00

ನಾನೂ ಸಹ ಬಹಳ
ಅದೃಷ್ಟವಂತನೆಂದು
ಭಾವಿಸುತ್ತೇನೆ.
ಆತ್ಮಸಾಕ್ಷಿಯನ್ನು
ಕೊಂದ ಮೇಲೂ
ಸಿಕ್ಕಿಹಾಕಿಕೊಳ್ಳದೆ
ನಿರಪರಾಧಿಯಾಗಿ,
ಸ್ವಚ್ಛಂದವಾಗಿ,
ಬದುಕುವ ಸಾಮರ್ಥ್ಯ
ಸಿದ್ಧಿಸಿಕೊಂಡಿದ್ದೇನೆ.

ಮತ್ತೆ ಬರುವನು ಚಂದಿರ - 26

2009-06-16T21:22:00.001-07:00

ನೆಟ್ಟ ನೋಟದಿಂದ ಕಾಣುವ ಕಾತುರ
ಸಿದ್ಧಿಸಿದ ಚಿತ್ರ ದಿಟ್ಟಿಸುವ ಕುತೂಹಲ
ಗೆರೆಗಳಾಚೀಚೆಗೆ ಇಣುಕುವ ಹಂಬಲ
ತಳಮಳದ ಹುಚ್ಚು ಮನವೊ ಚಂದಿರ

ಚಿತ್ತ ಭಿತ್ತಿಯ ಭ್ರೋಣ ಟಿಸಿಲೊಡೆದು
ನವಿರಾಗಿ ಚಿಗಿರೊಡೆದು ತೂಗಾಡುತ
ಉಲ್ಲಾಸ, ಉತ್ಸಾಹ ಉಮ್ಮಳಿಸುವ
ಪ್ರಕ್ರಿಯೆ ನಿಗೂಢ ವಿಸ್ಮಯ ಚಂದಿರ

ತವಕ ತಲ್ಲಣಗಳ ನಿಯಂತ್ರಿವ ಜಾಣತನ
ಸ್ಥಿರ ಮನಸ್ಥಿತಿ, ನಿರ್ಲಿಪ್ತ ಭಾವಸ್ತರದಿಂದ
ನಿಲುವು, ನಿರ್ಧಾರ ಮಂಡಿಸುವ ಸ್ಥೈರ್ಯ
ಸಾಪೇಕ್ಷ ಸಾಧನೆ ಅಗತ್ಯವೊ ಚಂದಿರ

ಊರುಕೇರಿಗಳ ಅಲೆಯುತ್ತ ಮುತ್ತ
ಸಂದ ತುತ್ತನ್ನು ಸವಿಯುತ್ತ ಮುಕ್ತ
ಲೋಕದರ್ಶನದಿಂದ ವೈರಾಗ್ಯ ಚಿತ್ತ
ಇವ ಅತ್ಯೋತ್ತಮನಲ್ಲವೆ ಚಂದಿರ

ಬೆಟ್ಟ ಗುಡ್ಡಗಳತ್ತಿ ಕಡಿದ ಕಟ್ಟಿಗೆ ಸುತ್ತಿ
ಹೊತ್ತು ಮಾರಿದಾಗಲೆ ದಿನದ ತುತ್ತು
ದಶಕಗಳ ದಾಟಿದ ದಣಿದ ದಾರ್ಶನಿಕ
ಯೋಗ್ಯನಲ್ಲವೆ ನಮಗೆ ಚಂದಿರ

ಮುಗ್ಧತೆಯ ಮೆಟ್ಟಿಲನು ಸತತ ಹತ್ತುತ್ತಾ
ಬಣ್ಣ ಬಣ್ಣಗಳ ಕಡೆಗೆಣಿಸುತ ಕದಡದಂತೆ
ಸರಳತೆಯ ಸನ್ಮಾರ್ಗದಲಿ ಸ್ವರ್ಗ ಕಂಡು
ಐಕ್ಯನಾದವನು ಶರಣನಲ್ಲವೆ ಚಂದಿರ

ಬೆಳ್ಳಿ, ಬಂಗಾರ, ನಗನಾಣ್ಯ, ಮಣ್ಣ,
ಮುಷ್ಟಾನ್ನ, ಮಧುಪಾನ ಸಿರಿಹೊತ್ತು
ಹೂತು ಹೋದ ಕೊನೆಗೆ ಕಡುಬಿಕ್ಷುಕನ
ಹಾಗೆ, ಸಾಧಿಸಿದ್ದೇನೊ ಚಂದಿರ

ಅತ್ತಿತ್ತ ನೋಡದೆ, ಹಿಂತಿರುಗಿ ಕಾಣದೆ
ಮತಿಗೆಟ್ಟು ಮುನ್ನುಗ್ಗಿ ಆಪ್ತರ ತೊರೆದು
ಮುಗ್ಗರಿಸಿ ಬಿದ್ದಾಗ ಎಬ್ಬಿಸುವವರಿಲ್ಲದೆ
ತತ್ತರಿಸಿ ಹೋದನೊ ಇವ ಚಂದಿರ

ಝಣ ಝಣ ಕಾಂಚಾಣ ಮೋಹವಿರಲಿ
ವ್ಯಾಮೋಹವಿರದಂತೆ ಎಚ್ಚರಿಕೆಯಿಂದ
ಸೂಕ್ಷ್ಮಗೆರೆಯನ್ನು ಎಳೆದಾಗಲೇ ಗೆಳೆಯ
ಸಂತೃಪ್ತಿ ಪ್ರಾಪ್ತಿ ಖಚಿತ ಚಂದಿರ

ಸಿಡುಕಿನ ಸಿಂಗಾರಿ ಸಿರಿ ಅವಳ ಕಾಣೊ
ತಿರುಗುತಿದೆ ಬುಗುರಿ ಬಿಂಕ ತೊರೆದು
ನಾಜೂಕು ನಡೆ-ನುಡಿಯಿಂದ ಸೆಳೆದು
ಮುಗ್ಧ ನಗು ಚೆಲ್ಲಿ ಮನ-ಮನೆಗೆ ಚಂದಿರ

ನಾನು ಬೆಳೆದು ದೊಡ್ಡವನಾದಂತೆ

2009-06-13T03:52:00.000-07:00

ಅದು ಬಹಳ ದಿನಗಳ ಹಿಂದೆ.
ನಾನೀಗ ಬಹುತೇಕ ನನ್ನ ಕನಸ್ಸನ್ನು ಮರೆತಿದ್ದೇನೆ.
ಆದರೆ ಅದು ಆ ಸಮಯದಲ್ಲಿತ್ತು,
ನನ್ನ ಮುಂದೆ,
ಪ್ರಕಾಶಮಾನ ಸೂರ್ಯನಂತೆ---
ನನ್ನ ಕನಸು.
ನಂತರ ಗೋಡೆ ಬೆಳೆಯತೊಡಗಿತು,
ಮಂದಗತಿಯಲ್ಲಿ,
ನಿಧಾನವಾಗಿ,
ನನ್ನ ಮತ್ತು ನನ್ನ ಕನಸಿನ ನಡುವೆ.
ಅದು ಎಲ್ಲಿಯವರೆಗೂ ಬೆಳೆಯಿತೆಂದರೆ ಆಕಾಶ ಮುಟ್ಟುವವರೆಗೆ---
ಗೋಡೆ.
ನೆರಳು.
ನಾನು ಕಪ್ಪು ಬಣ್ಣದವನು.
ಆ ನೆರಳಲ್ಲಿ ನಾನು ಮಲಗುತ್ತೇನೆ.
ನನ್ನ ಕನಸಿನ ಬೆಳಕೆಂದಿಗೂ ಸುಳಿಯಲಿಲ್ಲ
ನನ್ನ ಮುಂದೆ,
ನನ್ನ ಮೇಲೆ.
ಕೇವಲ ಬಲಿಷ್ಟ ಗೋಡೆ.
ಕೇವಲ ನೆರಳು.
ನನ್ನ ಕೈಗಳು!
ನನ್ನ ಕಗ್ಗತ್ತಲ ಕೈಗಳು!
ನನ್ನ ಕನಸನ್ನು ಹುಡುಕಿ!
ನನಗೆ ನೆರವಾಗಿ ಈ ಕತ್ತಲನ್ನು ನಿರ್ನಾಮಗೊಳಿಸಲು,
ಈ ರಾತ್ರಿಯನ್ನು ನುಚ್ಚುನೂರಾಗಿಸಲು,
ಈ ನೆರಳನ್ನು ಹರಿದು ಹಾಕಲು
ಸಾವಿರ ದೀಪಗಳ ಸೂರ್ಯನೊಳಗೆ
ಬಿರುಸಾಗಿ ಸುತ್ತುವ ಸೂರ್ಯನ ಸಾವಿರ ಕನಸುಗಳೊಳಗೆ!

ಮೂಲಕವಿ : ಲ್ಯಾಂಗ್ಸ್ಟನ್ ಹ್ಯೂಗ್ಸ್
ಕನ್ನಡಕ್ಕೆ : ಚಂದಿನ

ಮುಂದೂಡಿದ ಕನಸು

2009-06-13T03:17:00.000-07:00

ಮೂಂದೂಡಲ್ಪಟ್ಟ ಕನಸಿಗೆ
ಏನಾಗಬಹುದು?
ಅದೇನಾದರೂ ಬತ್ತಿಬಿಡಬಹುದೆ,
ಒಣದ್ರಾಕ್ಷಿಯಂತೆ ಉರಿಬಿಸಿಲಿಗೆ?
ಅಥವಾ ಕೀವು ತುಂಬಿದ ಗಾಯದಂತೆ ನೋವುಕೊಟ್ಟು---
ಮತ್ತೆ ಓಡಿ ಹೋಗಬಹುದೆ?
ಕೊಳೆತ ಮಾಂಸದಂತೆ ದುರ್ವಾಸನೆ ಹೊಮ್ಮಿಸಬಹುದೆ?
ಅಥವಾ ಸಕ್ಕರೆಯಿಂದ ಹೊರ ಮೈ ಗಡುಸಾಗಿರಿವುದೆ --
ರಸಭರಿತ ಸಿಹಿಯಂತೆ?
ಅದು ಭಾರೀ ಲಗ್ಗೇಜೊತ್ತಂತೆ ಬಾಗಿ ಎಳೆದಾಡಲೂ ಬಹುದು.
ಅಥವಾ ಅದೇನಾದರೂ ಒಮ್ಮೆಗೇ ಸಿಡಿಯಬಹುದೆ?

ಮೂಲಕವಿ : ಲ್ಯಾಂಗ್ಸ್ಟನ್ ಹ್ಯೂಗ್ಸ್
ಕನ್ನಡಕ್ಕೆ : ಚಂದಿನ

ಕನಸುಗಳು

2009-06-13T02:29:00.000-07:00

ಕನಸುಗಳನ್ನು ಗಟ್ಟಿಯಾಗಿ ಹಿಡಿದಿಟ್ಟುಕೊಳ್ಳಿ
ಏಕೆಂದರೆ, ಕನಸುಗಳೇನಾದರೂ ಸತ್ತರೆ
ಬದುಕು ರೆಕ್ಕೆ ಮುರಿದ ಹಕ್ಕಿಯಂತೆ
ಹಾರಲು ಸಾಧ್ಯವಿಲ್ಲ.
ಕನಸುಗಳನ್ನು ಗಟ್ಟಿಯಾಗಿ ಹಿಡಿದಿಟ್ಟುಕೊಳ್ಳಿ
ಏಕೆಂದರೆ, ಕನಸುಗಳು ಮಾಯವಾದಾಗ
ಬದುಕು ಬಂಜರು ಬಯಲಿನಂತಾಗುತ್ತದೆ
ಮಂಜಿನಿಂದ ಹಿಮಗಟ್ಟಿ.

ಮೂಲಕವಿ : ಲ್ಯಾಂಗ್ಸ್ಟನ್ ಹ್ಯೂಗ್ಸ್

ಕನ್ನಡಕ್ಕೆ : ಚಂದಿನ

ಪ್ರಜಾತಂತ್ರ

2009-06-13T02:18:00.000-07:00

ಪ್ರಜಾತಂತ್ರ ಬರಲು ಸಾಧ್ಯವಿಲ್ಲ
ಈ ದಿನ, ಈ ವರ್ಷ
ಅಥವಾ ಎಂದೆಂದಿಗೂ
ಭಯ ಮತ್ತು ಯಾವುದೇ ರಾಜಿಯ ಮೂಲಕ.

ನನಗೆ ಅವರಂತೆ ಸಂಪೂರ್ಣ ಹಕ್ಕಿದೆ
ನಿಂತುಕೊಳ್ಳಲು
ನನ್ನ ಸ್ವಂತ ಕಾಲುಗಳ ಮೇಲೆ
ಮತ್ತೆ ನೆಲ ನನ್ನ ಸ್ವಂತದ್ದಾಗಿಸಿಕೊಳ್ಳಲು.

ನನಗೆ ಜನ ಹೀಗೆ ಹೇಳುವುದು ಕೇಳಿದಾಗ ಬೇಸರವಾಗುತ್ತದೆ,
ಅದರ ಪಾಡಿಗೆ ಆದಾಗ ಆಗಲಿ ಬಿಡಿ ಎಂದು.
ನಾಳೆ ಮತ್ತೊಂದು ದಿನ.
ನನಗೆ ಸ್ವಾತಂತ್ರ್ಯ ಬೇಡ, ನಾನು ಸತ್ತಾಗ.
ನಾಳೆಯ ಊಟದಿಂದ ಇಂದು ಬದುಕಲು ನನಗೆ ಆಗುವುದಿಲ್ಲ.

ಸ್ವಾತಂತ್ರ್ಯ
ದೃಢವಾದ ಬೀಜ
ಭಿತ್ತಿರುವುದು
ಪ್ರಬಲ ಅಗತ್ಯದಿಂದಾಗಿ.

ನಾನೂ ಇಲ್ಲಿ ಬದುಕುತ್ತಿದ್ದೇನೆ.
ನನಗೆ ಸ್ವಾತಂತ್ರ್ಯ ಬೇಕು
ನಿಮ್ಮ ಹಾಗೆ.

ಮೂಲಕವಿ : ಲ್ಯಾಂಗ್ಸ್ಟನ್ ಹ್ಯೂಗ್ಸ್
ಕನ್ನಡಕ್ಕೆ : ಚಂದಿನ

ಮತ್ತೆ ಬರುವನು ಚಂದಿರ - 25

2009-06-11T23:04:00.000-07:00

ಜೀವಸೃಷ್ಟಿಯ ಸಾಧ್ಯತೆ ವಿಸ್ಮಯ
ಬದುಕೆಂಬುದೊಂದು ಅತ್ಯದ್ಭುತ
ಈ ಆವಿಸ್ಮರಣೀಯ ಉಡುಗೊರೆ
ಸವಿಯುವುದೇ ಅದೃಷ್ಟ ಚಂದಿರ

ಬಾಲ್ಯ, ತಾರುಣ್ಯ, ಯೌವನ,
ಪ್ರಬುದ್ಧತೆ,ಬದ್ಧತೆ, ಮುದಿತನ
ಎಲ್ಲ ಘಟ್ಟಗಳನ್ನು ಆಸ್ವಾಧಿಸಿ
ಮುಕ್ತಿ ಪಡೆಯೊ ನೀ ಚಂದಿರ

ಬಚ್ಚಿಟ್ಟುಕೊಳ್ಳಲು ಹಾತೊರೆಯುವೆ
ಕೆಟ್ಟು ಕುಲಗೆಟ್ಟಾಗ ಆತಂಕಪಡುವೆ
ಇಷ್ಟಾನಿಷ್ಟಗಳ ಮಧ್ಯೆ ಗೆರೆ ಎಳೆದು
ಸ್ಪಷ್ಟತೆ ನೆರಳಲ್ಲಿ ಅರಳೊ ಚಂದಿರ

ಜಗದಗಲ ನಿನ್ನ ಆಸೆಗಳ ಚದುರಿವೆ
ನಿತ್ಯ ನರಳುವೆ ನಿರೀಕ್ಷೆ ಉಸಿಯಾದರೆ
ಆಸೆ, ನಿರೀಕ್ಷೆಗಳ ಎಲ್ಲೆ ಮೀರಿದಾಗಲೆ
ನೀನು ಹೂವಂತೆ ಅರಳುವೆ ಚಂದಿರ

ಅನನ್ಯ ಜಗದಲ್ಲಿ ಎದೆಯುಬ್ಬಿ ಉಸಿರಾಡು
ಆಗಾಧ ಆಗಸದೆಡೆಗೆ ಹಣೆಯೊಡ್ಡಿ ಹಾಡು
ಆರ್ದ ಆತ್ಮರತಿ ಅನುಭವಿಸಿ ಕುಣಿದಾಡು
ಅಸೂಯೆ ಪಡುವಂತೆ ಚೋರ ಚಂದಿರ

ನಿಮಿಷಗಳ ಲೆಕ್ಕಿಸದೆ ದಶಕಗಳ ಕಳೆದೆ
ಕೂಡಿ, ಕಳೆವ ಲೆಕ್ಕದ ಆಟದಲಿ ಮುಳುಗಿ
ಅತ್ತಿತ್ತ ನೋಡುವ ಅವಕಾಶಗಳು ಕೈಜಾರಿ
ಆತ್ಮ ಹಾರಿ ಹೋಗುವ ಹಕ್ಕಿ ಚಂದಿರ

ಸುಡು ಸುಡು ಬಿಸಿಲಲ್ಲಿ ಬೆವರು ಬತ್ತಿದೆ
ಬಿರುಕು ಬಿಟ್ಟ ನೆಲ ಬೆಂಕಿ ಉಗುಳುತ್ತಿದೆ
ಹಸಿರಿಗೆ ಉಸಿರಿಲ್ಲ ನಿಷ್ಕರುಣ ಧಾರುಣ
ಅಂಧಕಾರ ಮೊಳಗಿರಲು ಇಲ್ಲಿ ಚಂದಿರ

ಬಾಲ್ಯ ಸ್ಮೃತಿಗಳ ಸವಿನೆನಪಿನಿಂದ
ಕಣ್ಣಾಲಿಗಳು ತಂಬಿ ಹರಿಯುತ್ತಿವೆ
ಕಳಚಿರುವ ಕೊಂಡಿಯನು ಕೂಡಿಸುವ
ಬಯಕೆ ತೀರಿಸುವೆಯಾ ನೀ ಚಂದಿರ

ಹುಳಿ, ಒಗರು, ಸಿಹಿ, ಖಾರ ಬಾಳು
ನಡೆ-ನುಡಿಗಳಿಂದ ಸಿದ್ಧಿಸಿದ ಜ್ಞಾನ
ನಿರ್ಧಾರ, ನಿಯಂತ್ರಣ ನೆಪಮಾತ್ರ
ಆತ್ಮತೃಪ್ತಿಗೆ ಸಾಕು ನಗುವ ಚಂದಿರ

ನೆನಪಿನ ದೋಣಿಯಲಿ ತೇಲುವ ಸುಖ
ವಾಸ್ತವಕ್ಕಿಲಿಯಲು ಹಿಂಜರಿಕೆ, ದುಃಖ
ಕನಸು ಕನ್ನಡಿಯಲ್ಲ ಕದಡುವುದು ಬೇಗ
ನೈಜತೆಗೆ ಜೊತೆಯಾಗೊ ಚಂದಿರ

ಹೌದು ಹೌದು

2009-06-10T21:31:00.000-07:00

ದೇವರು ಪ್ರೀತಿಯನ್ನು ಸೃಷ್ಟಿಸಿದಾಗ, ಅವನು ಎಷ್ಟೋ ಜನಕ್ಕೆ ಉಪಯೋಗವಾಗಲಿಲ್ಲ
ದೇವರು ನಾಯಿಗಳನ್ನು ಸೃಷ್ಟಿಸಿದಾಗ, ಅವನು ನಾಯಿಗಳಿಗೆ ಸಹಾಯ ಮಾಡಲಿಲ್ಲ
ದೇವರು ಸಸಿಗಳನ್ನು ಸೃಷ್ಟಿಸಿದಾಗ, ಅದು ಪರವಾಗಿಲ್ಲ ಎನ್ನಬಹುದು
ದೇವರು ದ್ವೇಷ ಸೃಷ್ಟಿಸಿದಾಗ, ನಮ್ಮೆಲ್ಲರಲ್ಲೂ ಅದು ಸದ್ಬಳಕೆಯಾಯಿತು
ದೇವರು ನನ್ನ ಸೃಷ್ಟಿಸಿದಾಗ, ನನ್ನ ಸೃಷ್ಟಿಸಿದ
ದೇವರು ಕೋತಿ ಸೃಷ್ಟಿಸಿದಾಗ, ಅವನು ಮಲಗಿದ್ದ
ಅವನು ಜಿರಾಫೆ ಸೃಷ್ಟಿಸಿದಾಗ, ಕುಡಿದಿದ್ದ
ಅವನು ಮಾದಕ ವಸ್ತುಗಳನ್ನು ಸೃಷ್ಟಿಸಿದಾಗ ಅಮಲಿನಲ್ಲಿದ್ದ
ಮತ್ತವನು ಆತ್ಮಹತ್ಯೆ ಸೃಷ್ಟಿಸಿದಾಗ ಬಹಳ ಬೇಸರದಲ್ಲಿದ್ದ

ಅವನು ಹಾಸಿಗೆಯಲ್ಲಿ ಮಲಗಿ ನಿನ್ನ ಸೃಷ್ಟಿಸಿದಾಗ
ಅವನಿಗೆ ಗೊತ್ತಿತ್ತು ಅವನೇನು ಮಾಡುತ್ತಿದ್ದಾನೆಂದು
ಅವನು ಕುಡಿದು, ಗಾಢ ಅಮಲಿನಲ್ಲಿದ್ದ
ಮತ್ತೆ ಅವನು ಬೆಟ್ಟ, ಸಾಗರ, ಬೆಂಕಿ ಇವೆಲ್ಲವನ್ನು ಒಂದೇ ಸಮಯದಲ್ಲಿ ಸೃಷ್ಟಿಸಿದ

ಅವನು ಕೆಲವು ತಪ್ಪುಗಳನ್ನು ಮಾಡಿದ
ಆದರೆ ಹಾಸಿಗೆಯಲ್ಲಿ ಮಲಗಿ ನಿನ್ನ ಸೃಷ್ಟಿಸಿದಾಗ
ಅವನು ಮತ್ತೊಮ್ಮೆ ಬಂದು, ಅವನ ವಿಶಾಲ ವಿಶ್ವವನ್ನು ಹರಸಿದ.

ಮೂಲಕವಿ : ಚಾರ್ಲ್ಸ್ ಬುಕೋವ್ಸ್ಕಿ
ಕನ್ನಡಕ್ಕೆ : ಚಂದಿನ

ಹಗ್ಗ ಎಳೆಯಿರಿ, ಬೊಂಬೆ ಆಡುತ್ತದೆ

2009-06-10T21:27:00.000-07:00

ಪ್ರತಿಯೊಬ್ಬನೂ ತಿಳಿದುಕೊಳ್ಳಬೇಕು
ಎಲ್ಲವೂ ಮಾಯವಾಗಬಹುದೆಂದೂ
ಅತೀ ಶೀಘ್ರದಲ್ಲೇ:
ಆ ಬೆಕ್ಕು, ಮಹಿಳೆ, ಉದ್ಯೋಗ
ಮುಂದಿನ ಟೈರು,
ಹಾಸಿಗೆ, ಗೋಡೆಗಳು, ಕೋಣೆ;
ಹೀಗೇ ನಮಗೆ ಅಗತ್ಯವಿರುವುದೆಲ್ಲವೂ
ಪ್ರೀತಿಯೂ ಸೇರಿ,
ಮರಳಿನ ತಳಪಾಯದಲ್ಲಿ ವಿಶ್ರಮಿಸಬಹುದು –
ಯಾವುದೇ ಕಾರಣಕ್ಕೆ,
ಎಷ್ಟೇ ಅಪ್ರಸ್ತುತವಾದರೂ ಸರಿ:
ಹಾಂಕಾಂಗ್ ನಲ್ಲಿ ಹುಡುಗನ ಸಾವು
ಅಥವಾ ಹಿಮಗಡ್ಡೆಗಳ ಬಿರಗಾಳಿ ಒಮಹಾದಲ್ಲಿ...
ನೀವೇನನ್ನೂ ಮಾಡದಿರುವುದಕ್ಕೆ ನೆಪವಾಗಬಹುದು.
ನಿಮ್ಮ ಚೈನಾವೇರ್ ಎಲ್ಲವೂ ಅಪ್ಪಳಿಸಬಹುದು
ಅಡಿಗೆ ಮನೆಯಲ್ಲಿ, ನಿಮ್ಮ ಕೆಲಸದವಳು ಬರುತ್ತಾಳೆ
ಮತ್ತೆ ನೀವಲ್ಲಿ ನಿಂತಿದ್ದೀರಿ, ಕುಡಿದು,
ಅದರ ಮಧ್ಯದಲ್ಲಿ, ಅವಳು ಕೇಳುತ್ತಾಳೆ:
ಅಯ್ಯೋ ದೇವರೆ, ನಿಮಗೇನಾಯಿತೆಂದು?
ನೀವು ಹೇಳುತ್ತೀರಿ: ನನಗೇನೂ ಗೊತ್ತಿಲ್ಲ,
ನನಗೇನೂ ಗೊತ್ತಿಲ್ಲ...

ಮೂಲಕವಿ : ಚಾರ್ಲ್ಸ್ ಬುಕೋವ್ಸ್ಕಿ
ಕನ್ನಡಕ್ಕೆ : ಚಂದಿನ

ಕಲೆ ತರಗತಿಯಲ್ಲಿ ಹಸುಗಳು

2009-06-10T21:26:00.000-07:00

ಸುಂದರ ಹವಾಮಾನ
ಸುಂದರ ಮಹಿಳೆಯಂತೆ---
ಇದು ಯಾವಾಗಲೂ ಉದ್ಭವಿಸುವುದಿಲ್ಲ
ಇದು ಜಾಸ್ತಿ ಹೊತ್ತಿರುವುದೂ ಇಲ್ಲ
ಗಂಡಸರೆ
ಹೆಚ್ಚು ಸ್ಥಿರವಾಗಿರುತ್ತಾರೆ:
ಅವನು ಕೆಟ್ಟವನಾಗಿದ್ದರೆ
ಅವನು ಹಾಗೇ ಮುಂದುವರೆಯುವ
ಸಾಧ್ಯತೆ ಹೆಚ್ಚಾಗಿರುತ್ತದೆ,
ಅವನು ಒಳ್ಳೆಯವನಾಗಿದ್ದರೆ
ಹಾಗೇ ಮುಂದುವರೆಯಬಹುದು
ಅದರೆ, ಹೆಣ್ಣು
ಬದಲಾಗುತ್ತಿರುತ್ತಾಳೆ
ಮಕ್ಕಳಿಂದ,
ವಯಸ್ಸಿಂದ,
ಆಹಾರ ವಿಧಾನದಿಂದ,
ಮಾತುಗಳಿಂದ,
ಸಂಭೋಗದಿಂದ,
ಚಂದ್ರನಿದ್ದಾಗ,
ಅವನಿಲ್ಲದಿದ್ದಾಗ, ಅಥವಾ
ಸೂರ್ಯನಿರುವಾಗ,
ಅಥವಾ ಮಧುರ ಕ್ಷಣಗಳಲ್ಲಿ.
ಹೆಣ್ಣನ್ನು ಚೆನ್ನಾಗಿ ಪೋಷಿಸಬೇಕು
ಜೀವಂತವಾಗಿರಲು
ಪ್ರೀತಿಯಿಂದ.
ಎಲ್ಲಿ ಗಂಡಸು
ಬಲಶಾಲಿಯಾಗಬಹುದೊ
ಅವನನ್ನು
ದ್ವೇಷಿಸುವುದರದಿಂದ.

ಮೂಲಕವಿ : ಚಾರ್ಲ್ಸ್ ಬುಕೋವ್ಸ್ಕಿ
ಕನ್ನಡಕ್ಕೆ : ಚಂದಿನ

ಮಳೆಯಿರಲಿ, ಬಿಸಿಲಿರಲಿ

2009-06-10T21:22:00.000-07:00

ದಢೂತಿ ಹಕ್ಕಿಗಳು ಪ್ರಾಣಿ ಸಂಗ್ರಹಾಲಯದಲ್ಲಿ
( ಆ ಮೂರೂ ಹಕ್ಕಿಗಳು )
ಕುಳಿತಿವೆ ಮೌನವಾಗಿ
ಅವುಗಳ ಪಂಜರದ ಮರದಲ್ಲಿ
ಕೆಳಗೆ
ನೆಲದ ಮೇಲೆ
ಕೊಳೆತ ಮಾಂಸದ ತುಂಡುಗಳು
ಹಕ್ಕಿಗಳು ಗಂಟಲವರೆಗೆ ಗಡತ್ತಾಗಿ ಮುಕ್ಕಿವೆ.
ನಮ್ಮ ತೆರಿಗೆಗಳು ಅವುಗಳನ್ನು ಚೆನ್ನಾಗಿ
ಪೋಷಿಸುತ್ತಿವೆ.

ನಾವು ಬಂದಾಗ ಮುಂದಿನ
ಪಂಜರದೆಡೆಗೆ
ಅದರೊಳಗೆ ಒಬ್ಬ ವ್ಯಕ್ತಿಯಿದ್ದ
ನೆಲದಲ್ಲಿ ಕುಳಿತುಕೊಂಡು
ತಿನ್ನುತ್ತಿದ್ದ
ಅವನು ಹಾಕಿದನ್ನೇ.
ನಾನು ಅವನನ್ನು ಗುರುತಿಸಿದೆ
ನಮ್ಮ ಪುರಾತನ ಪೋಸ್ಟ್ಮೆನ್ ಎಂದು.
ಅವನ ನೆಚ್ಚಿನ ಹಾರೈಕೆ
ಮೊದಲಿನಿಂದಲೂ:
“ನಿಮ್ಮ ದಿನ ಶುಭಕರವಾಗಿರಲಿ.”

ಆ ದಿನ ಹಾಗೇ ಇತ್ತು.

ಮೂಲಕವಿ : ಚಾರ್ಲ್ಸ್ ಬುಕೋವ್ಸ್ಕಿ
ಕನ್ನಡಕ್ಕೆ : ಚಂದಿನ

ಬರವಣಿಗೆ

2009-06-10T21:15:00.000-07:00

ಎಷ್ಟೋ ಸಲ ಇದೊಂದೇ
ಒಂದು
ನಿನ್ನ ಹಾಗು ಅಸಾಧ್ಯತೆಯ
ನಡುವೆ ಇರುವುದು.
ಯಾವ ಮದ್ಯ,
ಯಾವ ಮಹಿಳೆಯ ಪ್ರೀತಿ,,
ಯಾವ ಸಂಪತ್ತೂ,
ಇದಕ್ಕೆ ಸರಿಸಮವಲ್ಲ

ಮೂಲಕವಿ : ಚಾರ್ಲ್ಸ್ ಬುಕೋವ್ಸ್ಕಿ
ಕನ್ನಡಕ್ಕೆ : ಚಂದಿನ

ತಪ್ಪೊಪ್ಪಿಗೆ

2009-06-10T00:23:00.000-07:00

ಕಾಯುತ್ತಿದ್ದೇನೆ ಸಾವಿಗಾಗಿ
ಆ ಬೆಕ್ಕೆನಂತೆ
ಅದು ಜಿಗಿಯುತ್ತಲ್ಲಾ
ಹಾಸಿಗೆ ಮೇಲೆ

ನಾನು ಬಹಳ ದುಃಖತಪ್ತನಾಗಿದ್ದೇನೆ
ಹೆಂಡತಿಗಾಗಿ

ಅವಳಿದನ್ನು ನೋಡುತ್ತಾಳೆ
ಬಿಗಿಯಾದ
ಬಿಳಿ
ದೇಹ
ಒಮ್ಮೆ ಕದಲಿಸುತ್ತಾಳೆ, ನಂತರ
ಇನ್ನೊಂದು ಸಲ
ಕದಲಿಸಬಹುದು

“ಶೇಖರ್”

ಶೇಖರ್ ಉತ್ತರ
ನೀಡಲಿಲ್ಲ.

ನನ್ನ ಸಾವಿನಿಂದಾಗಿ
ಚಿಂತಿಸುತ್ತಿಲ್ಲ, ನನ್ನ ಹೆಂಡತಿಗಾಗಿ,
ತೊರೆದಿದ್ದಾಳಲ್ಲಾ
ಖಾಲಿಯಿದ್ದ
ಈ ಹೊರೆಯನ್ನು.

ಅವಳಿಗೆ ಗೊತ್ತಾಗಬೇಕೆಂದು
ಬಯಸುವೆ
ಎಲ್ಲಾ ರಾತ್ರಿಗಳಲ್ಲಿ
ಅವಳ ಪಕ್ಕದಲ್ಲೇ
ಮಲಗಿದ್ದರೂ

ಕ್ಷುಲ್ಲಕ
ವಾದ-ವಿವಾದಗಳೂ
ಸಹ ಅಮೋಘವಾದ
ಕ್ಷಣಗಳಾಗಿದ್ದವು

ಆ ಕಠಿಣವಾದ
ಮಾತುಗಳು
ನನಗ್ಯಾವಾಗಲೂ
ಹೇಳಲು
ಭಯವಾಗುತ್ತಿತ್ತಲ್ಲಾ
ಅವುಗಳನ್ನು ಈಗ
ನಿರಾಳವಾಗಿ ಹೇಳಬಹುದು:

ನಾ ನಿನ್ನ ಪ್ರೀತಿಸುವೆ.

ಮೂಲಕವಿ : ಚಾರ್ಲ್ಸ್ ಬುಕೋವ್ಸ್ಕಿ
ಕನ್ನಡಕ್ಕೆ : ಚಂದಿನ

ನೀಲಿಹಕ್ಕಿ

2009-06-10T00:22:00.000-07:00

ನನ್ನ ಹೃದಯದಲ್ಲೊಂದು ನೀಲಿಹಕ್ಕಿಯಿದೆ
ಅದು ಹೊರ ಬಂದು ಸ್ವಚ್ಛಂದ ಹಾರಲು ಬಯಸುತ್ತದೆ
ಆದರೆ ನಾನವನಿಗೆ ಬಹಳ ಕಷ್ಟ ಕೊಡುತ್ತೇನೆ
ಹೇಳುತ್ತನೆ, ನೀನಲ್ಲೇ ಬಿದ್ದಿರು, ನಾನೆಂದಿಗೂ
ನಿನ್ನನ್ನು ಬೇರೆ ಯಾರೂ ನೋಡಲು
ಬಿಡುವುದಿಲ್ಲ.

ಮೂಲಕವಿ : ಚಾರ್ಲ್ಸ್ ಬುಕೋವ್ಸ್ಕಿ
ಕನ್ನಡಕ್ಕೆ : ಚಂದಿನ

ಒಳ್ಳೆಯವರಾಗಿರಿ

2009-06-10T00:21:00.000-07:00

ನಮಗ್ಯಾವಾಗಲೂ ಹೇಳುತ್ತಾರೆ
ಬೇರೊಬ್ಬರ ಅಭಿಪ್ರಾಯಗಳನ್ನು
ಅರ್ಥಮಾಡಿ ಕೊಳ್ಳಬೇಕೆಂದು
ಅದು ಎಷ್ಟೇ ಹಳೆಯದಾಗಿ,
ಅಪ್ರಸ್ತುತವಾಗಿ, ತಿಳಿಗೇಡಿತನದ್ದಾಗಿ,
ಅಥವಾ ತೀವ್ರ ವಿರೋಧಿಸುವಂಥದ್ದಾಗಿದ್ದರೂ
ಸರಿಯೆ .

ಮೂಲಕವಿ : ಚಾರ್ಲ್ಸ್ ಬುಕೋವ್ಸ್ಕಿ
ಕನ್ನಡಕ್ಕೆ : ಚಂದಿನ

ಕವನಗಳ ಹಾದಿಯಲ್ಲಿ

2009-06-10T00:19:00.000-07:00

ಕವನಗಳು ಸಾವಿರಗಳ ಗಡಿ ದಾಟುತ್ತಿರುವಂತೆಯೇ
ನಿಮಗನ್ನಿಸುತ್ತದೆ, ನೀವು ಸೃಷ್ಟಿಸಿದ್ದು
ಅತ್ಯಲ್ಪ ಎಂದು.

ಮೂಲಕವಿ : ಚಾರ್ಲ್ಸ್ ಬುಕೋವ್ಸ್ಕಿ
ಕನ್ನಡಕ್ಕೆ : ಚಂದಿನ

ಚಂದ್ರ, ತಾರೆಗಳು ಮತ್ತು ಜಗತ್ತು

2009-06-09T23:05:00.001-07:00

ದೀರ್ಘವಾಗಿ ನಡೆಯುವುದು ರಾತ್ರಿವೇಳೆಯಲ್ಲಿ---
ಬಹಳ ಒಳ್ಳೆಯದು ಜೀವಕ್ಕೆ:
ಕಿಟಕಿಗಳ ಮೂಲಕ ಅಸ್ಪಷ್ಟವಾಗಿ ಕಾಣುವ
ಆಯಾಸಗೊಂಡ ಗೃಹಿಣಿಯರು
ಜಗಳ ನಿಲ್ಲಿಸುವ ಪ್ರಯತ್ನವನ್ನು
ತಮ್ಮತಮ್ಮ ಪಾನಮತ್ತ ಗಂಡಂದಿರೊಂದಿಗೆ.

ಮೂಲಕವಿ : ಚಾರ್ಲ್ಸ್ ಬುಕೋವ್ಸ್ಕಿ
ಕನ್ನಡಕ್ಕೆ : ಚಂದಿನ

ಎಲ್ಲರೊಂದಿಗೂ ಒಬ್ಬಂಟಿ

2009-06-09T22:48:00.000-07:00

ಮಾಂಸಖಂಡಗಳು ಎಲುಬುಗಳನ್ನಾವರಿಸುತ್ತವೆ
ಮೆದುಲನ್ನು
ಅಲ್ಲಿಡುತ್ತಾರೆ ಮತ್ತೆ
ಕೆಲವೊಮ್ಮೆ ಆತ್ಮವನ್ನು,
ಹೆಂಗಸರು
ಗೋಡೆಗಳಿಗೆ ಗಾಜಿನ ಗ್ಲಾಸುಗಳನ್ನೊಡೆಯುತ್ತಾರೆ
ಮತ್ತೆ ಗಂಡಸರು ಕುಡಿಯುತ್ತಾರೆ
ಹೇರಳವಾಗಿ
ಯಾರೂ ಕಾಣುವುದಿಲ್ಲ
ಅವನನ್ನು
ಆದರೂ
ನೋಡಲು ಹಾತೊರೆಯುತ್ತಾರೆ
ಮೇಲೆ, ಆಚೆ, ಅತ್ತಿತ್ತ ಒದ್ದಾಡುತ್ತಾ
ಹಾಸಿಗೆಯಿಂದ.
ಮಾಂಸ ಸುತ್ತುವರೆದಿದೆ
ಎಲುಬುಗಳನ್ನು, ಮಾಂಸವು
ಮಾಂಸಕಿಂತಲೂ ಮಿಗಿಲಾದುದಕ್ಕಾಗಿ
ಹುಡುಕುತ್ತಿರುತ್ತದೆ.

ಅಲ್ಲಿ ಅವಕಾಶವಿಲ್ಲ
ಖಂಡಿತ:
ನಾವೆಲ್ಲರೂ ಸೆರೆಯಾಗಿದ್ದೇವೆ
ಒಂದೇ
ವಿಧಿಯಲ್ಲಿ.

ಯಾರೂ ಎಂದಿಗೂ ಕಾಣಲಾರರು
ಅವನನ್ನು.

ನಗರದ ವ್ಯಸನಗಳು ತುಂಬುತ್ತವೆ
ತ್ಯಾಜ್ಯ ಬಯಲುಗಳು ತುಂಬುತ್ತವೆ
ಹುಚ್ಚಾಸ್ಪತ್ರೆಗಳು ತುಂಬುತ್ತವೆ
ವೈದ್ಯಶಾಲೆಗಳು ತುಂಬುತ್ತವೆ
ಸ್ಮಶಾನಗಳು ತುಂಬುತ್ತವೆ

ಬೇರೆ ಯಾವುದೂ
ತುಂಬುವುದಿಲ್ಲ.

ಮೂಲಕವಿ : ಚಾರ್ಲ್ಸ್ ಬುಕೋವ್ಸ್ಕಿ
ಕನ್ನಡಕ್ಕೆ : ಚಂದಿನ